ವಿಜಯವಾಣಿ ಸುದ್ದಿಜಾಲ ಉಡುಪಿ
ನಿಯಂತ್ರಣ ತಪ್ಪಿ ನದಿಯಲ್ಲಿ ಬಿದ್ದ ಕಾರಿನಲ್ಲಿದ್ದ ಸುಮಾರು 45 ಲಕ್ಷ ರೂ. ಮೌಲ್ಯದ ಚಿನ್ನದ ಆಭರಣಗಳನ್ನು ಹುಡುಕಿ ಮಾಲೀಕರಿಗೆ ಹಸ್ತಾಂತರಿಸುವ ಮೂಲಕ ಉಡುಪಿಯ ಮುಳುಗುತಜ್ಞ ಈಶ್ವರ ಮಲ್ಪೆ ಗಮನ ಸೆಳೆದಿದ್ದಾರೆ.
ಚಿಕ್ಕಮಗಳೂರು ಜಿಲ್ಲೆಯ ಬೇಲೂರು ರಸ್ತೆ ಮಾರ್ಗದಲ್ಲಿ ಅ.27ರಂದು ಬೆಳಗ್ಗೆ ಸಾಗುತ್ತಿದ್ದ ಕಾರೊಂದು ನಿಯಂತ್ರಣ ತಪ್ಪಿ ಪಕ್ಕದಲ್ಲಿದ್ದ ನದಿಗೆ ಉರುಳಿ ಬಿದ್ದಿತ್ತು. ಕಾರಿನಲ್ಲಿದ್ದ ಹರಿಹರ ಸಮೀಪದ ಮಲೆಬೆನ್ನೂರು ಗ್ರಾಮದ ಸದಾನಂದ ಎಂಬವರು ಈಜಿ ದಡ ಸೇರಿ ಪ್ರಾಣಾಪಾಯದಿಂದ ಪಾರಾಗಿದ್ದರು.
ಪತ್ನಿಗೆ ಸಂಬಂಧಿಸಿದ ಆಭರಣಗಳನ್ನು ಕಾರಿನಲ್ಲಿಟ್ಟುಕೊಂಡು ಬೆಳೂರಿನಲ್ಲಿದ್ದ ಪತ್ನಿಯ ತವರುಮನೆಗೆ ಪ್ರಯಾಣಿಸುತ್ತಿದ್ದರು.ಈ ವೇಳೆ ಬ್ರೇಕ್ ಫೇಲ್ ಆಗಿದ್ದು, ನಿಯಂತ್ರಣ ತಪ್ಪಿದ ಕಾರು ನದಿಗೆ ಉರುಳಿತ್ತು. ಕಾರಿನೊಳಗೆ ಇದ್ದ ಸುಮಾರು 45 ಲಕ್ಷ ರೂಪಾಯಿಗೂ ಅಧಿಕ ಮೌಲ್ಯದ ಆಭರಣಗಳಿದ್ದ ಕೆಂಪು ಬಟ್ಟೆಯ ಚೀಲ ನದಿಯೊಳಗೆ ಬಿದ್ದಿತ್ತು.
ಪತ್ನಿಯ ತವರು ಮನೆಗೆ ಕಾರಿನಲ್ಲಿ ಒಬ್ಬನೇ ತೆರಳುತ್ತಿದ್ದಾಗ ನಿಯಂತ್ರಣ ತಪ್ಪಿ ಕಾರು ನದಿಗೆ ಬಿದ್ದಿತು. ಈಜು ಬರುವುದರಿಂದ ಪ್ರಾಣಾಪಾಯದಿಂದ ನಾನು ಪಾರಾದೆ. ಕ್ರೇನ್ ಮೂಲಕ ಕಾರನ್ನೂ ಮೇಲಕ್ಕೆತ್ತಲಾಯಿತು. ಆದರೆ, ಕಾರಿನೊಳಗೆ ಇದ್ದ ಲಕ್ಷಾಂತರ ರೂ. ಮೌಲ್ಯದ ಆಭರಣವಿದ್ದ ಚೀಲ ನದಿಯೊಳಗೆ ಬಿದ್ದಿತ್ತು. ಅದು ಮರಳಿ ನನಗೆ ಸಿಗುವ ಭರವಸೆ ಖಂಡಿತ ಇರಲಿಲ್ಲ. ಈಶ್ವರ ಮಲ್ಪೆ ಅವರು ಆಭರಣ ಸಿಗುವಂತೆ ಮಾಡಿದ್ದಾರೆ. ನಿಜಕ್ಕೂ ಅವರು ಆಪದ್ಬಾಂಧವರು.