ಉಡುಪಿ: ಯಕ್ಷಗಾನ ಮನರಂಜನೆಗಷ್ಟೇ ಸೀಮತವಾದ ಕಲೆಯಲ್ಲ. ಅದು ಆಟ-ಪಾಠ ಎರಡನ್ನೂ ಒಳಗೊಂಡ ವಿಶಿಷ್ಟ ಕಲೆ. ಯಕ್ಷಗಾನ ನೋಡುವುದರಿಂದ ಸಂತೋಷ ಸಿಗುವುದಲ್ಲದೆ ಪೌರಾಣಿಕ ಜ್ಞಾನವೂ ಲಭಿಸುತ್ತದೆ. ಹೀಗಾಗಿ ಇಂತಹ ಶ್ರೇಷ್ಠ ಕಲೆ ಹಾಗೂ ಕಲಾವಿದರ ಪೋಷಣೆ ನಿರಂತರ ನಡೆಯಬೇಕು. ಆ ನಿಟ್ಟಿನಲ್ಲಿ ಕಲಾವಿದರನ್ನು ಗುರುತಿಸಿ ಸನ್ಮಾನಿಸುವುದು ಸ್ತುತ್ಯಾರ್ಹ. ಅದರಲ್ಲೂ ಶ್ರೀಕೃಷ್ಣನ ಸನ್ನಿಧಿಯಲ್ಲಿ ಪ್ರಶಸ್ತಿ ಪ್ರದಾನ ಮಾಡುವುದು ಅತ್ಯಂತ ಪುಣ್ಯತಮ ಕಾರ್ಯ ಎಂದು ಪರ್ಯಾಯ ಶಿರೂರು ಮಠದ ವೇದವರ್ಧನ ತೀರ್ಥ ಶ್ರೀಪಾದರು ನುಡಿದರು.

ಉಡುಪಿ ಶ್ರೀಕೃಷ್ಣ ಮಠದ ರಾಜಾಂಗಣದಲ್ಲಿ ಯಕ್ಷರಂಗ ಕಲಾಸಂಸ್ಥೆ ಶ್ರೀ ಮಿತ್ರ ಯಕ್ಷಗಾನ ಮಂಡಳಿ (ರಿ.) ಸರಳೇಬೆಟ್ಟು ಮಣಿಪಾಲ ವತಿಯಿಂದ ಹಾಗೂ ತಲ್ಲೂರು ಫ್ಯಾಮಿಲಿ ಟ್ರಸ್ಟ್​ (ರಿ.) ಉಡುಪಿ,  ರಸಿಕರತ್ನ ವಿಟ್ಲ ಜೋಶಿ ಪ್ರತಿಷ್ಠಾನ (ರಿ.) ಪರ್ಕಳ ಸಹಕಾರದಲ್ಲಿ ಮಂಗಳವಾರ  (ಜು.14) ಸಂಜೆ ಆಯೋಜಿಸಿದ್ದ ಪ್ರಶಸ್ತಿ ಪ್ರದಾನ ಮತ್ತು 44ನೇ ವಾರ್ಷಿಕೋತ್ಸವ ಸಂಭ್ರಮ ಉದ್ಘಾಟಿಸಿ ಆಶೀರ್ವಚನ ನೀಡಿದರು.

ಹೆರ್ಗ ವ್ಯವಸಾಯ ಸಹಕಾರಿ ಸಂಘ ಪರ್ಕಳದ ಅಧ್ಯಕ್ಷ ದಿನಕರ್​ ಶೆಟ್ಟಿ ಹೆರ್ಗ, ವಿಟ್ಲ ಜೋಶಿ ಪ್ರತಿಷ್ಠಾನದ ಅಧ್ಯಕ್ಷ ಹರೀಶ್​ ಜೋಶಿ, ಸಿಂಡಿಕೇಟ್​ ಬ್ಯಾಂಕ್​ ಮಣಿಪಾಲ ಶಾಖೆಯ ನಿವೃತ್ತ ಎಜಿಎಂ ಎಸ್​.ಅನಂತ್​ ನಾಯ್ಕ್​ ಮಾತನಾಡಿದರು.

ಮಿತ್ರ ಯಕ್ಷಗಾನ ಮಂಡಳಿಯ ಸ್ಥಾಪಕಾಧ್ಯಕ್ಷ ಉಪೇಂದ್ರ ನಾಯಕ್​, ನಗರಸಭಾ ಮಾಜಿ ಸದಸ್ಯೆ ವಿಜಯಲಕ್ಷ್ಮೀ ಕಾಮತ್​, ಶ್ರುತಿ ಶೆಣೈ, ಸದಾನಂದ್​ ಪ್ರಭು ಪೆರ್ಣಂಕಿಲ, ನಾರಾಯಣ ಬಿ.ಕೆ. ಉಪಸ್ಥಿತರಿದ್ದರು.

ಸಭಾ ಕಾರ್ಯಕ್ರಮದ ಬಳಿಕ ಶ್ರೀ ಮಿತ್ರ ಯಕ್ಷಗಾನ ಮಂಡಳಿಯ ಬಾಲ ಕಲಾವಿದರಿಂದ 'ಕಂಸ ದಿಗ್ವಿಜಯ-ಕೃಷ್ಣ ಲೀಲೆ-ಕಂಸ ವಧೆ' ಯಕ್ಷಗಾನ ಪ್ರದರ್ಶನ ನಡೆಯಿತು.