ಉಡುಪಿ: ಬಾಕಿ ಕೊಡಬೇಕಾದ 5 ಲಕ್ಷ ರೂ. ಕೊಡುವಂತೆ ಮೊಬೈಲ್​ ಕರೆ ಮೂಲಕ ಉಡುಪಿಯ  ಕುಟುಂಬದವರಿಗೆ ಜೀವ ಬೆದರಿಕೆ ಹಾಕಿದ್ದ ಪ್ರಕರಣಕ್ಕೆ ಸಂಬಂಧಿಸಿ ಪೊಲೀಸರು ಇಬ್ಬರನ್ನು ವಶಕ್ಕೆ ಪಡೆದಿದ್ದಾರೆ.

ಉಡುಪಿ ಶಿವಳ್ಳಿ ಗ್ರಾಮದ ಪೆರಂಪಳ್ಳಿ ರಸ್ತೆ ಮಾರ್ಗದಲ್ಲಿರುವ ಜಾನ್​ ಆರ್ಕ್​ ಅಪಾರ್ಟ್​ಮೆಂಟ್​ ನಿವಾಸಿ ಸಾಜೀದ್​ ಅಬ್ದುಲ್​ ಶುಕೂರ್​ (35), ತುಮಕೂರು ಜಿಲ್ಲೆಯ ಕುಣಿಗಲ್​ ತಾಲೂಕಿನ ಕೆಂಪನಳ್ಳಿ ಸಮೀಪದ ಹುತ್ರಿದುರ್ಗಾ ಹೋಬಳಿಯ ಸೈಯದ್​ ಸೈಫ್​ ಅಹಮ್ಮದ್​ (40) ಬಂಧಿತರು.

ಕಳೆದ ಜು.2ರಂದು ಸಂಜೆ 6:30ಕ್ಕೆ ವಾಟ್ಸಾಪ್​ ಕರೆ ಬಂದಿದ್ದು, ಹಿಂದಿ ಭಾಷೆಯಲ್ಲಿ ಮಾತನಾಡುತ್ತಿದ್ದ ವ್ಯಕ್ತಿಯೋರ್ವ, ನೀವು ಅಜಿತ್​ ಪಡಿಯಾರ್​ ಅವರ ತಂದೆಯಾ? ಆತ ನಮ್ಮ ಬಳಿ ವಜ್ರದ ವ್ಯವಹಾರ ಮಾಡಿದ್ದು ಬಾಕಿ 5 ಲಕ್ಷ ರೂ. ಇನ್ನೂ ಕೊಟ್ಟಿಲ್ಲ. ಅದನ್ನು ನೀವು ಕೊಡಬೇಕು ಎಂದು ಬೆದರಿಸಿದ್ದಾನೆ. ಇದಕ್ಕೆ  ಅಜಿತ್​ ತಂದೆ ಅಶೋಕ್​ ಪ್ರತಿಕ್ರಿಯಿಸಿ, ನನ್ನ ಮಗ ಎಂಟು ವರ್ಷದ ಹಿಂದೆಯೇ ಮೃತಪಟ್ಟಿದ್ದಾನೆ. ಆತ ಒಮ್ಮೆಯೂ ನಮಗೆ ವಜ್ರದ ವ್ಯವಹಾರದ ಕುರಿತು ತಿಳಿಸಿಲ್ಲ. ಹೀಗಾಗಿ ನಾನು ಹಣ ಕೊಡಲು ಆಗುವುದಿಲ್ಲ ಎಂದಿದ್ದರು. 

ಅದೇ ದಿನ ಬೆಳಗ್ಗೆ ಆ ವ್ಯಕ್ತಿ ದುಬಾಯಿಯಲ್ಲಿರುವ ಸಜಿತ್​ನ ಸಹೋದರ ಅಮೀತ್​ ಅವರಿಗೆ ಮೊಬೈಲ್​ ಪೋನ್​ ಕರೆ ಮಾಡಿ, ನಿನ್ನ ಅಣ್ಣ ಅಜಿತ್​ ನನಗೆ ಕೊಡಬೇಕಾದ ಬಾಕಿ 5 ಲಕ್ಷ ರೂ. ನೀನು ಕೊಡಬೇಕು. ಇಲ್ಲದಿದ್ದರೆ ಊರಿನಲ್ಲಿರುವ ನಿನ್ನ ಪತ್ನಿಗೆ ತೊಂದರೆ ನೀಡುವುದಾಗಿ ಬೆದರಿಸಿದ್ದನು. ಈ ವಿಚಾರವಾಗಿ ಅಶೋಕ್​ ಪಡಿಯಾರ್​ ಅವರು ಉಡುಪಿ ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದರು.

ಆರೋಪಿಗಳ ಪತ್ತೆಗೆ ಉಡುಪಿ ನಗರ ಪೊಲೀಸ್​ ನಿರೀಕ್ಷಕ ಮಹೇಶಪ್ರಸಾದ್​ ಪಿ. ಮಾರ್ಗದರ್ಶನದಲ್ಲಿ ಎಸ್​ಐ ರತ್ನಾಕರ್​ ನೇತೃತ್ವದಲ್ಲಿ ವಿಶೇಷ ತಂಡ ರಚಿಸಲಾಗಿತ್ತು.

ಬಂಧಿತ ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು ನ್ಯಾಯಾಧೀಶರು ನ್ಯಾಯಾಂಗ ಬಂಧನ ವಿಧಿಸಿದ್ದಾರೆ. ಆರೋಪಿ ಸೈಯದ್​ ಸೈಫ್​ ಅಹಮ್ಮದ್​ನನ್ನು ಪೊಲೀಸ್​ ಅಭಿರಕ್ಷೆಗೆ ಪಡೆದು ತನಿಖೆ ಮುಂದುವರಿಸಲಾಗಿದೆ ಎಂದು ಎಸ್ಪಿ ಹರಿರಾಮ್​ ಶಂಕರ್​ ತಿಳಿಸಿದ್ದಾರೆ.