ಉಡುಪಿ: ಯಕ್ಷ ರಂಗಾಯಣ ಕಾರ್ಕಳದ ಹೆಸರು ಬದಲಾವಣೆಯಾಗಿದ್ದು, 'ಕರಾವಳಿ ರಂಗಾಯಣ ಕಾರ್ಕಳ' ಎಂಬ ಹೊಸ ನಾಮಕರಣದೊಂದಿಗೆ ಎಲ್ಲ ಬಗೆಯ ರಂಗ ಚಟುವಟಿಕೆ ನಡೆಯಲಿದೆ. ಜುಲೈ ತಿಂಗಳಲ್ಲಿ ಕಲಾವಿದರ ಸಂದರ್ಶನ ನಡೆಸಿ, ರೆಪರ್ಟರಿ ತಂಡ ರಚಿಸಿ ಆಗಸ್ಟ್​ ತಿಂಗಳಲ್ಲಿ ನಾಟಕ ಪ್ರದರ್ಶನ ನಡೆಸಲಾಗುವುದು ಎಂದು ಸಂಸ್ಥೆಯ ನಿರ್ದೇಶಕ ವೆಂಕಟರಮಣ ಆರ್​. ಐತಾಳ್​ ಮಾಹಿತಿ ನೀಡಿದರು.

ಉಡುಪಿಯ ಜಿಲ್ಲಾ ಪತ್ರಿಕಾ ಭವನದಲ್ಲಿ ಸೋಮವಾರ (ಜೂ.22) ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಆ.15ರಂದು 'ಜೋಗೇರ ಆಟ' ಕಲೆ ಪ್ರದರ್ಶನ, ಬಿ.ವಿ. ಕಾರಂತ ಅವರ ಜನ್ಮದಿನದ ನಿಮಿತ್ತ ನ.19ರಂದು 'ಕಥಾ ಪ್ರಸ್ತುತಿ' ಕಿರುನಾಟಕ, ನವೆಂಬರ್​ನಲ್ಲಿ ತಾಳಮದ್ದಲೆ ನಡೆಯಲಿದೆ. ಸಕಾಲಿಕವಾಗಿ ರಥಬೀದಿ ಗೆಳೆಯರು ಹಾಗೂ ಶಿವರಾಮ ಕಾರಂತ ಟ್ರಸ್ಟ್​ ಸಹಕಾರದಲ್ಲಿ ವಿವಿಧ ಕಾರ್ಯಕ್ರಮ, ವಿಚಾರ ಸಂಕಿರಣವನ್ನೂ ಆಯೋಜಿಸಲಿದ್ದೇವೆ ಎಂದು ವಿವರಿಸಿದರು.

ಈ ಮೊದಲಿದ್ದ ಯಕ್ಷ ರಂಗಾಯಣ ಕಾರ್ಕಳ ಎಂಬ ಹೆಸರಿನಿಂದಾಗಿ ಸಾಹಿತಿ, ವಿದ್ವಾಂಸ ಹಾಗೂ ಜನಸಾಮಾನ್ಯರಲ್ಲಿ ಇದು ಯಕ್ಷಗಾನಕ್ಕೆ ಸಂಬಂಧಿಸಿದ ರಂಗಾಯಣ ಎಂಬ ಕಲ್ಪನೆಯಿತ್ತು. ಯಕ್ಷಗಾನಕ್ಕಾಗಿಯೇ ಅಕಾಡೆಮಿ, ಇನ್ನಿತರ ಅನೇಕ ಸಂಘಟನೆ ಇರುವಾಗ ಇದರ ಕೆಲಸವೇನು ಎಂಬ ಗೊಂದಲವಿತ್ತು. ಅದನ್ನು ನಿವಾರಿಸಲೆಂದು 1993ರಲ್ಲಿ ಮಾಡಿದ್ದ ರಂಗಾಯಣದ ಬೈಲಾದಲ್ಲಿ 'ಕರಾವಳಿ ರಂಗಾಯಣ' ಎಂಬ ಉಲ್ಲೇಖವೂ ಇತ್ತು. ಅದನ್ನು ಪರಿಗಣಿಸಿ ಸರ್ಕಾರವು 2026ರ ಏ.4ರಂದು  "ಕರಾವಳಿ ರಂಗಾಯಣ ಕಾರ್ಕಳ' ಎಂದು ಹೆಸರು ಬದಲಿಸಿ ಆದೇಶಿಸಿತು. ಕಳೆದ ಜೂ.4ರಂದು ಸಂಸ್ಥೆಯ ಹೆಸರನ್ನು ಬದಲಿಸಲಾಗಿದೆ ಎಂದು ತಿಳಿಸಿದರು. ರಾಜ್ಯದ ಇನ್ನಿತರ ರಂಗಾಯಣಕ್ಕೆ ನೀಡುತ್ತಿರುವ ಅನುದಾನ ಹೆಚ್ಚಿದ್ದು, ತಮಗೂ ಹೆಚ್ಚಿನ ಅನುದಾನ ನೀಡುವಂತೆ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿರುವುದಾಗಿಯೂ ಅವರು ತಿಳಿಸಿದರು.

ಡಾ. ಶಿವರಾಮ ಕಾರಂತ ಟ್ರಸ್ಟ್​ನ ಅಧ್ಯಕ್ಷ ಡಾ. ಗಣನಾಥ ಶೆಟ್ಟಿ ಎಕ್ಕಾರು ಮಾತನಾಡಿ, ಜ್ಞಾನಪೀಠ ಪ್ರಶಸ್ತಿ ಪುರಸತ ಕೋಟ ಶಿವರಾಮ ಕಾರಂತರು ಕೇವಲ ಕರಾವಳಿಗೆ ಮಾತ್ರ ಸೀಮಿತರಲ್ಲ. ಅವರನ್ನು ರಾಜ್ಯವ್ಯಾಪಿ ಪರಿಚಯಿಸುವ ನಿಟ್ಟಿನಲ್ಲಿ ಟ್ರಸ್ಟ್​ ಕಾರ್ಯೋನ್ಮುಖವಾಗಿದೆ. ಹೀಗಾಗಿ ಅಖಿಲ ಕರ್ನಾಟಕ ಮಟ್ಟದಲ್ಲಿ ನಮ್ಮ ಕಾರ್ಯಕ್ರಮ ವಿಸ್ತರಿಸಿದ್ದೇವೆ. ಅರಿವಿನ ಬೆಳಕು ವಿಚಾರ ಸಂಕಿರಣ, ಕಾರಂತರ ಬದುಕು-ಬರಹ ಉಪನ್ಯಾಸ, ಶಾಲಾ ಮಕ್ಕಳಿಗೆ ಕಾರಂತರನ್ನು ಪರಿಚಯಿಸಲು ರಂಗೋಲಿಯಲ್ಲಿ ಕಾರಂತರು, ವಿವಿಧ ಸ್ಪರ್ಧೆ, ಕಾರಂತರು ಹೊಂದಿದ್ದ ವೈಜ್ಞಾನಿಕ ಹಾಗೂ ವೈಚಾರಿಕ ಚಿಂತನೆಯನ್ನು ತಿಳಿಸುತ್ತಿದ್ದೇವೆ. ನಾಟಕದ ಮೂಲಕ ಕಾರಂತರ ವ್ಯಕ್ತಿತ್ವ, ಸಾಹಿತ್ಯ, ಕಾದಂಬರಿಗಳನ್ನು ಜನಮಾನಸಕ್ಕೆ ತಲುಪಿಸುತ್ತಿದ್ದೇವೆ ಎಂದರು.

ಕಾರಂತರ ಹೆಸರಿನಲ್ಲಿ ರಾಜ್ಯ ಪ್ರಸ್ತಿಯೂ ಸೇರಿದಂತೆ ಕಳೆದ ಒಂದೂವರೆ ವರ್ಷದಲ್ಲಿ 54 ಕಾರ್ಯಕ್ರಮ ಮಾಡಿದ್ದೇವೆ. 2026ರ ಅಕ್ಟೊಬರ್​ 10ರಂದು ಕಾರಂತರ 125ನೇ ಜನ್ಮದಿನಾಚರಣೆಯನ್ನು ವೈವಿಧ್ಯಮಯವಾಗಿ ಆಚರಿಸಲು ನಿರ್ಧರಿಸಲಾಗಿದೆ. ಉಡುಪಿಯನ್ನೇ ಕೇಂದ್ರವಾಗಿಟ್ಟುಕೊಂಡು ಕಾರಂತರ ನೆನಪು ಚಿರಸ್ಥಾಯಿಯಾಗಿಸಲು ಅವರ ಎಲ್ಲ ಕೃತಿಗಳ ಸಂಗ್ರಹ ಮತ್ತು ಅವರ ಕುರಿತಾದ ಬರವಣಿಗೆಯ ಸಂಗ್ರಹಾಲಯ ನಿರ್ಮಿಸಲು ಯೋಜಿಸಲಾಗಿದೆ ಎಂದು ಗಣನಾಥ ಶೆಟ್ಟಿ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಜಿಲ್ಲಾ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ನಿರ್ದೇಶಕಿ ಹಾಗೂ ಕಾರಂತ ಟ್ರಸ್ಟ್​ನ ಸದಸ್ಯ ಕಾರ್ಯದರ್ಶಿ ಪೂರ್ಣಿಮಾ ಉಪಸ್ಥಿತರಿದ್ದರು.