ಪತ್ರಕರ್ತರಿಗೆ ಅಗತ್ಯ ಸಾಮಾಜಿಕ ಕಳಕಳಿ

ಉಡುಪಿ: ಪತ್ರಕರ್ತರಾದವರು ಪಕ್ಷಾತೀತವಾಗಿ, ದ್ವೇಷ ಭಾವ ಇಟ್ಟುಕೊಳ್ಳದೆ ಕಾರ್ಯನಿರ್ವಹಿಸಬೇಕು. ವರದಿಗಾರಿಕೆಯ ಜವಾಬ್ದಾರಿಯೊಂದಿಗೆ ಸಾಮಾಜಿಕ ಕಳಕಳಿ ಮೈಗೂಡಿಸಿಕೊಳ್ಳಬೇಕು. ಸಾಮಾಜಿಕ ಜಾಲತಾಣಗಳ ಭರಾಟೆ ನಡುವೆಯೂ ದಾಖಲೆಯುಕ್ತ ಪ್ರಬುದ್ಧ ವರದಿಗಾರಿಕೆ ಮೂಲಕ ಪತ್ರಿಕೋದ್ಯಮವು ತನ್ನ ಮಹತ್ವ ಉಳಿಸಿಕೊಳ್ಳಲು ಸಾಧ್ಯವಿದೆ ಎಂದು ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಸುಬ್ರಹ್ಮಣ್ಯ ಜಿ. ಕುರ್ಯ ಅನಿಸಿಕೆ ವ್ಯಕ್ತಪಡಿಸಿದರು.

ಉಡುಪಿ ಬ್ಲಾಕ್​ ಕಾಂಗ್ರೆಸ್​ ಸಮಿತಿಯ ಅಧ್ಯಕ್ಷ ರಮೇಶ್​ ಕಾಂಚನ್​ ನೇತೃತ್ವದಲ್ಲಿ ಬುಧವಾರ (ಜು.1) ಆಯೋಜಿಸಿದ್ದ ರಾಷ್ಟ್ರೀಯ ವೈದ್ಯರ ದಿನ, ಲೆಕ್ಕ ಪರಿಶೋಧಕರ ದಿನ, ಪತ್ರಿಕಾ ದಿನ ಹಾಗೂ ಅಂಚೆ ಕಾರ್ಮಿಕರ ದಿನ ಕಾರ್ಯಕ್ರಮದಲ್ಲಿ ಸನ್ಮಾನ ಸ್ವೀಕರಿಸಿ ಮಾತನಾಡಿದರು.

ರಮೇಶ್​ ಕಾಂಚನ್​ ಮಾತನಾಡಿ, ನಾಲ್ಕು ಪ್ರಮುಖ ವೃತ್ತಿಯ ವಿಶೇಷ ಹಾಗೂ ಅಂತಾರಾಷ್ಟ್ರೀಯ ದಿನದ ನಿಮಿತ್ತ ಹಾಗೂ ಸಮಾಜಕ್ಕೆ ಈ ಸಾಧಕರ ಕೊಡುಗೆ ಸ್ಮರಿಸಿ ಗೌರವಿಸುತ್ತಿದ್ದೇವೆ. ಇದೂ ಸಹ ನಮ್ಮ ಕರ್ತವ್ಯವೇ ಆಗಿದೆ ಎಂದರು.