ಕಾಲಿನ ಮೂಳೆ ಕ್ಯಾನ್ಸರ್ನಿಂದ ಬಳಲುತ್ತಿದ್ದ ರೋಗಿಗೆ 'ಲಿಂಬ್ ಸಾಲ್ವೇಜ್' ಶಸ್ತ್ರಚಿಕಿತ್ಸೆ ಮೂಲಕ ಗುಣಪಡಿಸಿದ ಆದರ್ಶ ಆಸ್ಪತ್ರೆಯ ವೈದ್ಯರಾದ ಡಾ. ಜಿ.ಎಸ್. ಚಂದ್ರಶೇಖರ್, ಡಾ. ಅನಂತ್ ಎಸ್. ಮಠದ್, ಡಾ. ನವನೀತ್, ಡಾ. ಸುಖೇನ್ ಶೆಟ್ಟಿ ಹಾಗೂ ನರ್ಸಿಂಗ್ ಸಿಬ್ಬಂದಿ.
* ಉಡುಪಿಯ ಆದರ್ಶ ಆಸ್ಪತ್ರೆ ವೈದ್ಯರ ಸಾಧನೆ
* ಯಶಸ್ವಿಯಾದ 'ಲಿಂಬ್ ಸಾಲ್ವೇಜ್' ಶಸ್ತ್ರಚಿಕಿತ್ಸೆ
ಉಡುಪಿ: ಕ್ಯಾನ್ಸರ್ ಹೆಸರು ಕೇಳಿದರೆ ಜನರ ಎದೆಯಲ್ಲಿ ನಡುಕ ಹುಟ್ಟುತ್ತದೆ. ಅದರಲ್ಲೂ ಕೈ-ಕಾಲುಗಳ ಮೂಳೆ ಅಥವಾ ಮಾಂಸ ಖಂಡಗಳಲ್ಲಿ ಉಂಟಾಗುವ ಕ್ಯಾನ್ಸರ್ ಗಡ್ದೆಗಳು ಅಂಗವೈಕಲ್ಯತೆಗೂ ಕಾರಣವಾಗುತ್ತವೆ. ಈ ಬಗೆಯ ರೋಗಕ್ಕೆ ತುತ್ತಾಗಿದ್ದ ಯುವಕರಿಬ್ಬರು ಮರುಜೀವ ಪಡೆದ ಯಶೋಗಾಥೆಯಿದು.
ಉಡುಪಿಯ ಆದರ್ಶ ಆಸ್ಪತ್ರೆಯ ವೈದ್ಯರ ತಂಡವು ಯುವಕರಿಬ್ಬರ ಕಾಲಿನಲ್ಲಿ ಉಂಟಾಗಿದ್ದ ಕ್ಯಾನ್ಸರ್ ಗಡ್ಡೆಯನ್ನು ಅತ್ಯಂತ ಸಂಕೀರ್ಣವಾದ ಎರಡು ಪ್ರಮುಖ 'ಲಿಂಬ್ ಸಾಲ್ವೇಜ್' (ಕಾಲನ್ನು ಉಳಿಸುವ) ಶಸ್ತ್ರಚಿಕಿತ್ಸೆಯನ್ನು ಯಶಸ್ವಿಯಾಗಿ ನಡೆಸಿದ್ದಾರೆ.
ಪ್ರಥಮ ಪ್ರಕರಣ
ಮೊದಲ ಪ್ರಕರಣದಲ್ಲಿ 31 ವರ್ಷದ ಯುವಕನೊಬ್ಬ 'ರೈಟ್ ಡಿಸ್ಟಲ್ ಫೀಮರ್ ಕೊಂಡ್ರೊಸಾರ್ಕೋಮಾ' ಎಂಬ ಮೂಳೆಯ ತೀವ್ರ ಕ್ಯಾನ್ಸರ್ಗೆ ತುತ್ತಾಗಿದ್ದನು. ಆತನ ಮೊಣಕಾಲಿನ ಮೇಲ್ಭಾಗದ ಮೂಳೆಗೆ ಕ್ಯಾನ್ಸರ್ ಆವರಿಸಿತ್ತು. ವೈದ್ಯರು ಕಾಲನ್ನು ತೆಗೆಯುವ ಸುಲಭ ಹಾದಿ ಹಿಡಿಯದೆ ಸವಾಲು ಸ್ವೀಕರಿಸಿದರು. ಕ್ಯಾನ್ಸರ್ ಪೀಡಿತ ಮೂಳೆಯ ಭಾಗ ತೆರವುಗೊಳಿಸಿ, ಆ ಜಾಗದಲ್ಲಿ ಕೃತಕ ಟೈಟಾನಿಯಂ ಜಾಯಿಂಟ್ ಅಳವಡಿಸಿದರು.
ಎರಡನೇ ಪ್ರಕರಣ
ಎರಡನೇ ಪ್ರಕರಣವು ವೈದ್ಯಕೀಯವಾಗಿ ಮತ್ತಷ್ಟು ಕ್ಲಿಷ್ಟಕರವಾಗಿತ್ತು. ರೋಗಿಯ ಬಲ ತೊಡೆಯಲ್ಲಿ 'ಲಿಪೊಸಾರ್ಕೋಮಾ' ಎಂಬ ಬೃಹತ್ ಕ್ಯಾನ್ಸರ್ ಗಡ್ಡೆಯಿತ್ತು. ಅದು ಕಾಲಿನ ಮುಖ್ಯ ರಕ್ತನಾಳ ಮತ್ತು ಪ್ರಮುಖ ನರವನ್ನು ಸಂಪೂರ್ಣವಾಗಿ ಆವರಿಸಿಕೊಂಡಿತ್ತು. ರೋಗಿಯ ಕಾಲು ಶಾಶ್ವತವಾಗಿ ಪಾರ್ಶ್ವವಾಯುವಿಗೆ ಈಡಾಗುವ ಅಪಾಯವಿತ್ತು. ವೈದ್ಯರು ರಕ್ತನಾಳ ಹಾಗೂ ನರಗಳಿಗೆ ಯಾವುದೇ ಹಾನಿಯಾಗದಂತೆ ಆ ಕ್ಯಾನ್ಸರ್ ಗಡ್ಡೆಯನ್ನು ಯಶಸ್ವಿಯಾಗಿ ಬೇರ್ಪಡಿಸಿ ಹೊರತೆಗೆದರು.
ಶಸ್ತ್ರಚಿಕಿತ್ಸೆಯಲ್ಲಿ ಸರ್ಜಿಕಲ್ ಅಂಕಾಲಜಿಸ್ಟ್ ಡಾ. ಅನಂತ್ ಎಸ್. ಮಠದ್ ನೇತೃತ್ವದಲ್ಲಿ ಆಥೋರ್ ಅಂಕಾಲಜಿಸ್ಟ್ ಡಾ. ನವನೀತ್, ಅರಿವಳಿಕೆ ತಜ್ಞ ಡಾ. ಸುಖೇನ್ ಶೆಟ್ಟಿ ಮತ್ತು ಆಸ್ಪತ್ರೆಯ ನರ್ಸಿಂಗ್ ತಂಡ ಪಾಲ್ಗೊಂಡಿತ್ತು.
ಅತ್ಯಂತ ಕಠಿಣ ವೈದ್ಯಕೀಯ ಪ್ರಕ್ರಿಯೆ
ಸರ್ಜಿಕಲ್ ಅಂಕಾಲಜಿ ಕ್ಷೇತ್ರದಲ್ಲಿ 'ಲಿಂಬ್ ಸಾಲ್ವೇಜ್' ಶಸ್ತ್ರ ಚಿಕಿತ್ಸೆಯು ಅತ್ಯಂತ ಕಠಿಣ ಪ್ರಕ್ರಿಯೆಯಾಗಿದೆ. ಹಿಂದೆಲ್ಲ ಇಂತಹ ಪ್ರಕರಣಗಳಲ್ಲಿ ಕಾಲನ್ನು ತೆಗೆಯುವುದೇ ಏಕೈಕ ಮಾರ್ಗವಾಗಿತ್ತು. ಆದರೆ, ಇಂದಿನ ಆಧುನಿಕ ತಂತ್ರಜ್ಞಾನದಿಂದ ವೈದ್ಯರಿಗೆ ಕ್ಯಾನ್ಸರ್ ನಿಮೂರ್ಲನೆ ಮಾಡುವುದರ ಜೂತೆಗೆ ರೋಗಿಯ ಸ್ವಾವಲಂಬನೆ ಕಾಪಾಡಬಹುದು. ಕುಟುಂಬವನ್ನು ಸಲಹುವ ಯುವಕನೊಬ್ಬ ಕಾಲು ಕಳೆದುಕೊಂಡರೆ ಇಡೀ ಕುಟುಂಬವೇ ಸಾಮಾಜಿಕವಾಗಿ ಕುಸಿದುಹೋಗುತ್ತದೆ. ರೋಗಿ ತನ್ನದೇ ಕಾಲಿನಿಂದ ನಡೆದುಕೊಂಡು ಹೋಗುವುದು ನಿಜವಾದ ಗೆಲುವು ಎಂದು ಸರ್ಜಿಕಲ್ ಅಂಕಾಲಜಿಸ್ಟ್ ಡಾ. ಅನಂತ್ ಎಸ್. ಮಠದ್ ವಿವರಿಸಿದ್ದಾರೆ.
ಈ ಸಾಧನೆಯು ಉಡುಪಿಯ ವೈದ್ಯಕೀಯ ಇತಿಹಾಸದಲ್ಲಿ ಹಾಗೂ ಕರಾವಳಿ ಭಾಗದ ಸುಧಾರಿತ ಸರ್ಜಿಕಲ್ ಅಂಕಾಲಜಿ ಕ್ಷೇತ್ರದಲ್ಲಿ ಪ್ರಮುಖ ಮೈಲಿಗಲ್ಲು. ಶಸ್ತ್ರಚಿಕಿತ್ಸೆಯ ಮೂಲಕ ಕ್ಯಾನ್ಸರ್ ಗಡ್ಡೆಗಳನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡಿ ಯುವಕರಿಬ್ಬರನ್ನು ಅಂಗವೈಕಲ್ಯದ ಭೀತಿಯಿಂದ ಪಾರುಮಾಡಲಾಗಿದೆ. ಕ್ಯಾನ್ಸರ್ ಎಂದರೆ ಬದುಕಿನ ಅಂತ್ಯವಲ್ಲ. ಆರಂಭಿಕ ಹಂತದಲ್ಲೇ ಪತ್ತೆ ಹಚ್ಚಿದರೆ ಅತ್ಯಾಧುನಿಕ ವೈದ್ಯಕೀಯ ತಂತ್ರಜ್ಞಾನದಿಂದ ರೋಗಿಯ ಜೀವ ಮತ್ತು ಜೀವನ ಎರಡನ್ನೂ ಉಳಿಸಬಹುದು.
— ಡಾ. ಜಿ.ಎಸ್. ಚಂದ್ರಶೇಖರ್. ಆದರ್ಶ ಆಸ್ಪತ್ರೆಯ ವೈದ್ಯಕೀಯ ನಿರ್ದೇಶಕ.