ಉಡುಪಿ: ಚಿತ್ರಕಲೆಯು ಎಲ್ಲ ಕ್ಷೇತ್ರಗಳನ್ನೂ ಒಳಗೊಂಡ ಏಕೈಕ ಕಲೆಯಾಗಿದೆ. ಆದರೆ, ಈ ಕಲೆಯಲ್ಲಿ ಸೌಂದರ್ಯ ಪ್ರಜ್ಞೆ ಅತ್ಯಗತ್ಯ. ಕಲಾವಿದನಷ್ಟೇ ಪ್ರೇಕ್ಷಕರಿಗೂ ಸಹ ಚಿತ್ರಕಲೆಗಳ ಪ್ರಮಾಣಗಳ ಬಗ್ಗೆ ತಿಳಿದಿರಬೇಕಿದೆ. ಚಿತ್ರಕಲೆಯಲ್ಲಿಯೂ ಸಹ ಸನಾತನ ಧರ್ಮದ ಬಲವಾದಶಕ್ತಿ ಇದೆ. ಆದರೆ, ಈ ಕಲೆಗೆ ಯಾವುದೇ ಧರ್ಮ ಅಥವಾ ಭಾಷೆಯ ಚೌಕಟ್ಟು ಇಲ್ಲ ಎಂದು ಚಿತ್ರಕಲಾ ಅಕಾಡೆಮಿಯ ಮಾಜಿ ಸದಸ್ಯ ಹಾಗೂ ವೈದ್ಯಕೀಯ ಚಿತ್ರಗಳ ಖ್ಯಾತ ಹಿರಿಯ ಕಲಾವಿದ ಪಿ.ಎನ್​. ಆಚಾರ್ಯ ಅನಿಸಿಕೆ ವ್ಯಕ್ತಪಡಿಸಿದರು.

ಉಡುಪಿಯ ಸರ್ವೀಸ್​ ಬಸ್​ ನಿಲ್ದಾಣ ಮುಂಭಾಗದಲ್ಲಿರುವ ಚಿತ್ರಕಲಾ ಮಂದಿರದ ವಿಭೂತಿ ಆರ್ಟ್​ ಗ್ಯಾಲರಿಯಲ್ಲಿ ಶನಿವಾರ (ಮಾ.14) ಆಯೋಜಿಸಿದ್ದ ಹಿರಿಯ ಕಲಾವಿದ ಎಂ.ಪ್ರಭಾಕರ್​ ಕಿಣಿ, ಯು. ಶಕುಂತಲಾ ಆರ್​. ಶೆಣೈ ಹಾಗೂ ಯುವ ಕಾವಿ ಕಲಾವಿದ ರವಿ ಹಿರೇಬೆಟ್ಟು ಅವರ ಚಿತ್ರಕಲೆಗಳ ಎರಡು ದಿನದ ಪ್ರದರ್ಶನ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಕಾರ್ಯಕ್ರಮ ಉದ್ಘಾಟಿಸಿದ ಕಾರ್ಕಳ ತಾಲೂಕಿನ ಬೈಲೂರಿನ ಹೊಸಬೆಳಕು ಆಶ್ರಮದ ಸಂಸ್ಥಾಪಕಿ ತನುಲಾ ತರುಣ್​ ಮಾತನಾಡಿ, ವಿಶೇಷವಾಗಿರುವ ಇಂತಹ ಚಿತ್ರಕಲೆಗಳನ್ನು ರಚಿಸಲು ನಮಗೆ ಬರುವುದಿಲ್ಲ. ಹೀಗಾಗಿ ಚಿತ್ರಕಲಾವಿದರಿಗೆ ನಾವು ಪ್ರೋತ್ಸಾಹ ಹಾಗೂ ಅವಕಾಶ ನೀಡಬೇಕು. ವಿಶೇಷವಾಗಿ ಮಕ್ಕಳನ್ನು ಇಂತಹ ಪ್ರದರ್ಶನಗಳಿಗೆ ಕರೆತರಬೇಕು. ಮಕ್ಕಳು ಚಿತ್ರಕಲೆಗಳಲ್ಲಿ ತೊಡಗಿಕೊಳ್ಳುವಂತಾಗಬೇಕು ಎಂದರು.

ಕಾರ್ಯಕ್ರಮದ ನಿಮಿತ್ತ ಹಿರಿಯ ಕಲಾವಿದರಾದ ವೆಂಕಟರಮಣ ಭಟ್​, ಪಿ.ಎನ್​. ಆಚಾರ್ಯ ಅವರನ್ನು ಸನ್ಮಾನಿಸಲಾಯಿತು. ಖ್ಯಾತ ಉರಗತಜ್ಞ ಗುರುರಾಜ್​ ಸನೀಲ್​ ಮಾತನಾಡಿ, ಚಿತ್ರಕಲೆಯ ವಿಶೇಷತೆ ಕುರಿತು ತಮ್ಮ ಅನಿಸಿಕೆ ವ್ಯಕ್ತಪಡಿಸಿದರು. 

ಚಿತ್ರಕಲಾ ಮಂದಿರದ ನಿರ್ದೇಶಕ ಡಾ. ಯು.ಸಿ. ನಿರಂಜನ್​ ಅಧ್ಯಕ್ಷತೆ ವಹಿಸಿದ್ದರು. ಎಂ.ಪ್ರಭಾಕರ್​ ಕಿಣಿ ಉಪಸ್ಥಿತರಿದ್ದರು. ಯು. ಶಕುಂತಲಾ ಆರ್​. ಶೆಣೈ ಕಾರ್ಯಕ್ರಮ ನಿರೂಪಿಸಿದರು. ರವಿ ಹಿರೇಬೆಟ್ಟು ವಂದಿಸಿದರು. 

ಅಕ್ರಾಲಿಕ್​, ಉಬ್ಬುಕಲೆ ಹಾಗೂ ವಿವಿಧ ಪ್ರಕಾರಗಳ 140ಕ್ಕೂ ಅಧಿಕ ಚಿತ್ರಕಲೆಗಳನ್ನು ಪ್ರದರ್ಶನದಲ್ಲಿ ಇಡಲಾಗಿದ್ದು, ಭಾನುವಾರ (ಮಾ.15) ಬೆಳಗ್ಗೆ 10ರಿಂದ ಸಂಜೆ 6ರ ವರೆಗೆ ವೀಕ್ಷಿಸಬಹುದಾಗಿದೆ.