ಕೊಲೆ ಬೆದರಿಕೆ ಆರೋಪ, ಮೂವರು ಬಂಧನ

ಉಡುಪಿ: ಸರ್ಕಾರದ ಅಕ್ಕಿಚೀಲಗಳನ್ನು ಮನೆಯ ಅಂಗಳದಲ್ಲಿ ಇಟ್ಟಿರುವುದಕ್ಕೆ ಅವಾಚ್ಯ ಶಬ್ದಗಳಿಂದ ಬೈದು, ಸುಲಿಗೆಗಾಗಿ ಕೊಲೆ ಬೆದರಿಕೆ ಹಾಕಿದ್ದ ಪ್ರಕರಣಕ್ಕೆ ಸಂಬಂಧಿಸಿ ಪೊಲೀಸರು ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಬ್ರಹ್ಮಾವರ ತಾಲೂಕಿನ ಕೋಟತಟ್ಟು ಗ್ರಾಮದ ಗೊಬ್ಬರಬೆಟ್ಟುವಿನ ನಾಗೇಂದ್ರ ಪುತ್ರನ್​ (37),  ಪಾರಂಪಳ್ಳಿ ಗ್ರಾಮದ ಪಡುಕೆರೆಯ ಪಿ. ಸುಮಂತ್​ ಕುಂದರ್​ (40), ಸಾಸ್ತಾನದ ಮೂಡುಹಡು ಗ್ರಾಮದ ಸಚಿನ್​ ಶ್ರೀಯಾನ್​ (32) ಬಂಧಿತ ಆರೋಪಿಗಳು.

ಆ.31ರಂದು ಸರ್ಕಾರಿ ಅಕ್ಕಿ ಚೀಲದ ವಿಚಾರವಾಗಿ ಪ್ರಸ್ತುತ ಬಂಧಿತರು ಕೊಲೆ ಬೆದರಿಕೆ ಹಾಕಿರುವ ಕುರಿತಾಗಿ ಕೋಟ ಪೊಲೀಸ್​ ಠಾಣೆಯಲ್ಲಿ ಗುಜರಿ ವ್ಯಾಪಾರಿ ಸಾಸ್ತಾನದ ಗುಂಡ್ಮಿ ನಿವಾಸಿ ಪಿ.ಮಹಮ್ಮದ್​ ಎಂಬವರು ದೂರು ನೀಡಿದ್ದು, ಪ್ರಕರಣ ದಾಖಲಾಗಿತ್ತು.

ಆರೋಪಿಗಳ ಪತ್ತೆಗೆ ಉಡುಪಿ ಉಪ ವಿಭಾಗದ ಪೊಲೀಸ್​ ಉಪಾಧೀಕ್ಷಕ ಬೆಳ್ಳಿಯಪ್ಪ ಕೆ.ಯು. ಹಾಗೂ ಬ್ರಹ್ಮಾವರ ಸಿಪಿಐ ಗೋಪಿಕೃಷ್ಣ ಮಾರ್ಗದರ್ಶನದಲ್ಲಿ ಕೋಟ ಠಾಣೆಯ ಪಿಎಸ್​ಐಗಳಾದ ಪ್ರವೀಣಕುಮಾರ್​ ಆರ್​., ಮಹಾಂತೇಶ ಜಾಬಗೌಡ, ಸಿಬ್ಬಂದಿ ವಿಜಯೇಂದ್ರ, ಶರತ್​ ಹಾಗೂ ಶಿವರಾಜ್​ ಅವರ ತಂಡ ರಚಿಸಲಾಗಿತ್ತು. 

ಆರೋಪಗಳಾದ ನಾಗೇಂದ್ರ ಪುತ್ರನ್​ ಹಾಗೂ ಪಿ. ಸುಮಂತ್​ ಕುಂದರ್​ ಅವರನ್ನು ಮೈಸೂರು ಜಿಲ್ಲೆಯ ಮೈಸೂರು ಪ್ಯಾಲೇಸ್​ ಎದುರಿನ ವಸ್ತು ಪ್ರದರ್ಶನ ಗ್ರೌಂಡ್​ನಲ್ಲಿ ಆ.2ರಂದು ಹಾಗೂ ಇನ್ನೋರ್ವ ಆರೋಪಿ ಸಚಿನ್​ ಶ್ರೀಯಾನ್​ನನ್ನು ಆ.1ರಂದು ಬಂಧಿಸಿ, ನ್ಯಾಯಾಲಯಕ್ಕೆ  ಹಾಜರುಪಡಿಸಲಾಗಿದೆ ಎಂದು ಜಿಲ್ಲಾ ಪೊಲೀಸ್​ ವರಿಷ್ಠ ಹರಿರಾಮ್​ ಶಂಕರ್​ ತಿಳಿಸಿದ್ದಾರೆ.