ಯುವಕರಿಗೆ ಸ್ಫೂರ್ತಿಯಾದ 66ರ ದೇಹದಾರ್ಢ್ಯ ಪಟು

ಬಾಬು ಪೂಜಾರಿ ಮೂಲತ@ ಕುಂದಾಪುರದ ಆನಗಳ್ಳಿಯವರು. ಹೊಟೇಲ್​ ನಿಮಾರ್ಣ ಹಂತದಲ್ಲಿ ಕಾರ್ಮಿಕರಾಗಿ ಕೆಲಸ ಮಾಡಿದ ಅವರು ಬಾಲ್ಯದಿಂದಲೂ ಹಿಂದಿ ಸಿನಿಮಾಗಳನ್ನು ನೋಡಿ ದೇಹದಾರ್ಢ್ಯದ ಬಗ್ಗೆ ಆಸಕ್ತಿ ಹೊಂದಿದ್ದರು. ಹೊಟ್ಟೆಪಾಡಿಗಾಗಿ ಮುಂಬೈಗೆ ತೆರಳಿ ರಾತ್ರಿ ಶಾಲೆಯಲ್ಲಿ ಓದಿದರು. ಪಾರ್ಕ್​ಗಳಲ್ಲಿ ವರ್ಕ್​ಔಟ್​ ಮಾಡಿ ದೇಹವನ್ನು ಹುರಿಗೊಳಿಸಿ, ಮುಂಬೈ ನಗರದ ಬಾಡಿಬಿಲ್ಡರ್​ ಆಗಿ ರೂಪುಗೊಂಡರು. ಸ್ಪರ್ಧೆಗಳಲ್ಲಿ ಭಾಗವಹಿಸಿ ಅಮೆಚೂರ್​ ಬಾಡಿ ಬಿಲ್ಡರ್​, ಭಾರತ್​ ಕುವಾರ್​, ಮುಂಬೈಶ್ರೀ, ಮಹಾರಾಷ್ಟ್ರ ಶ್ರೀ, ಭಾರತಶ್ರೇಷ್ಟ, ಪಶ್ಚಿಮ ಭಾರತಶ್ರೀ ಸೇರಿದಂತೆ ಹತ್ತಾರು ರಾಜ್ಯ ಹಾಗೂ ರಾಷ್ಟ್ರಮಟ್ಟದ ದೇಹದಾರ್ಢ್ಯ ಸ್ಪರ್ಧೆಯ ವಿನ್ನರ್​ ಆಗಿ ಮೂಡಿಬಂದಿದ್ದರು.

1990ರಲ್ಲಿ ಭಾರತೀಯ ನೌಕಸೇನಾ ಜವಾನರಾಗಿ ದೇಶ ಸೇವೆಗೆ ದುಡಿದ ಇವರು ನಾಲ್ಕಕ್ಕೂ ಹೆಚ್ಚು ಬಾರಿ ಮಿಸ್ಟರ್​ ಇಂಡಿಯಾ ಪ್ರಶಸ್ತಿ ಪಡೆದಿದ್ದಾರೆ. ಭಾರತೀಯ ನೌಕಪಡೆಯಲ್ಲಿ 15 ವರ್ಷ ಸೇವೆ ಸಲ್ಲಿಸಿ ಚೀಪ್​ ಪೆಟ್ಟಿ ಆಫಿಸರ್​ ಆಗಿ ನಿವೃತ್ತಿ ಹೊಂದಿದ್ದಾರೆ. ಸತತ 15 ವರ್ಷ ಮಿಸ್ಟರ್​ ಸರ್ವಿಸಸ್​ ಪ್ರಶಸ್ತಿ ಅವರ ಸಾಧನೆಗೆ ಕೈಗನ್ನಡಿಯಾಗಿದೆ. 2005ರಲ್ಲಿ ಸೇವಾ ನಿವೃತ್ತಿಯಾದ ಬಳಿಕ ಹುಟ್ಟೂರಿಗೆ ಮರಳಿದ ಅವರು ಶಿರೂರಿನಲ್ಲಿ ವ್ಯಾಯಾಮ ಶಾಲೆ ಆರಂಭಿಸಿ, ಪ್ರಸ್ತುತ ಉಪ್ಪುಂದದಲ್ಲಿ ಗೋಲ್ಡನ್​ ಜಿಮ್​ ಮೂಲಕ ನೂರಾರು ಯುವಕರಿಗೆ ದೇಹದಾರ್ಢ್ಯ ತರಬೇತಿ ನೀಡುತಿದ್ದಾರೆ.