ಉಡುಪಿ: ಪೊಲೀಸ್​ ವೃತ್ತಿಯ ಕರ್ತವ್ಯದಲ್ಲಿ ಶ್ರದ್ಧೆ, ಜನರೊಂದಿಗೆ ಉತ್ತಮ ಸಂಪರ್ಕ, ಜ್ಞಾನ ಗುಣ ಹೊಂದಿರುವುದು ಅಗತ್ಯ. ಎಂತಹ ಒತ್ತಡದ ಸಂದರ್ಭದಲ್ಲಿಯೂ ವೃತ್ತಿಪರತೆ ಮತ್ತು ತಾಳ್ಮೆಯಿಂದ ವರ್ತಿಸಬೇಕು. ಸದಾಕಾಲ ತಮ್ಮ ವೃತ್ತಿಯಲ್ಲಿ ಸಂವಿಧಾನ ಎತ್ತಿ ಹಿಡಿಯುವುದರೊಂದಿಗೆ ಕಾನೂನು ಪಾಲನೆಗೆ ಮೊದಲ ಪ್ರಾಶಸ್ತ್ಯ ನೀಡಬೇಕು ಎಂದು ಪಶ್ಚಿಮ ವಲಯ ಪೊಲೀಸ್​ ಮಹಾ ನಿರೀಕ್ಷಕ ಅಮಿತ್​ ಸಿಂಗ್​ ಕರೆ ನೀಡಿದರು.

ಉಡುಪಿ ನಗರದಲ್ಲಿರುವ ಡಿಎಆರ್​ ಮೈದಾನದಲ್ಲಿ ಉಡುಪಿ ಜಿಲ್ಲಾ ತಾತ್ಕಾಲಿಕ ಪೊಲೀಸ್​ ತರಬೇತಿ ಶಾಲೆ ವತಿಯಿಂದ ಸೋಮವಾರ (ಜು.13) ಆಯೋಜಿಸಿದ್ದ ಸಶಸ್ತ್ರ ಮೀಸಲು ಪೊಲೀಸ್​ ಕಾನ್​ಸ್ಟೇಬಲ್​ಗಳ 14ನೇ ತಂಡದ ನಿರ್ಗಮನ ಪಥಸಂಚಲನದ ಕಾರ್ಯಕ್ರಮದಲ್ಲಿ ಗೌರವ ರಕ್ಷೆ ಸ್ವೀಕರಿಸಿ ಮಾತನಾಡಿದರು.

ತರಬೇತಿ ಶಾಲೆಯ ಪ್ರಾಂಶುಪಾಲ ಸುಧಾಕರ್​ ನಾಯ್ಕ್​ ಮಾತನಾಡಿ, ತರಬೇತಿ ಪಡೆದಿರುವ ಪ್ರಶಿಕ್ಷಣಾರ್ಥಿಗಳಲ್ಲಿ ಮಾಜಿ ಸೈನಿಕರೂ ಸೇರಿದಂತೆ ಉನ್ನತ ಪದವಿ ಹೊಂದಿದವರೂ ಸಹ ಸೇರಿದ್ದಾರೆ. 10 ತಿಂಗಳ ಅವಧಿಯಲ್ಲಿ ಕಾನೂನು, ಕಂಪ್ಯೂಟರ್​, ಮಾನಸಿಕ ಸ್ವಾಸ್ಥ್ಯ ಹಾಗೂ ಇನ್ನಿತರ ಪ್ರಚಲಿತ ವಿಷಯಗಳನ್ನು ಬೋಧಿಸಲಾಗಿದೆ. ದೈಹಿಕ ಶಿಕ್ಷಣ, ಯೋಗ ಕರಾಟೆ, ಕವಾಯತು ಹಾಗೂ ವಿವಿಧ ಶಸ್ತ್ರ ತರಬೇತಿಯನ್ನೂ ನೀಡಲಾಗಿದೆ ಎಂದು ಮಾಹಿತಿ ನೀಡಿದರು.