ಉಡುಪಿ: ಕುಡಿತದ ಮತ್ತಿನಲ್ಲಿ ತಮ್ಮದೆ ಮಗುವನ್ನು ಹಿಂಸಾತ್ಮಕವಾಗಿ ಎಳೆದಾಡುತ್ತಿದ್ದ ದಂಪತಿ ವಶದಿಂದ ಐದು ದಿನದ ಶಿಶುವನ್ನು ಸಮಯಪ್ರಜ್ಞೆಯಿಂದ ಸಮಾಜ ಸೇವಕ ನಿತ್ಯಾನಂದ ಒಳಕಾಡು ರಕ್ಷಿಸಿದ್ದಾರೆ. 

ಇಂದ್ರಾಳಿ ರೈಲು ನಿಲ್ದಾಣ ಸಂಪರ್ಕಿಸುವ ಜಾರ್ಜ್​ ಫರ್ನಾಂಡಿಸ್​ ರಸ್ತೆ ಮಾರ್ಗದ ಬಳಿ ದಂಪತಿ ಹಿಂಸಾತ್ಮಕವಾಗಿ ಮಗುವಿನೊಂದಿಗೆ ವರ್ತಿಸುತ್ತಿದ್ದರು. ಅದನ್ನು ಗಮನಿಸಿದ ಶ್ವೇತಾ ಪೂಜಾರಿ ಎಂಬವರು ನಿತ್ಯಾನಂದ ಒಳಕಾಡು ಗಮನಕ್ಕೆ ತಂದರು. ತಕ್ಷಣ ನೆರವಿಗೆ ಬಂದ ಒಳಕಾಡು, ಮಗು ಮತ್ತು ಬಾಣಂತಿಯನ್ನು ಆಂಬುಲೆನ್ಸ್​ನಲ್ಲಿ ಸಾಗಿಸಿ ಉಡುಪಿಯ ತಾಯಿ ಮಕ್ಕಳ ಆಸ್ಪತ್ರೆಗೆ ತಂದು ಚಿಕಿತ್ಸೆಗೆ ಒಳಪಡಿಸಿದರು.

ನಗರ ಮಹಿಳಾ ಪೊಲೀಸ್​ ಠಾಣೆ, ಸಖಿ ಸೆಂಟರ್​, ಮಕ್ಕಳ ಸಹಾಯವಾಣಿ ಕೇಂದ್ರದ ಸಿಬ್ಬಂದಿ ಆಸ್ಪತ್ರೆಗೆ ಆಗಮಿಸಿ ತಾಯಿ-ಮಗುವಿನ ಆರೋಗ್ಯ ಸ್ಥಿತಿ ವಿಚಾರಿಸಿ, ಕಾನೂನು ಪ್ರಕ್ರಿಯೆ ನಡೆಸಿ, ಉಡುಪಿ ಜಿಲ್ಲಾ ಮಕ್ಕಳ ರಕ್ಷಣಾ ಘಟಕಕ್ಕೆ ಹಸ್ತಾಂತರಿಸಿದರು. ಬಳಿಕ  ದೊಡ್ಡಣಗುಡ್ಡೆಯಲ್ಲಿರುವ ಮಕ್ಕಳ ಕಲ್ಯಾಣ ಸಮಿತಿಯ ಆದೇಶಾನುಸಾರ ಮಗುವನ್ನು ಲಕ್ಷಿ$್ಮನಗರದ ಕೃಷ್ಣಾನುಗ್ರಹ ದತ್ತು ಸ್ವೀಕಾರ ಕೇಂದ್ರಕ್ಕೆ ಒಪ್ಪಿಸಲಾಗಿದೆ. ನಿಟ್ಟೂರಿನ ರಾಜ್ಯ ಮಹಿಳಾ ನಿಲಯದಲ್ಲಿ ಬಾಣಂತಿಗೆ ಪುನರ್ವಸತಿ ಕಲ್ಪಿಸಲಾಗಿದೆ.