ಉಡುಪಿ: ಕೃಷ್ಣ ಮಠದ ರಾಜಾಂಗಣದಲ್ಲಿ 15ರಂದು ಸಾಯಂಕಾಲ 6 ರಿಂದ ಬೆಳಗ್ಗಿನ ಜಾವ 6 ಗಂಟೆವರೆಗೆ ಶಿವರಾತ್ರಿ ಆಚರಣೆ ನಡೆಸಲು ನಿರ್ಧರಿಸಲಾಗಿದೆ ಎಂದು ಪರ್ಯಾಯ ಶೀರೂರು ಮಠಾಧೀಶ ಶ್ರೀ ವೇದವರ್ಧನ ತೀರ್ಥ ಶ್ರೀಪಾದರು ತಿಳಿಸಿದ್ದಾರೆ.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಸಂದರ್ಭದಲ್ಲಿ ನಿರಂತರ ಪೂಜೆ, ಪಾರಾಯಣ, ಉಪನ್ಯಾಸ, ಭಜನೆ ಕಾರ್ಯಕ್ರಮ ನಡೆಯಲಿವೆ. ವಿಶೇಷವಾಗಿ ಮಹಾರುದ್ರದೇವರೇ ತನ್ನ ಪತ್ನಿ ಪಾರ್ವತಿಗೆ ಪ್ರೀತಿಯಿಂದ ತಿಳಿಸಿದಂತೆ ರಾಮಮಂತ್ರ ಜಪ, ವಿಷ್ಣುಸಹಸ್ರನಾಮ ಪಾರಾಯಣ, ಶಿವ ಪಂಚಾಕ್ಷರಿ ಮಂತ್ರ ಜಪವನ್ನು ಹಮ್ಮಿಕೊಳ್ಳಲಾಗಿದೆ ಎಂದು ತಿಳಿಸಿದರು.
ಮಠದ ದಿವಾನ್ ಡಾ. ಉದಯ ಕುಮಾರ ಸರಳತ್ತಾಯ ಮಾತನಾಡಿ, ಸಾಯಂಕಾಲ 5.45ರಿಂದ 6ರವರೆಗೆ ಶಿವ ದೇವರಿಗೆ ಹೂ, ತುಳಸಿ, ಬಿಲ್ವ ಪತ್ರೆಗಳನ್ನು ಅರ್ಪಿಸಿ ಪೂಜಿಸಲಾಗುವುದು. 6 ರಿಂದ 6.30ರವರೆಗೆ ಪರ್ಯಾಯ ಶ್ರೀ ಆಶೀರ್ವಚನ, 6.30ರಿಂದ 7ರವರೆಗೆ ನಿತ್ಯ ಪ್ರವಚನ, 7 ರಿಂದ 9.30ರವರೆಗೆ ಸಾಂಸತಿಕ ಕಾರ್ಯಕ್ರಮ, 10ರವರೆಗೆ ಮತ್ತೆ ಪೂಜೆ, 10ರಿಂದ 11ರವರೆಗೆ ಪ್ರವಚನ, 12.30ರವರೆಗೆ ಪಾರಾಯಣ, 12.30 ರಿಂದ 2.30ರವರೆಗೆ ಭಜನೆ, 4ರವರೆಗೆ ಕುಣಿತ ಭಜನೆ, 4ರಿಂದ 5.30ರವರೆಗೆ ಪಾರಾಯಣ ಮತ್ತು ಪೂಜೆ ಜರಗಲಿದೆ ಎಂದು ತಿಳಿಸಿದರು.