ಉಡುಪಿಯ ತೆಂಕನಿಡಿಯೂರು ಕಾಲೇಜ್​ನಲ್ಲಿ ಆಯೋಜಿಸಿದ್ದ ಉಪನ್ಯಾಸ ಕಾರ್ಯಕ್ರಮದಲ್ಲಿ ಡಾ. ಪಾದೇಕಲ್ಲು ವಿಷ್ಣು ಭಟ್​ ಮಾತನಾಡಿದರು. ಪ್ರೊ. ನಿತ್ಯಾನಂದ ವಿ. ಗಾಂವಕರ, ಡಾ. ಶ್ರೀಧರ ಭಟ್​, ಡಾ. ರು ನಾಯ್ಕ, ಡಾ. ಶ್ರೀದೇವಿ ಕೆ., ಡಾ. ದತ್ತಕುಮಾರ, ಭವ್ಯಾ, ಅರ್ಚನಾ, ಸಂಧ್ಯಾರಾಣಿ, ಮಾರುತಿ ಇದ್ದರು. 
ಉಡುಪಿ

ಮಹಾಭಾರತದ ಕಥೆ ಕಟ್ಟಿಕೊಟ್ಟ ಶಕ್ತಿಕವಿ ರನ್ನ

* ಭಾಷಾ ವಿದ್ವಾಂಸ ಡಾ. ಪಾದೇಕಲ್ಲು ವಿಷ್ಣು ಭಟ್​ ಅನಿಸಿಕೆ

* 'ಗದಾಯುದ್ಧ ಸಂಗ್ರಹಂ-ಭೀಷ್ಮವಚನಂ' ಕುರಿತು ಉಪನ್ಯಾಸ

ಉಡುಪಿ: ಪ್ರಾಚೀನ ಕಾವ್ಯಗಳು ಓದುಗಬ್ಬ ಹಾಗೂ ಪಾಡುಗಬ್ಬಗಳಾಗಿ ನಮ್ಮ ಪರಂಪರೆಯ ಶ್ರೇಷ್ಠತೆ ತಿಳಿಸಿವೆ. ಚಂಪೂ ಕಾವ್ಯಗಳು ಓದುಗಬ್ಬವಾಗಿದ್ದು ರಾಗ&ತಾಳ ಬದ್ಧವಾಗಿ ಹಾಗೂ ಕಬ್ಬವಾಕ್ಯ ನಿಯಮಗಳೊಂದಿಗೆ ಗಮಕ ಕ್ರಮದಲ್ಲಿ ವಾಚಿಸಿದರೆ ಬಲು ಅಂದ. ರನ್ನ ಮಹಾಕವಿಯ 'ಸಾಹಸ ಭೀಮ ವಿಜಯ' ಕೃತಿಯು ಭೀಮ-ಕೌರವರ ಗದಾಯುದ್ಧದ ಕಥೆಯಾಗಿದೆ. ಮಹಾಭಾರತವನ್ನು ಸಿಂಹಾವಲೋಕನ ತಂತ್ರದಿಂದ ಕಣ್ಣಿಗೆ ಕಟ್ಟಿಕೊಟ್ಟ ಶಕ್ತಿಕವಿ ರನ್ನ ಎಂದು ನಿವೃತ್ತ ಪ್ರಾಂಶುಪಾಲ, ತುಳು-ಕನ್ನಡ ಭಾಷಾ ವಿದ್ವಾಂಸ ಡಾ. ಪಾದೇಕಲ್ಲು ವಿಷ್ಣುಭಟ್​ ತಿಳಿಸಿದರು.

ಉಡುಪಿಯ ತೆಂಕನಿಡಿಯೂರು ಸರ್ಕಾರಿ ಪ್ರಥಮ ದರ್ಜೆ ಕಾಲೇಜ್​ ಮತ್ತು ಸ್ನಾತಕೋತ್ತರ ಅಧ್ಯಯನ ಕೇಂದ್ರದಲ್ಲಿ ಕನ್ನಡ ವಿಭಾಗದ ವತಿಯಿಂದ ಆಯೋಜಿಸಿದ್ದ 'ಗದಾಯುದ್ಧ ಸಂಗ್ರಹಂ-ಭೀಷ್ಮವಚನಂ' ವಿಷಯ ಕುರಿತು ವಿಶೇಷ ಉಪನ್ಯಾಸ ನೀಡಿದರು.

ಕಾಲೇಜ್​ನ ಪ್ರಾಂಶುಪಾಲ ನಿತ್ಯಾನಂದ ವಿ. ಗಾಂವಕರ ಮಾತನಾಡಿ, ಪ್ರಾಚೀನ ಕಾವ್ಯಗಳನ್ನು ಅರ್ಥಗರ್ಭಿತವಾಗಿ ತಿಳಿದುಕೊಂಡರೆ ಅಪಾರ ಜ್ಞಾನ ಲಭಿಸುತ್ತದೆ ಎಂದರು.

ಶೈಕ್ಷಣಿಕ ಸಲಹೆಗಾರ ಡಾ. ಶ್ರೀಧರ ಭಟ್​, ಡಾ. ರು ನಾಯ್ಕ, ಡಾ. ಶ್ರೀದೇವಿ ಕೆ., ಡಾ. ದತ್ತಕುಮಾರ, ಉಪನ್ಯಾಸಕರಾದ ಭವ್ಯಾ, ಅರ್ಚನಾ, ಸಂಧ್ಯಾರಾಣಿ ಉಪಸ್ಥಿತರಿದ್ದರು.

ಕನ್ನಡ ವಿಭಾಗದ ಮುಖ್ಯಸ್ಥ ಮಾರುತಿ ಸ್ವಾಗತಿಸಿದರು. ಕನ್ನಡ ಸ್ನಾತಕೋತ್ತರ ವಿಭಾಗದ ಸಂಯೋಜಕಿ ಡಾ. ರತ್ನಮಾಲಾ ವಂದಿಸಿದರು. ಉಪನ್ಯಾಸಕಿ ಸರಿತಾ ಕಾರ್ಯಕ್ರಮ ನಿರೂಪಿಸಿದರು.