ಉಡುಪಿ: ಆಟೋಇಮ್ಯೂನ್ ಕಾಯಿಲೆಗಳ ಚಿಕಿತ್ಸೆಯು ಅತ್ಯಂತ ಸವಾಲಿನದ್ದಾಗಿದೆ. ಈ ಕಾಯಿಲೆಗಳಿಗೆ ಸಂಬಂಧಿಸಿದ ವಿವಿಧ ಆಯಾಮ ಮತ್ತು ದೃಷ್ಟಿಕೋನಗಳನ್ನು 'ಕ್ಷಮತ್ವಂ' ವೇದಿಕೆಯಲ್ಲಿ ಒಗ್ಗೂಡಿಸಿರುವುದು ಶ್ಲಾಘನೀಯ. ಇಂತಹ ಮಹತ್ವದ ವಿಷಯದ ಸಮ್ಮೇಳನ ನಡೆದಿರುವುದು ಅರ್ಥಪೂರ್ಣ ಎಂದು ನವದೆಹಲಿಯ ಆಯುಷ್ ಸಚಿವಾಲಯದ ಅಖಿಲ ಭಾರತ ಆಯುರ್ವೇದ ಸಂಸ್ಥೆ (ಎಐಐಎ)ಯ ನಿರ್ದೇಶಕ ಡಾ. ಪ್ರದೀಪ್ ಕುಮಾರ್ ಪ್ರಜಾಪತಿ ತಿಳಿಸಿದರು.
ಉಡುಪಿಯ ಕುತ್ಪಾಡಿಯಲ್ಲಿರುವ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಆಯುರ್ವೇದ ಕಾಲೇಜ್, ಆಸ್ಪತ್ರೆ ಮತ್ತು ಸಂಶೋಧನಾ ಕೇಂದ್ರದಲ್ಲಿ ಜಾಗತಿಕ ಮಟ್ಟದ ಜ್ಞಾನ, ಸಂಶೋಧನೆ ಹಾಗೂ ವಿವಿಧ ತಜ್ಞರ ಅನುಭವಗಳನ್ನು ಪ್ರತಿಪಾದಿಸುವ 'ಆಟೋಇಮ್ಯೂನ್' ಕಾಯಿಲೆಗಳ ಸಮಗ್ರ ಚರ್ಚೆಯ 'ಕ್ಷಮತ್ವಂ' ಅಂತಾರಾಷ್ಟ್ರೀಯ ಸಮ್ಮೇಳನದ ಸಮಾರೋಪದಲ್ಲಿ ಮಾತನಾಡಿದರು.
ಜ್ಞಾನವಾಗಲಿ ವಿವೇಕ
ಬೆಂಗಳೂರಿನ ರಾಜೀವ್ ಗಾಂಧಿ ಆರೋಗ್ಯ ವಿಜ್ಞಾನಗಳ ವಿಶ್ವವಿದ್ಯಾಲಯ (ಆರ್ಜಿಯುಎಚ್ಎಸ್)ದ ಅಧ್ಯಯನ ಮಂಡಳಿ ಅಧ್ಯಕ್ಷ ಡಾ. ಸಿದ್ದಣ್ಣಗೌಡ ಎ. ಪಾಟೀಲ್ ಮಾತನಾಡಿ, 'ಕ್ಷಮತ್ವಂ'ನಲ್ಲಿ ಲಭಿಸಿದ ಜ್ಞಾನವು ಸಮ್ಮೇಳನದ ಸಭಾಂಗಣಕ್ಕೆ ಸೀಮಿತವಾಗದೆ ಸಮಾಜ ತಲುಪಬೇಕು. ಆ ನಿಟ್ಟಿನಲ್ಲಿ ಎಸ್ಡಿಎಂ ಸಂಸ್ಥೆ ಹೊಸ ದಿಕ್ಕು ತೋರಿಸಿದೆ. ಕಲಿತ ಜ್ಞಾನವನ್ನು ಜೀವನದಲ್ಲಿ ಹಾಗೂ ವೃತ್ತಿಯಲ್ಲಿ ಅನುಷ್ಠಾನಗೊಳಿಸಿದಾಗ ಅದು ವಿವೇಕವಾಗಿ ಪರಿವರ್ತನೆ ಆಗುತ್ತದೆ ಎಂದರು.
ಎಸ್ಡಿಎಂನ ಕ್ಲಿನಿಕಲ್ ವಿಭಾಗದ ಉಪಪ್ರಾಂಶುಪಾಲ ಡಾ. ನಿರಂಜನ್ ರಾವ್, ಸಮ್ಮೇಳನದ ಸಂಘಟನಾ ಕಾರ್ಯದರ್ಶಿ ಪ್ರಸನ್ನ ಎನ್. ಮೊಗಸಾಲೆ ಉಪಸ್ಥಿತರಿದ್ದರು.
'ಕ್ಷಮತ್ವಂ'ನ ಮುಖ್ಯ ಸಂಘಟನಾ ಕಾರ್ಯದರ್ಶಿ ಹಾಗೂ ಎಸ್ಡಿಎಂ ಕಾಲೇಜ್ ಆಫ್ ಆಯುರ್ವೇದ ಮೆಡಿಕಲ್ ಸೈನ್ಸಸ್ ಆ್ಯಂಡ್ ರಿಸರ್ಚ್ ಸೆಂಟರ್ನ ಪ್ರಾಂಶುಪಾಲೆ ಡಾ. ಮಮತಾ ಕೆ.ವಿ. ಅಧ್ಯಕ್ಷತೆ ವಹಿಸಿದ್ದರು.
ಎಸ್ಡಿಎಂನ ಶೈಕ್ಷಣಿಕ ವಿಭಾಗದ ಉಪಪ್ರಾಂಶುಪಾಲ ಡಾ. ನಾಗರಾಜ್ ಎಸ್. ಸ್ವಾಗತಿಸಿದರು. ಡಾ. ಪದ್ಮಕಿರಣ್ ಸಿ. ಅವರು ಸಮ್ಮೇಳನದ ವೈಜ್ಞಾನಿಕ ವರದಿ ಮಂಡಿಸಿದರು. ಡಾ. ಅರುಣಕುಮಾರ್ ಮತ್ತು ಡಾ. ಶುಭಾ ಪಿ.ಯು. ಕಾರ್ಯಕ್ರಮ ನಿರೂಪಿಸಿದರು. ಡಾ. ಅರ್ಹಂತ್ ಕುಮಾರ್ ಎ. ವಂದಿಸಿದರು.
ದೇಶ-ವಿದೇಶಗಳಿಂದ 1,400ಕ್ಕೂ ಅಧಿಕ ಮಂದಿ ನೋಂದಣಿ ಮಾಡಿದ್ದು, 25 ವಿವಿಧ ದೇಶಗಳ ಪ್ರತಿನಿಧಿಗಳು ಪಾಲ್ಗೊಂಡಿದ್ದರು. ಒಟ್ಟು 522 ಸಂಶೋಧನಾ ಸಾರಾಂಶ ಮಂಡನೆಯಾಗಿದ್ದು, 40 ಸಮಾನಾಂತರ ಅಧಿವೇಶನ ನಡೆದವು. ದೇಶದ ವಿವಿಧ ಭಾಗಗಳ 27 ಕಾಲೇಜ್ಗಳ ಪ್ರತಿನಿಧಿಗಳು ಅತ್ಯುತ್ತಮ ಪ್ರಬಂಧಗಳ ಗೌರವಕ್ಕೆ ಪಾತ್ರರಾದರು. ಅತ್ಯುತ್ತಮ ಸಂಶೋಧನಾ ಪ್ರಬಂಧಗಳ ಪ್ರಶಸ್ತಿಗಳನ್ನು ಡಾ. ರಾಕೇಶ್ ಘೋಷಿಸಿದರು. ಸಮ್ಮೇಳನಕ್ಕೂ ಮುನ್ನ ನಡೆದ ಪ್ರಾಯೋಗಿಕ ತರಬೇತಿ ಕಾರ್ಯಕ್ರಮವು ವಿವಿಧ ದೇಶಗಳ ಪ್ರತಿನಿಧಿಗಳಿಗೆ ವಿಶೇಷ ಅನುಭವ ಒದಗಿಸಿದವು.
ಎಸ್ಡಿಎಂ ಈಗ ಕೇವಲ ಒಂದು ಸಂಸ್ಥೆಯಲ್ಲ. ಅದೀಗ ಬ್ರ್ಯಾಂಡ್ ಆಗಿ ರೂಪುಗೊಂಡಿದೆ. ಒಂಬತ್ತು ತಿಂಗಳ ನಿರಂತರ ಯೋಜನೆ, ಪರಿಶ್ರಮ ಮತ್ತು ತಂಡದ ಬದ್ಧತೆಯ ಫಲವಾಗಿ 'ಕ್ಷಮತ್ವಂ' ನಮ್ಮ ಮುಂದೆ ಯಶಸ್ವಿಯಾಗಿ ನಿಂತಿದೆ. ಜಾಗತಿಕ ಮಟ್ಟದ ಅಂಕಿ-ಅಂಶ ಅವಲೋಕಿಸಿದಾಗ ಆಟೋಇಮ್ಯೂನ್ ಕಾಯಿಲೆ ಪ್ರಮಾಣ ಗಮನಾರ್ಹವಾಗಿದ್ದು ಅದಕ್ಕೆ ಈ ಸಮ್ಮೇಳನವು ತಕ್ಕಮಟ್ಟಿಗೆ ಪರಿಹಾರವಾಗಿಯೂ ಕಂಡುಬಂತು.> ಡಾ. ಮಮತಾ ಕೆ.ವಿ. ಎಸ್ಡಿಎಂ ಕಾಲೇಜ್ನ ಪ್ರಾಂಶುಪಾಲೆ.