ಉಡುಪಿ: ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಭಾಷಣ ಮಾಡಿದ್ದ ಜಾಗವನ್ನು ಗಂಗಾಜಲದಿಂದ ಶುದ್ಧೀಕರಿಸಿರುವುದು ಅತ್ಯಂತ ಹೇಯ ಕೃತ್ಯ. ದೇಶದ ಸಂವಿಧಾನ ನೀಡಿದ ಸಮಾನತೆಯ ಮೂಲ ಆಶಯಗಳಿಗೆ ಮಾಡಿದ ಅಪಮಾನವದು. ದಲಿತರು ಈ ದೇಶದ ಮೂಲನಿವಾಸಿಗರಾಗಿದ್ದು ಇನ್ನೂ ಅವರ ಮೇಲೆ ಶೋಷಣೆ, ಅಸ್ಪೃಶ್ಯರಂತೆ ನೋಡುವುದು ಮನುಸ್ಮೃತಿಯ ವೈಭವೀಕರಣವಾಗಿದೆ. ಎಲ್ಲ ವಿಚಾರವನ್ನೂ ಮನ್​ ಕೀ ಬಾತ್​ನಲ್ಲಿ ಹೇಳಿಕೊಳ್ಳುವ ಪ್ರಧಾನಿ ನರೇಂದ್ರ ಮೋದಿ, ಶುದ್ಧೀಕರಣದ ವಿಚಾರಕ್ಕೂ ಉತ್ತರಿಸಬೇಕು. ಉತ್ತರಾಖಂಡ ಬಿಜೆಪಿಯವರ ದುರ್ವರ್ತನೆಗೆ ಪಶ್ಚಾತ್ತಾಪಪಟ್ಟು ದೇಶದ ಜನರಲ್ಲಿ ಕ್ಷಮೆ ಯಾಚಿಸಬೇಕು ಎಂದು ಕಾಂಗ್ರೆಸ್​ ಪ್ರಚಾರ ಸಮಿತಿಯ ರಾಜ್ಯಾಧ್ಯಕ್ಷ ವಿನಯಕುಮಾರ್​ ಸೊರಕೆ ಆಗ್ರಹಿಸಿದರು.

ಉಡುಪಿ ಜಿಲ್ಲಾ ಕಾಂಗ್ರೆಸ್​ ಪ್ರಚಾರ ಸಮಿತಿ ವತಿಯಿಂದ ಉಡುಪಿಯ ಅಜ್ಜರಕಾಡಿನಲ್ಲಿರುವ ರಾಷ್ಟ್ರಪಿತ ಮಹಾತ್ಮ ಗಾಂಧಿ ಮಂಟಪದ ಬಳಿ ಶನಿವಾರ (ಸೆ.12) ಆಯೋಜಿಸಿದ್ದ ಉತ್ತರಾಖಂಡ ಬಿಜೆಪಿ ಸರ್ಕಾರದ ವಿರುದ್ಧದ ಸತ್ಯಾಗ್ರಹದಲ್ಲಿ ಮಾತನಾಡಿದರು.

ಮಾಜಿ ಸಂಸದ ಕೆ. ಜಯಪ್ರಕಾಶ್​ ಹೆಗ್ಡೆ ಮಾತನಾಡಿ, ಗಂಗಾಜಲದಿಂದ ಬಹಿರಂಗವಾಗಿ ಶುದ್ಧೀಕರಣ ಮಾಡಿದ ಬಿಜೆಪಿಗರು ಮೊದಲು ಆಂತರಿಕವಾಗಿ ಶುದ್ಧೀಕರಣ ಮಾಡಿಕೊಳ್ಳಬೇಕು. ಮಾನವರು ಪರಸ್ಪರ ಗೌರವಿಸಿಕೊಂಡಾಗ ಮೌಲ್ಯ ವರ್ಧನೆಯಾಗುತ್ತದೆ. ಇಲ್ಲದಿದ್ದರೆ ಮಾನವ ದಾನವನಾಗುತ್ತಾನೆ. ಕೇಂದ್ರ ಬಿಜೆಪಿ ಸರ್ಕಾರದ ಹಾಗೂ ಪ್ರಧಾನಿಯ ಹುಳುಕು-ಕೊಳಕುಗಳನ್ನೆಲ್ಲ ರಾಹುಲ್​ ಗಾಂಧಿ ದೇಶದ ಜನತೆಯ ಮುಂದೆ ತೆರೆದಿಡುತ್ತಿದ್ದಾರೆ. ಅದನ್ನು ಸಹಿಸಿಕೊಳ್ಳಲಾಗದೆ ಅವರ ವಿರುದ್ಧವೇ ಪ್ರಕರಣ ದಾಖಲಿಸುವ ಹೀನಬುದ್ಧಿ ಬಿಜೆಪಿಯದ್ದಾಗಿದೆ. ದೇಶದಲ್ಲಿ ಬದಲಾವಣೆ ಪರ್ವ ಆರಂಭವಾಗಿದೆ ಎಂದರು.  

ಪ್ರಚಾರ ಸಮಿತಿಯ ಬ್ರಹ್ಮಾವರ ತಾಲೂಕಿನ ಅಧ್ಯಕ್ಷ ಡಾ. ಸುಬ್ರಹ್ಮಣ್ಯ ಭಟ್​ ಮಾತನಾಡಿ, ಸ್ವಾತಂತ್ರ್ಯ ಲಭಿಸಿ 79 ವರ್ಷ ಕಳೆದಿದೆ. ಸುಶಿಕ್ಷಿತರಾದರೂ ಪ್ರಜ್ಞಾವಂತರಾಗಿಲ್ಲ. ಇನ್ನೂ ದಲಿತ, ಶೂದ್ರ, ಬ್ರಾಹ್ಮಣ ಎಂಬ ಭೇದ-ಭಾವ ಮುಂದುವರಿದಿದೆ. ಧರ್ಮ&ಜಾತಿಗಳ ವಿರುದ್ಧ ವಿಷಬೀಜ ಬಿತ್ತುತ್ತಿದ್ದ ಬಿಜಿಪಿಗರು ಇದೀಗ ದಲಿತರ ವಿರುದ್ಧವೇ ದಲಿತರನ್ನು ಎತ್ತಿಕಟ್ಟುವ ಕುತಂತ್ರ ಮಾಡುತ್ತಿದ್ದಾರೆ ಎಂದರು.

ಉಡುಪಿ ಜಿಲ್ಲಾ ಕಾಂಗ್ರೆಸ್​ ಪ್ರಚಾರ ಸಮಿತಿಯ ಅಧ್ಯಕ್ಷ ಹರೀಶ್​ ಗಿಣಿ ಅಲೆವೂರು ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಜಿಲ್ಲಾ ಪ್ರಚಾರ ಸಮಿತಿಯ ಕೋಶಾಧಿಕಾರಿ ದಯಾನಂದ್​ ಡಿ. ಕಿದಿಯೂರು ಕಾರ್ಯಕ್ರಮ ನಿರ್ವಹಿಸಿದರು. 

"