ಉಡುಪಿಯಲ್ಲಿ ಎಲ್​ಐಸಿ ಕಚೇರಿ ಮುಂಭಾಗದಲ್ಲಿ ಅಖಿಲ ಭಾರತ ವಿಮಾ ಪಿಂಚಣಿದಾರರ ಸಂಘ ಮತ್ತು ಅಖಿಲ ಭಾರತ ನಿವೃತ್ತ ವಿಮಾ ನೌಕರರ ಫೆಡರೇಷನ್​ನ ಪದಾಧಿಕಾರಿಗಳು ವಿವಿಧ ಬೇಡಿಕೆ ಈಡೇರಿಸುವಂತೆ ಆಗ್ರಹಿಸಿ ಪ್ರತಿಭಟಿಸಿದರು. ಎ. ಮಧ್ವರಾಜ ಬಲ್ಲಾಳ, ಪ.ವಸಂತ ಭಟ್​, ಎಚ್​. ಶುಭಚಂದ್ರ ಹತ್ವಾರ್​, ಡೆರಿಕ್​ ರೆಬೆಲ್ಲೋ ಇತರರಿದ್ದರು. 
ಉಡುಪಿ

ಪಿಂಚಣಿ ಪರಿಷ್ಕರಿಸಿ, ವೈದ್ಯಕೀಯ ನಗದು ಭತ್ಯೆ ನೀಡಿ

* ಉಡುಪಿ ವಿಭಾಗದ ಅಧ್ಯಕ್ಷ ಎ. ಮಧ್ವರಾಜ ಬಲ್ಲಾಳ ಆಗ್ರಹ

* ಎಲ್​ಐಸಿ ಕಚೇರಿ ಬಳಿ ನಿವೃತ್ತ ವಿಮಾ ನೌಕರರ ಪ್ರತಿಭಟನೆ

ಉಡುಪಿ: ಬಹಳ ಕಾಲದಿಂದ ನನೆಗುದಿಗೆ ಬಿದ್ದಿರುವ ಪಿಂಚಣಿ ಪರಿಷ್ಕರಣೆ, 1997ರ ಆಗಸ್ಟ್​ ತಿಂಗಳಿಗಿಂತ ಮೊದಲಿನ ಪಿಂಚಣಿದಾರರಿಗೆ ಏಕರೂಪದ ಡಿಎ ತಟಸ್ಥೀಕರಣ, 1986ರ ಪೂರ್ವದಲ್ಲಿ ನಿವೃತ್ತರಾದವರಿಗೆ ಎಕ್ಸ್​ಗ್ರೇಷಿಯಾ ಪಾವತಿಯಲ್ಲಿ ಹೆಚ್ಚಳ ಹಾಗೂ ನಿವೃತ್ತರಿಗೆ ವೈದ್ಯಕೀಯ ನಗದು ಭತ್ಯೆ ಕೂಡಲೇ ನೀಡಬೇಕು ಎಂದು ಅಖಿಲ ಭಾರತ ವಿಮಾ ಪಿಂಚಣಿದಾರರ ಸಂಘದ ಉಡುಪಿ ವಿಭಾಗದ ಅಧ್ಯಕ್ಷ ಎ. ಮಧ್ವರಾಜ ಬಲ್ಲಾಳ ಆಗ್ರಹಿಸಿದರು.

ಉಡುಪಿಯ ಭಾರತೀಯ ಜೀವ ವಿಮಾ ನಿಗಮ (ಎಲ್​ಐಸಿ)ದ ಮುಂಭಾಗದಲ್ಲಿ ಅಖಿಲ ಭಾರತ ವಿಮಾ ಪಿಂಚಣಿದಾರರ ಸಂಘ ಮತ್ತು ಅಖಿಲ ಭಾರತ ನಿವೃತ್ತ ವಿಮಾ ನೌಕರರ ಫೆಡರೇಷನ್​ನ ಉಡುಪಿ ವಿಭಾಗದ ವತಿಯಿಂದ ಆಯೋಜಿಸಿದ್ದ ಪ್ರತಿಭಟನೆಯಲ್ಲಿ ಮಾತನಾಡಿದರು.

ಅಖಿಲ ಭಾರತ ನಿವೃತ್ತ ವಿಮಾ ನೌಕರರ ಫೆಡರೇಷನ್​ನ ಅಧ್ಯಕ್ಷ ಪ.ವಸಂತ ಭಟ್​ ಮಾತನಾಡಿ, ಪ್ರತಿ ವರ್ಷವೂ ಆರೋಗ್ಯ ತಪಾಸಣೆಯ ವೆಚ್ಚ ನೀಡುವ ಸೌಲಭ್ಯ, ಮೆಡಿಕ್ಲೇಮ್​ ಯೋಜನೆಯಲ್ಲಿ ಸುಧಾರಣೆ ಹಾಗೂ ಈ ಯೋಜನೆಯ ಕಂತಿನ ಮೇಲಿನ ಜಿಎಸ್​ಟಿ ದರ ಕಡಿತಗೊಳಿಸಬೇಕು. 80 ವರ್ಷ ಪೂರೈಸಿದ ಪಿಂಚಣಿದಾರರ ಮೂಲ ವೇತನ ಹೆಚ್ಚಿಸಬೇಕು ಎಂದು ಒತ್ತಾಯಿಸಿದರು.

ತಮ್ಮ ವಿವಿಧ ಬೇಡಿಕೆಗಳನ್ನು ಈಡೇರಿಸಲು ತ್ವರಿತ ಕ್ರಮ ಕೈಗೊಳ್ಳುವಂತೆ ಎಲ್​ಐಸಿಯ ಹಿರಿಯ ವಿಭಾಗಾಧಿಕಾರಿಗೆ ಮನವಿ ಸಲ್ಲಿಸಿದರು.

ವಿಮಾನೌಕರರ ಸಂಘಟನೆಯ ಸದಸ್ಯ ಸಂಗಾತಿ ಡೆರಿಕ್​ ರೆಬೆಲ್ಲೋ ಮತ್ತು ನಿವೃತ್ತ ವಿಮಾ ನೌಕರರ ಫೆಡರೇಷನ್​ನ ಕಾರ್ಯದರ್ಶಿ ಎಚ್​. ಶುಭಚಂದ್ರ ಹತ್ವಾರ್​ ಮಾತನಾಡಿ, ಪಿಂಚಣಿದಾರ ಸದಸ್ಯರಿಗೆ ಬೇಡಿಕೆಗಳ ಕುರಿತು ಹೆಚ್ಚಿನ ವಿವರಣೆ ನೀಡಿದರು. ಎರಡೂ ಸಂಘಟನೆಯ ನೂರಾರು ಸದಸ್ಯರು ಪಾಲ್ಗೊಂಡಿದ್ದರು.