ಉಡುಪಿ: ಪರ್ಯಾಯ ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಶ್ರೀಪಾದರ ಚತುರ್ಥ ಪರ್ಯಾಯ "ವಿಶ್ವ ಗೀತಾ' ಪರ್ಯಾಯದ ಬಹುವಿಧ ಕಾರ್ಯಕ್ರಮಗಳಿಗೆ ಶಿಖರಪ್ರಾಯವಾಗಿ ಶ್ರೀಕೃಷ್ಣನಿಗೆ 'ಹೊನ್ನಿನ ಭಗವದ್ಗೀತಾ ಹೊತ್ತಗೆ' ಸಮರ್ಪಣೆ ಕಾರ್ಯಕ್ರಮ ಉಡುಪಿಯಲ್ಲಿ ಗುರುವಾರ (ಜ.8) ಸಂಜೆ ನಡೆಯಿತು.

ನವದೆಹಲಿಯ ನಿವಾಸಿ, ಶ್ರೀಕೃಷ್ಣನ ಭಕ್ತರಾದ ಕೇಂದ್ರ ಗೃಹ ಖಾತೆಯ ನಿವೃತ್ತ ಕಾರ್ಯದರ್ಶಿ ಎಸ್​.ಲಕ್ಷ್ಮೀನಾರಾಯಣನ್​ ಅವರು ಅಂದಾಜು 2 ಕೋ.ರೂ. ವೆಚ್ಚದಲ್ಲಿ ಸಿದ್ಧಪಡಿಸಿರುವ ಸುವರ್ಣ ಭಗವದ್ಗೀತಾ ಗ್ರಂಥವನ್ನು ಸುಗುಣೇಂದ್ರ ಶ್ರೀಗಳು ಭಗವಂತನಿಗೆ ಸಮರ್ಪಿಸಿದರು.

ಗ್ರಂಥ ಸಮರ್ಪಣೆಯ ನಿಮಿತ್ತ ಗೀತಾಮಂದಿರದಿಂದ ಮೆರವಣಿಗೆಯಲ್ಲಿ ತೆರಳಿ ರಥಬೀದಿಯಲ್ಲಿ ಶ್ರೀಕೃಷ್ಣ ಮಠದ ಮುಂಭಾಗದಲ್ಲಿ ಪುತ್ತಿಗೆ ಯತಿದ್ವಯರು ಪೂಜೆ ಸಲ್ಲಿಸಿ. ಮಹಾಮಂಗಳರಾತಿ ಮಾಡಿದರು. ಇದಕ್ಕೂ ಮೊದಲು ಶ್ರೀಕೃಷ್ಣ ಮಠದ ತೀರ್ಥ ಮಂಟಪದಲ್ಲಿ ಸುವರ್ಣ ಗೀತಾ ಗ್ರಂಥಕ್ಕೆ ಆರತಿ ಬೆಳಗಿ ಮೆರವಣಿಗೆಗೆ ಚಾಲನೆ ನೀಡಲಾಯಿತು. ಪಾರ್ಥ ಸಾರಥಿ ಸುವರ್ಣ ರಥದಲ್ಲಿ ರಥಬೀದಿಯ ಒಂದುಸುತ್ತು ಪ್ರದಣಾ ಮೆರವಣಿಗೆ ನಡೆಸಿ, ರಾಜಾಂಗಣಕ್ಕೆ ತರಲಾಯಿತು. ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಶ್ರೀಪಾದರು, ಕಿರಿಯ ಯತಿ ಸುಶ್ರೀಂದ್ರ ತೀರ್ಥ ಶ್ರೀಪಾದರು ಹಾಗೂ ಮಠದ ನೂರಾರು ಸದ್ಭಕ್ತರು ಉಪಸ್ಥಿತರಿದ್ದರು.