ಉಡುಪಿ: ನಮ್ಮ ಸನ್ಯಾಸ ಜೀವನದಲ್ಲಿ 52 ಚಾತುರ್ಮಾಸ್ಯ ಪೂರ್ಣಗೊಂಡಿದ್ದು, ನವಿಮುಂಬಯಿಯಲ್ಲಿರುವ ಮಠದ ನೂತನ ಶಾಖೆಯಲ್ಲಿ 53ನೇ ವ್ರತ ಆಚರಿಸಲು ಸಂಕಲ್ಪ ಮಾಡಿದ್ದೇವೆ. ಈ ಹಿಂದೆ 7 ಚಾತುರ್ಮಾಸ್ಯ ಮುಂಬಯಿಯಲ್ಲಿ ಮಾಡಿದ್ದು, ಇದು 8ನೇ ಚಾತುರ್ಮಾಸ್ಯವಾಗಿದೆ. ಎಂಟು ಎನ್ನುವುದು ಶ್ರೀಕೃಷ್ಣನ ಸಂಖ್ಯೆ. ಹೀಗಾಗಿ ಮುಂಬಯಿಯಲ್ಲಿ ನಡೆಯಲಿರುವ ಈ ಚಾತುರ್ಮಾಸ್ಯ ವಿಶೇಷವಾಗಿದೆ. ನಮ್ಮ ವ್ರತಾಚರಣೆಗೆ ಎಲ್ಲ ಸದ್ಭಕ್ತರು ಸಹಕರಿಸಬೇಕು ಎಂದು ವಿಶ್ವಮಾನ್ಯ 'ಯತಿಕುಲ ಚಕ್ರವರ್ತಿ' ಬಿರುದಾಂಕಿತ ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಶ್ರೀಪಾದರು ನುಡಿದರು.

ನವಿಮುಂಬಯಿಯಲ್ಲಿರುವ ಪುತ್ತಿಗೆ ಮಠದ ನೂತನ ಶಾಖೆಯ ಸಭಾಂಗಣದಲ್ಲಿ ಆಯೋಜಿಸಿದ್ದ ಚಾತುರ್ಮಾಸ್ಯದ ಪೂರ್ವಭಾವಿ ಸಮಾಲೋಚನಾ ಸಭೆಯಲ್ಲಿ ಆಶೀರ್ವಚನ ನೀಡಿದರು.

ಚಾತುರ್ಮಾಸ್ಯ ಸಮಿತಿಯ ಅಧ್ಯಕ್ಷರಾಗಿ ಶಿವರಾಮ್​ ಶೆಟ್ಟಿ ಅಜೆಕಾರ್​, ಗೌರವಾಧ್ಯಕ್ಷರಾಗಿ ವಿದ್ವಾನ್​ ಪ್ರಹ್ಲಾದ್​ ಆಚಾರ್ಯ ನಾಗರಹಳ್ಳಿ, ನಿವೃತ್ತ ನ್ಯಾಯಾಧೀಶ ದಿನೇಶ್​ ಕುಮಾರ್​, ಮುಂಬಯಿಯ ಪ್ರಸಿದ್ಧ ಗೋಕುಲದ ಅಧ್ಯಕ್ಷ ಡಾ ಸುರೇಶ್​ ರಾವ್​, ಸಿಎ ಎನ್​.ಆರ್​. ರಾವ್​ ಅವರನ್ನು ನೇಮಿಸಲಾಯಿತು.

ಉಪಾಧ್ಯಕ್ಷರಾಗಿ ಶ್ರೀಗಳ ಆಪ್ತರಾದ ಬಿ.ಆರ್​. ಶೆಟ್ಟಿ, ಅಣ್ಣಿ ಶೆಟ್ಟಿ ಘಂನ್ಸೋಲಿ, ಬಂಟ್ಸ್​ ಸಂಘದ ಅಧ್ಯಕ್ಷ ಪ್ರವಿಣ್​ ಭೋಜಶೆಟ್ಟಿ, ಸುರೇಶ್​ ಕಾಂಚನ್​, ಹರೀಶ್​ ಅಮೀನ್​, ಸೂರ್ಯಕಾಂತ್​ ನೇಮಕಗೊಂಡರು.

ಬೆಂಗಳೂರು ಗೋವರ್ಧನ ಕ್ಷೇತ್ರದ ಮೇಲ್ವಿಚಾರಕ ಎ.ಬಿ. ಕುಂಜಾರ್​ ಕಾರ್ಯಕ್ರಮ ನಿರ್ವಹಿಸಿದರು. ಶ್ರೀಗಳ ಆಪ್ತ ಕಾರ್ಯದರ್ಶಿ ರತೀಶ್​ ತಂತ್ರಿ ಉಪಸ್ಥಿತರಿದ್ದರು.