ಕರಾವಳಿಯೂ ಸೇರಿದಂತೆ ರಾಜ್ಯಾದ್ಯಂತ ಬಿಸಿಲಿನ ಝಳ ವಿಪರೀತವಾಗುತ್ತಿದ್ದು, ಸೆಕೆಯ ತೀವ್ರತೆಯೂ ಹೆಚ್ಚುತ್ತಿದೆ. ಹಲವೆಡೆ ಕುಡಿಯುವ ನೀರಿನ ಸಮಸ್ಯೆಯೂ ಆರಂಭಗೊಂಡಿದ್ದು, ಉಡುಪಿ ನಗರದಲ್ಲಿ ಸದ್ಯಕ್ಕೆ ಕುಡಿಯುವ ನೀರಿನ ಸಮಸ್ಯೆ ಉಂಟಾಗಿಲ್ಲ.

ನಗರಕ್ಕೆ ನೀರು ಪೂರೈಸುವ ಬಜೆ ಅಣೆಕಟ್ಟೆಯಲ್ಲಿ ನೀರಿನ ಮಟ್ಟ ಇಳಿಕೆಯಾಗಿದ್ದರೂ ಸಹ ಜೂ.30ರ ವರೆಗೆ ಪೂರೈಕೆಯಲ್ಲಿ ಯಾವುದೇ ತೊಡಕಾಗದು. 3 ವರ್ಷದ (2023ರಲ್ಲಿ) ಹಿಂದೆ ಮಳೆ ಕೊರತೆಯಾಗಿದ್ದರಿಂದ 2024ರ ಮೇ ತಿಂಗಳ 2ನೇ ವಾರದಲ್ಲಿ ನೀರಿನ ಸಮಸ್ಯೆ ತಲೆದೋರಿತ್ತು. ಆದರೆ, ಈ ಬಾರಿ ಮಳೆಗಾಲದವರೆಗೂ ಬಜೆ ಡ್ಯಾಂ 'ನೀರಿನ ಭರವಸೆ' ಒದಗಿಸಿದೆ.

ಬಜೆ ಅಣೆಕಟ್ಟೆಯ ನೀರು ಸಂಗ್ರಹ ಸಾಮರ್ಥ್ಯ 4.90 ಸೆಂ.ಮೀ. (ಎತ್ತರದಲ್ಲಿ) ಇದೆ. ಪ್ರಸ್ತುತ 3.30 ಸೆಂ.ಮೀ. ನೀರು ಸಂಗ್ರಹವಿದೆ. ಮಳೆಗಾಲದ ಬಳಿಕ ಈವರೆಗೆ 1.06 ಸೆಂ.ಮೀ. ನೀರು ಖಾಲಿಯಾಗಿದೆ. ಹೀಗಾಗಿ ಕಳೆದ ವರ್ಷದಂತೆ ಈ ವರ್ಷವೂ ಸಹ ಕುಡಿಯುವ ನೀರಿನ ಪೂರೈಕೆಯಲ್ಲಿ ಯಾವುದೇ ಸಮಸ್ಯೆಯಾಗದು. ಕಳೆದ ಮಳೆಗಾಲದಲ್ಲಿ ಅಣೆಕಟ್ಟೆಯ ಗೇಟ್​ನ ಮೇಲ್ಭಾಗದಲ್ಲಿ ಉಸುಕಿನ ಚೀಲವಿಟ್ಟು ಕೃತಕವಾಗಿ 6.10 ಸೆಂ.ಮೀ. ವರೆಗೆ ಎತ್ತರಿಸಿ ನೀರಿನ ಮಟ್ಟ ಹೆಚ್ಚಿಸಿ ಹೆಚ್ಚುವರಿ ನೀರು ಸಂಗ್ರಹ ಮಾಡಿಕೊಳ್ಳಲಾಗಿತ್ತು. 

ನೀರು ಪೂರೈಕೆಯಲ್ಲಿ ಯಾವುದೇ ಸಮಸ್ಯೆ ಇಲ್ಲದಿದ್ದರೂ ಸಹ ನಗರಸಭೆ ವತಿಯಿಂದ ಅಗತ್ಯ ವ್ಯವಸ್ಥೆ ಮಾಡಿಟ್ಟುಕೊಳ್ಳಲಾಗುತ್ತದೆ. ನಗರಸಭೆಯ ಅಧೀನದಲ್ಲಿ 25ಕ್ಕೂ ಅಧಿಕ ಬೋರ್ವೆಲ್​, 10ಕ್ಕೂ ಅಧಿಕ ಬಾವಿ ಇದೆ. ಅಲ್ಲದೆ, ಖಾಸಗಿಯವರ ಬೋರ್ವೆಲ್​ಗಳನ್ನು ಸಹ ಒಪ್ಪಂದ ಮಾಡಿಕೊಂಡು ನೀರು ಪೂರೈಕೆ ಮಾಡಲು ನಗರಸಭೆ ಸಿದ್ಧತೆ ಮಾಡಿಕೊಂಡಿರುತ್ತದೆ. 

ಉಡುಪಿ ನಗರದಲ್ಲಷ್ಟೇ ಅಲ್ಲದೆ ಜಿಲ್ಲೆಯಲ್ಲೂ ಸಹ ಈವರೆಗೆ ಕುಡಿಯುವ ನೀರಿನ ಸಮಸ್ಯೆ ಉಂಟಾಗಿಲ್ಲ. ಆದರೆ, ಪೆರ್ಡೂರು ಗ್ರಾಪಂ ವ್ಯಾಪ್ತಿಯಲ್ಲಿ ಕುಡಿಯುವ ನೀರಿನ ಕೊರತೆ ಉಂಟಾಗುತ್ತಿದ್ದು, ಟೆಂಡರ್​ ಕರೆದು, ಟ್ಯಾಂಕರ್​ ಮೂಲಕ ನೀರು ಪೂರೈಸಲಾಗುತ್ತಿದೆ. ಕುಂದಾಪುರ ತಾಲೂಕಿನ ಗುಜ್ಜಾಡಿ ಗ್ರಾಮದಲ್ಲಿ ಸಮಸ್ಯೆ ಕಂಡುಬಂದಿದ್ದು ಟ್ಯಾಂಕರ್​ ಮೂಲಕ ನೀರು ಪೂರೈಕೆ ಮಾಡಲಾಗುತ್ತಿದೆ. ಜಿಲ್ಲೆಯ ಯಾವುದೇ ಭಾಗದಲ್ಲಿ ಕುಡಿಯುವ ನೀರಿಗೆ ತೊಂದರೆ ಆದಲ್ಲಿ ಜಿಲ್ಲಾಡಳಿತದ ಸ್ಥಿರ ಸಹಾಯವಾಣಿ ಸಂಖ್ಯೆ 0820-2574802 ಹಾಗೂ ಉಡುಪಿ ನಗರದಲ್ಲಿ ನೀರಿನ ಸಮಸ್ಯೆ ಇದ್ದಲ್ಲಿ ನಗರಸಭೆಯ ಸಹಾಯವಾಣಿ 8749066111 ಕರೆ ಮಾಡಬಹುದು ಎಂದು ಅಪರ ಜಿಲ್ಲಾಧಿಕಾರಿ ಅಬೀದ್​ ಗದ್ಯಾಳ ತಿಳಿಸಿದ್ದಾರೆ. ಉಡುಪಿ ತಾಲೂಕಿನಲ್ಲಿ ನೀರಿನ ಸಮಸ್ಯೆಯಾದಲ್ಲಿ ಶಾಸಕರ ಕಚೇರಿ ಸಹಾಯವಾಣಿ 9019566366 ಕರೆ ಮಾಡಬಹುದು ಎಂದು ಶಾಸಕ ಯಶ್​ಪಾಲ್​ ಸುವರ್ಣ ತಿಳಿಸಿದ್ದಾರೆ.

ಮನೆ                            19,740

ವಾಣಿಜ್ಯ                         1,678

ಕೈಗಾರಿಕೆ                        37

ಗೃಹೇತರ                        31 

ಗ್ರಾಪಂ (8)                     22

ಒಟ್ಟು                            21,508

"