ಪರೀಕ ಸೌಖ್ಯವನ ಪ್ರಕೃತಿ ಚಿಕಿತ್ಸಾ ಆಸ್ಪತ್ರೆಗೆ ಎನ್​ಎಬಿಎಚ್​ ಮಾನ್ಯತೆ

ಉಡುಪಿ: ಧರ್ಮಸ್ಥಳ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆ ಮಾರ್ಗದರ್ಶನದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಪರೀಕ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಯೋಗ ಮತ್ತು ಪ್ರಕೃತಿ ಚಿಕಿತ್ಸಾ ಆಸ್ಪತ್ರೆ 'ಸೌಖ್ಯವನ' ಘಟಕಕ್ಕೆ ಅತ್ಯುನ್ನತ ಗುಣಮಟ್ಟದ ಸೇವೆಯನ್ನು ಗುರುತಿಸಿ ಆಸ್ಪತ್ರೆಗಳ ರಾಷ್ಟ್ರೀಯ ಮಾನ್ಯತಾ ಮಂಡಳಿಯಿಂದ ಅಧಿಕೃತ ಪ್ರಮಾಣಪತ್ರ ದೊರೆತಿದೆ.

ಈ ಬಗ್ಗೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮುಖ್ಯ ವೈದ್ಯಾಧಿಕಾರಿ ಡಾ. ಗೋಪಾಲ್​ ಪೂಜಾರಿ, 2007ರಲ್ಲಿ ಕೇವಲ 60 ಹಾಸಿಗೆಗಳೊಂದಿಗೆ ಆರಂಭಗೊಂಡ ಪ್ರಕೃತಿ ಚಿಕಿತ್ಸಾ ಆಸ್ಪತ್ರೆ 2010ರಲ್ಲಿ 240 ಹಾಸಿಗೆಗಳಿಗೆ ಹಾಗೂ -21ರಲ್ಲಿ 320 ಹಾಸಿಗೆಗಳ ಸುಸಜ್ಜಿತ ಹಾಗೂ ಅತ್ಯಾಧುನಿಕ ಕೇಂದ್ರವಾಗಿ ವಿಸ್ತರಣೆಗೊಂಡಿದೆ. ಎನ್​ಎಬಿಎಚ್​ ಮಾನ್ಯತೆಗಾಗಿ 2023ರ ಆಗಸ್ಟ್​ನಿಂದ ಸಿದ್ಧತೆಗಳು ನಡೆದಿದ್ದವು. ಚಿಕಿತ್ಸಾ ವಿಭಾಗ, ನೈರ್ಮಲ್ಯ, ಪಥ್ಯಾಹಾರ, ವಾಯು ಮಾಲಿನ್ಯ ನಿಯಂತ್ರಣ, ಅಗ್ನಿಶಾಮಕ ವ್ಯವಸ್ಥೆ ಸೇರಿದಂತೆ ಪ್ರತಿಯೊಂದು ವಿಭಾಗಗಳ ಪರಿಶೀಲನೆಯ ಬಳಿಕ, 2026ರ ಮಾರ್ಚ್​ 26 ಮತ್ತು 27ರಂದು ಎನ್​ಎಬಿಎಚ್​ ತಂಡದ ಡಾ. ಅಖಿಲೇಶ್​, ಡಾ. ಜ್ಯೋತಿ ಹಾಗೂ ಡಾ. ನರೇಶ್​ ಆಸ್ಪತ್ರೆಗೆ ಭೇಟಿ ನೀಡಿ ಕೂಲಂಕುಶ ಪರಿಶೀಲನೆ ನಡೆಸಿ ವರದಿ ನೀಡಿದ್ದರು. ಇದೀಗ ಎನ್​ ಎ ಬಿ ಎಚ್​ ಪ್ರಮಾಣಪತ್ರ ನೀಡಿದೆ ಎಂದರು.

ಸೌಖ್ಯವನದಲ್ಲಿ ನುರಿತ ವೈದ್ಯರ ಸಮಾಲೋಚನೆಯೊಂದಿಗೆ ಜಲ ಚಿಕಿತ್ಸೆ, ಮಣ್ಣಿನ ಚಿಕಿತ್ಸೆ, ಎಣ್ಣೆ ಮಾಲೀಶು, ಆಕ್ಯುಪಂಕ್ಚರ್​ (ಸೂಜಿ ಚಿಕಿತ್ಸೆ), ಕಪ್ಪಿಂಗ್​ ಥೆರಪಿ, ಫಿಸಿಯೋಥೆರಪಿ, ಯೋಗ ಚಿಕಿತ್ಸೆ ಹಾಗೂ ಪೌಷ್ಟಿಕಾಂಶಯುಕ್ತ ಸಾತ್ವಿಕ ಪಥ್ಯಾಹಾರ ವ್ಯವಸ್ಥೆ ಕಲ್ಪಿಸಲಾಗಿದೆ. ಹೊರರೋಗಿ ವಿಭಾಗದಲ್ಲೂ ಚಿಕಿತ್ಸೆ ಪಡೆಯಲು ಅವಕಾಶವಿದೆ. ಮಾನ್ಯತಾ ಮಂಡಳಿ ಪ್ರಮಾಣಪತ್ರದಿಂದ ಇನ್ನಷ್ಟು ಉತ್ತಮ ಗುಣಮಟ್ಟದ ಸೇವೆ ನೀಡಲು ಸಾಧ್ಯವಾಗಲಿದೆ ಎಂದು ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಸೌಖ್ಯವನದ ಸ್ಥಾನಿಕ ವೈದ್ಯಾಧಿಕಾರಿ ಡಾ. ಶೋಭಿತ್​ ಶೆಟ್ಟಿ, ಮಹಿಳಾ ವೈದ್ಯಾಧಿಕಾರಿ ಡಾ. ಪೂಜಾ ಜಿ., ಫಿಸಿಯೋಥೆರಪಿಸ್ಟ್​ ಡಾ. ಚೇತನಾ ಹಾಗೂ ವ್ಯವಸ್ಥಾಪಕ ಪ್ರವಿಣ್​ ಕುಮಾರ್​ ಉಪಸ್ಥಿತರಿದ್ದರು.