ಉಡುಪಿ: ವಿಶ್ವ ಪರಿಸರಕ್ಕೆ ದಿನಕ್ಕೆ ನಾಂದಿ ಹಾಡುವ ರೀತಿಯಲ್ಲಿ ಉಡುಪಿ ಜಿಲ್ಲೆಯಲ್ಲಿ ಶುಕ್ರವಾರ (ಜೂ.5) ದಿನವಿಡೀ ಮೋಡ ಕವಿದ ವಾತಾವರಣದೊಂದಿಗೆ ಆಗಾಗ ಸಾಧಾರಣ ಪ್ರಮಾಣದಲ್ಲಿ ಮಳೆ ಸುರಿಯಿತು. 

ಉಡುಪಿ ನಗರದಲ್ಲಿ ಬೆಳಗ್ಗೆ 8:30ರ ವೇಳೆಯಲ್ಲಿ ಮಂದಗತಿಯಲ್ಲಿ ಮಳೆ ಆರಂಭಿಸಿ, 10 ಗಂಟೆಯ ವೇಳೆಗೆ ತುಸು ಬಿರುಸಾಗಿ ಸುರಿಯಿತು. ಬಳಿಕ ಮೋಡ ಕವಿದ ವಾತಾವರಣ ಮುಂದುವರಿದು, ಸಂಜೆ 5 ಗಂಟೆಯ ವೇಳೆಗೆ ಜಿಟಿಜಿಟಿಯಾಗಿ ಜಿನುಗಿತು. ಸಂಜೆ 7 ಗಂಟೆಯ ಬಳಿಕ ಉತ್ತಮವಾಗಿ ಮಳೆ ಸುರಿಯಿತು. ಮಧ್ಯರಾತ್ರಿಯೂ ಸಹ ಉತ್ತಮ ಮಳೆಯಾಯಿತು.

ರಾಜ್ಯ ಕರಾವಳಿ ಜಿಲ್ಲೆಗಳಾದ ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಜಿಲ್ಲೆಯಲ್ಲಿ ಜೂ.6ರಿಂದ ಜೂ.9ರ ವರೆಗೆ ಗುಡುಗು-ಮಿಂಚು ಸಹಿತ ಭಾರಿ ಪ್ರಮಾಣದಲ್ಲಿ ಮಳೆಯಾಗಲಿದೆ. ಗಂಟೆಗೆ 35ರಿಂದ 40 ಕಿಮೀ. ವೇಗದಲ್ಲಿ ಗಾಳಿಯೂ ಬೀಸುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಜೂ.6ರಿಂದ ಜೂ.9ರ ವರೆಗೆ ಅರಬ್ಬಿ ಸಮುದ್ರದಲ್ಲೂ ಸಹ ಭಾರಿ ಪ್ರಮಾಣದಲ್ಲಿ ಗಾಳಿ ಬೀಸಲಿದೆ. ಗಂಟೆಗೆ ಗಂಟೆಗೆ 45ರಿಂದ 55 ಕಿ.ಮೀ. ವೇಗದಲ್ಲಿ ಗಾಳಿ ಬೀಸಲಿದ್ದು ಅದರ ಪ್ರಭಾವ 65 ಕಿ.ಮೀ.ಯಷ್ಟು ಇರಲಿದೆ. ಹೀಗಾಗಿ ಸಾರ್ವಜನಿಕರು, ಪ್ರವಾಸಿಗರು ಕಡಲಿಗೆ ತೆರಳದಂತೆಯೂ ಸೂಚನೆ ನೀಡಲಾಗಿದೆ.

ಕಾರ್ಕಳ- 20.09 ಮಿ.ಮೀ., ಕುಂದಾಪುರ- 21.03, ಉಡುಪಿ- 9.03, ಬೈಂದೂರು- 28.07, ಬ್ರಹ್ಮಾವರ- 19.06, ಕಾಪು- 34.07 ಮಿ.ಮೀ., ಹೆಬ್ರಿ- 15.04 ಮಿ.ಮೀ. ಮಳೆಯಾಗಿದೆ. ಉಡುಪಿ ಜಿಲ್ಲೆಯಲ್ಲಿ ಸರಾಸರಿ 21.03 ಮಿ.ಮೀ. ಮಳೆಯಾಗಿದೆ.