ಉಡುಪಿ: ದೇಶವಾಸಿಗಳಲ್ಲದವರು, ನುಸುಳುಕೋರರನ್ನು ಮತದಾರರ ಪಟ್ಟಿಯಿಂದ ತೆರವು ಮಾಡಲು ಚುನಾವಣಾ ಆಯೋಗವು ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್​ಐಆರ್​) ಕಾರ್ಯ ನಡೆಸುತ್ತಿದೆ. ಹೀಗಾಗಿ ನಾವೆಲ್ಲರೂ ಸಹ ರಾಷ್ಟ್ರದ ಭದ್ರತೆ ಹಾಗೂ ಹಿತಾಸಕ್ತಿಗಾಗಿ ಯಾವುದೇ ಅರ್ಹ ಮತದಾರರು ತಪ್ಪಿಹೋಗದಂತೆ ಶ್ರಮಿಸಿ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಇನ್ನಷ್ಟು ಬಲಪಡಿಸೋಣ. ಆ ನಿಟ್ಟಿನಲ್ಲಿ ಬೂತ್​ ಮಟ್ಟದಲ್ಲಿ ಜನರು ಭರ್ತಿ ಮಾಡಿದ ಎನ್ಯುಮರೇಷನ್​ ಫಾಮ್​ರ್ಅನ್ನು ಬಿಎಲ್​ಒಗಳಿಗೆ ತಲುಪಿಸೋಣ ಎಂದು ಉಡುಪಿ-ದಕ್ಷಿಣ ಕನ್ನಡ ಸ್ಥಳೀಯ ಸಂಸ್ಥೆ ಕ್ಷೇತ್ರದ ವಿ.ಪ. ಸದಸ್ಯ ಕಿಶೋರಕುಮಾರ್​ ಪುತ್ತೂರು ಮನವಿ ಮಾಡಿದರು.

ಉಡುಪಿಯಲ್ಲಿ ಬಿಜೆಪಿಯ ಸಂಘಟನಾತ್ಮಕ ಚಟುವಟಿಕೆ ನಿಮಿತ್ತ ಉಡುಪಿ ವಿಧಾನಸಭಾ ಕ್ಷೇತ್ರಾದ್ಯಂತ ಸೋಮವಾರ (ಜು.27) ಹಮ್ಮಿಕೊಂಡಿದ್ದ ಎಸ್​ಐಆರ್​ ಮಹಾ ಅಭಿಯಾನದ ನಿಮಿತ್ತ ವಿವಿಧ ಮಂಡಲ, ಶಕ್ತಿ ಕೇಂದ್ರ ಹಾಗೂ ಬೂತ್​ಗಳಲ್ಲಿ ಬಿರುಸಿನ ಪ್ರವಾಸ, ಸಭೆ ಹಾಗೂ ಮನೆ-ಮನೆ ಭೇಟಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಕಾರ್ಯಕರ್ತರಿಗೆ ಮಾರ್ಗದರ್ಶನ ನೀಡಿದರು.

ಉಡುಪಿಯ ಪ್ರಮುಖ ಬೂತ್​ಗಳಾದ ಹುಡ್ಕೋ ಕಾಲನಿ ಮಣಿಪಾಲ, ಕರಂಬಳ್ಳಿ, ಕಲ್ಯಾಣಪುರ, ಮಹಾವಿಷ್ಣುಮೂರ್ತಿ ನಗರ, ಕೇಳರ್ಕಳಬೆಟ್ಟು, ಕನ್ನರಪಾಡಿ ಕಡೆಕಾರ್​, ಅಂಬಲಪಾಡಿ ಗ್ರಾಪಂ ವ್ಯಾಪ್ತಿ, ಶಾರದಾ ಕಲ್ಯಾಣ ಮಂಟಪ ಕಂಜಿಬೆಟ್ಟು ವಾರ್ಡ್​, ಹಾವಂಜೆ ಹಾಗೂ ಉಪ್ಪೂರು ಶಕ್ತಿ ಕೇಂದ್ರಗಳಲ್ಲಿ ಸಭೆ ನಡೆಸಲಾಯಿತು. ಬೂತ್​ ಅಧ್ಯಕ್ಷರು, ಪದಾಧಿಕಾರಿಗಳು ಹಾಗೂ ಪ್ರಮುಖರೊಂದಿಗೆ ಸೇರಿ ಅಭಿಯಾನದ ಯಶಸ್ಸಿಗೆ ಸಮಾಲೋಚನೆ ನಡೆಸಲಾಯಿತು.

ಉಡುಪಿ ನಗರ ಮಂಡಲ ಅಧ್ಯಕ್ಷ ದಿನೇಶ್​ ಅಮೀನ್​, ಜಿಲ್ಲಾ ಬಿಜೆಪಿ ಗ್ರಾಮಾಂತರ ಮಂಡಲ ಅಧ್ಯಕ್ಷ ರಾಜೀವ್​ ಕುಲಾಲ, ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಜಗದೀಶ್​ ಆಚಾರ್ಯ, ಜಿಲ್ಲಾ ಉಪಾಧ್ಯೆ ನಳಿನಿ ಪ್ರದೀಪ್​, ಜಿಲ್ಲಾ ಕಾರ್ಯದರ್ಶಿ ಉಮೇಶ್​ ನಾಯ್ಕ ಉಪಸ್ಥಿತರಿದ್ದರು.

ಪಕ್ಷದ ಪ್ರಮುಖರಾದ ರಾಜೇಶ್​ ಶೆಟ್ಟಿ, ಮೋಹನ್​ ಶೆಟ್ಟಿ, ಎಸ್​. ನಾರಾಯಣ, ಉದಯಕುಮಾರ ಶೆಟ್ಟಿ, ಮನೋಜ್​ ಶೆಟ್ಟಿ, ಗಿರೀಶ್​ ಅಂಚನ್​, ಬೂತ್​ ಅಧ್ಯಕ್ಷರಾದ ಪ್ರಭಾಕರ್​ ಕುಂದರ್​, ಜಗದೀಶ್​, ಯುವ ಮೋರ್ಚಾ ಹಾಗೂ ಮಹಿಳಾ ಮೋರ್ಚಾದ ಪದಾಧಿಕಾರಿಗಳು ಪಾಲ್ಗೊಂಡಿದ್ದರು.