ಉಡುಪಿ: ಶಿಕ್ಷಣ ಸಂಸ್ಥೆ, ಆಸ್ಪತ್ರೆ, ಕೈಗಾರಿಕಾ ಪ್ರದೇಶ, ಬೃಹತ್​ ವಸತಿ ಸಮುಚ್ಚಯ ಒಳಗೊಂಡ ಮಣಿಪಾಲ ನಗರಕ್ಕೆ ಅಗ್ನಿಶಾಮಕ ಘಟಕ ಇರಲಿಲ್ಲ. ಈ ಭಾಗದಲ್ಲಿ ತುರ್ತು ಸಂದರ್ಭದಲ್ಲಿ ಉಡುಪಿಯಿಂದ ಅಗ್ನಿಶಾಮಕ ವಾಹನ ಘಟನಾ ಸ್ಥಳಕ್ಕೆ ಆಗಮಿಸಲು ವಿಳಂಬವಾಗುತ್ತಿತ್ತು. ಇದೀಗ ಈ ಭಾಗಕ್ಕೆ ಅತ್ಯವಶ್ಯಕವಾಗಿದ್ದ ಅಗ್ನಿಶಾಮಕ ಘಟಕ ಶೀಘ್ರ ಕಾರ್ಯಾರಂಭಗೊಂಡು, ಸೇವೆಗೆ ಲಭ್ಯವಾಗಲಿದೆ ಎಂದು ಶಾಸಕ ಯಶ್​ಪಾಲ್​ ಸುವರ್ಣ ತಿಳಿಸಿದರು.

ಮಣಿಪಾಲದ ಅದರ್ಶ ನಗರದಲ್ಲಿ ಸುಮಾರು 3 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಳ್ಳಲಿರುವ ಅಗ್ನಿಶಾಮಕ ದಳ ಕಚೇರಿಯ ಕಟ್ಟಡ ಕಾಮಗಾರಿಗೆ ಶಿಲಾನ್ಯಾಸ ನೆರವೇರಿಸಿ ಮಾತನಾಡಿದರು.

ಮಣಿಪಾಲ ವಾರ್ಡ್​ನ ನಗರಸಭಾ ಮಾಜಿ ಸದಸ್ಯ ಮಂಜುನಾಥ್​ ಮಾತನಾಡಿ, ಮಣಿಪಾಲ ಭಾಗಕ್ಕೆ ಅಗ್ನಿಶಾಮಕ ಘಟಕ ಅತೀ ಅವಶ್ಯಕವಾಗಿತ್ತು. ಅದಕ್ಕೆ ವಿಶೇಷ ಮುತುವರ್ಜಿ ವಹಿಸಿ ಮಂಜೂರು ಮಾಡಿಸಿದ ಶಾಸಕ ಯಶ್​ಪಾಲ್​ ಸುವರ್ಣ ಅವರಿಗೆ ಜನತೆಯ ಪರವಾಗಿ ಅಭಿನಂದನೆ ಸಲ್ಲಿಸುತ್ತೇನೆ ಎಂದರು.

ಉಡುಪಿ ನಗರಸಭಾ ನಿಕಟಪೂರ್ವ ಅಧ್ಯಕ್ಷ ಪ್ರಭಾಕರ್​ ಪೂಜಾರಿ, ಮಾಜಿ ಸದಸ್ಯರಾದ ಕಲ್ಪನಾ ಸುಧಾಮ, ಹರೀಶ್​ ಶೆಟ್ಟಿ, ಟಿ.ಜಿ. ಹೆಗಡೆ, ಉಡುಪಿ ನಗರ ಬಿಜೆಪಿ ಅಧ್ಯಕ್ಷ ದಿನೇಶ್​ ಅಮೀನ್​, ಈಶ್ವರ ನಗರ ವಾರ್ಡ್​ನ ಅಧ್ಯಕ್ಷ ಸುರೇಶ್​ ಆಚಾರ್ಯ, ಕಾರ್ಯದರ್ಶಿ ಕೃಷ್ಣ ನಾಯ್ಕ್​, ಪ್ರಮುಖರಾದ ನರಸಿಂಹ ನಾಯಕ್​, ಪೃಥ್ವಿರಾಜ್​, ನಿತಿನ್​ ಪೈ, ಗುರುರಾಜ್​ ಭಂಡಾರಿ, ಸತೀಶ್​ ಸಾಲ್ಯಾನ್​ ಇದ್ದರು.

"