ಉಡುಪಿ: ಶಿಕ್ಷಣದ ವ್ಯವಸ್ಥೆಯಲ್ಲಿ ಶಿಷ್ಯರು ತನಗಿಂತ ಎತ್ತರಕ್ಕೆ ಬೆಳೆದಾಗ, ಹೆಚ್ಚಿನ ಮಾನ&ಸನ್ಮಾನ ಪಡೆದಾಗ ಆ ಗುರುವು ತನ್ನ ಬದುಕಿನ ಸಾರ್ಥಕತೆಯಿಂದ ಹಸನ್ಮುಖರಾಗುತ್ತಾರೆ. ಹಾಗೆಯೇ ಪುತ್ರ ಅಥವಾ ಪುತ್ರಿ ಶೈಕ್ಷಣಿಕ ಸಾಧನೆಯಿಂದ ಸನ್ಮಾನಕ್ಕೆ ಪಾತ್ರರಾದಾಗ ತಂದೆ&ತಾಯಿ, ಹಿರಿಯರು ಬದುಕಿನ ಸಾರ್ಥಕತೆಯಿಂದ ಹಸನ್ಮುಖರಾಗುತ್ತಾರೆ. ಮನುಷ್ಯ ಈ ಎರಡು ಸಂದರ್ಭದಲ್ಲಿ ಅತೀವ ಸಂತಸ ಅನುಭವಿಸುತ್ತಾರೆ ಎಂದು ಕಾಪು ಶಾಸಕ ಗುರ್ಮೆ ಸುರೇಶ್​ ಶೆಟ್ಟಿ ಅಭಿಪ್ರಾಯಪಟ್ಟರು.

ಉಡುಪಿ ತಾಲೂಕಿನ ಹಿರಿಯಡ್ಕದಲ್ಲಿರುವ ಕರ್ನಾಟಕ ಪಬ್ಲಿಕ್​ ಸ್ಕೂಲ್​ನ ಸಭಾಂಗಣದಲ್ಲಿ  ಮಂಗಳವಾರ (ಜೂ.30) ಆಯೋಜಿಸಿದ್ದ ಸನ್ಮಾನ, ಬೀಳ್ಕೊಡುಗೆ, ಪ್ರತಿಭಾ ಪುರಸ್ಕಾರ ಮತ್ತು ವಿದ್ಯಾರ್ಥಿ ಸಂಘದ ಉದ್ಘಾಟನೆ ನೆರವೇರಿಸಿ ಮಾತನಾಡಿದರು.

ಶಾಲೆಯಿಂದ ನಿವೃತ್ತರಾಗಲಿರುವ ರಸಾಯನ ಶಾಸ್ತ್ರ ಉಪನ್ಯಾಸಕ ನವನೀತ ಅರಸ್​ ಎ., ಪ್ರಾಥಮಿಕ ಶಾಲಾ ಶಿಕ್ಷಕಿ ರೇವತಿ ಅವರನ್ನು ಸನ್ಮಾನಿಸಲಾಯಿತು. ವರ್ಗಾವಣೆಗೊಂಡ ದ್ವಿತೀಯ ದರ್ಜೆ ಸಹಾಯಕ ನಿಶ್ಚಲ್​ ಕ್ಲಿಂಟನ್​ ಸಾಲಿನ್ಸ್​ ಅವರನ್ನು ಬೀಳ್ಕೊಡಲಾಯಿತು.

2025-26ನೇ ಸಾಲಿನ ದ್ವಿತೀಯ ಪಿಯುಸಿ ಪರೀಕ್ಷೆಯಲ್ಲಿ 8ನೇ ರ್ಯಾಂಕ್​ ಗಳಿಸಿದ್ದ ಶ್ರೇಯಸ್​ ಆಚಾರ್ಯ ಹಾಗೂ ಸಜನಿ ಮತ್ತು ವಿಶಿಷ್ಟ ಶ್ರೇಣಿಯಲ್ಲಿ ತೇರ್ಗಡೆಯಾದ ವಿದ್ಯಾರ್ಥಿಗಳಿಗೆ ಪುರಸ್ಕಾರ ವಿತರಿಸಲಾಯಿತು.

ಪ್ರಾಂಶುಪಾಲ ಮಂಜುನಾಥ್​ ಭಟ್​ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಉಪನ್ಯಾಸಕಿ ಜಯಶ್ರೀ ಸನ್ಮಾನ ಪತ್ರ ವಾಚಿಸಿದರು. ಉಪನ್ಯಾಸಕಿ ರಂಜಿತಾ ಕಾರ್ಯಕ್ರಮ ನಿರೂಪಿಸಿದರು. ಹಿರಿಯ ಉಪನ್ಯಾಸಕ ರಮೇಶ್​ ನಾಯ್ಕ ವಂದಿಸಿದರು.