ಉಡುಪಿ: 'ಪೇಟ್​ ಕೇಲಿಯೇ ನೋಟ್​, ನೋಟ್​ ಕೇಲಿಯೇ ಸರ್ಕಾರೀ ಸೀಟ್​, ಸೀಟ್​ ಕೇಲಿಯೇ ನೀಟ್​ ಚಾಹಿಯೇ' ಎಂಬ ಹೊಸ ಮಾತು ಚಾಲ್ತಿಯಲ್ಲಿದೆ. ಆದರೆ, ನೀಟ್​ ವಿಚಾರದಲ್ಲಿ ಸರ್ಕಾರ ಎಡವಿದೆ. ಮಕ್ಕಳ ಭವಿಷ್ಯ ಹಾಳಾಗಿದ್ದು ಕಂಡು ನೋವಾಗಿದೆ. ದೆಹಲಿಯಲ್ಲಿ ಸಾರ್ವಜನಿಕ ಆಸ್ತಿ-ಪಾಸ್ತಿ ಹಾನಿಗೊಳಿಸಿ ಝೆನ್​-ಜಿ ನಡೆಸಿದ್ದ ಪ್ರತಿಭಟನೆಯ ರೀತಿ ಸರಿ ಇರಲಿಲ್ಲ. ಯಾವುದೇ ಹಾನಿ, ದೈಹಿಕ ನೋವಿಲ್ಲದೆ ಎದುರಾಳಿಯ ಸೋಲಿಸುವ ಚೆಸ್​ ಆಟದಂತಿರಬೇಕು ಪ್ರತಿಭಟನೆಯ ಸ್ವರೂಪ. ಸೋತೆವೆಂದು ಚೆಸ್​ ಕೈಬಿಡಬೇಡಿ. ಈ ಆಟದಲ್ಲಿ, ಓದಿನಲ್ಲಿ, ತಂದೆ-ತಾಯಿಯಲ್ಲಿ ಹಾಗೂ ದೇಶದ ಮೇಲೂ ಮನಸ್ಸಿಡಿ ಎಂದು ಅದಮಾರು ಮಠದ ಹಿರಿಯ ಯತಿ ವಿಶ್ವಪ್ರಿಯ ತೀರ್ಥ ಶ್ರೀಪಾದರು ನುಡಿದರು.

ಉಡುಪಿಯ ಪೂರ್ಣಪ್ರಜ್ಞಾ ಕಾಲೇಜ್​ನ ಸಭಾಂಗಣದಲ್ಲಿ ಪೂರ್ಣಪ್ರಜ್ಞ ಸಂಧ್ಯಾ ಕಾಲೇಜ್​ನ ವತಿಯಿಂದ ಸಂಸ್ಥೆಯ ವಜ್ರ ಮಹೋತ್ಸವದ ಸಂದರ್ಭದಲ್ಲಿ ಶುಕ್ರವಾರ (ಸೆ.11) ಆಯೋಜಿಸಿದ್ದ 2 ದಿನಗಳ ಮಂಗಳೂರು ವಿಶ್ವವಿದ್ಯಾನಿಲಯ ಅಂತರ್​ ಕಾಲೇಜ್​ಗಳ ಪುರುಷ&ಮಹಿಳಾ ವಿಭಾಗದ ಚೆಸ್​ ಚಾಂಪಿಯನ್​ಶಿಪ್​ ಉದ್ಘಾಟಿಸಿ ಆಶೀರ್ವಚನ ನೀಡಿದರು.

ಶಾಸಕ ಯಶ್​ಪಾಲ್​ ಸುವರ್ಣ ಮಾತನಾಡಿ, ಶಿಕ್ಷಣದೊಂದಿಗೆ ಕ್ರೀಡೆ, ಕಲೆ ಹಾಗೂ ಸಂಸ್ಕೃತಿಯಲ್ಲಿ ಮಕ್ಕಳನ್ನು ಸಂಪೂರ್ಣ ತೊಡಗಿಸಿಕೊಳ್ಳುವ ಮೂಲಕ ಪೂರ್ಣಪ್ರಜ್ಞ ಕಾಲೇಜ್​ ಮಾದರಿಯಾಗಿದೆ. ನಾನಿಂದು ಶಾಸಕನಾಗಿ ನಿಮ್ಮ ಮುಂದೆ ನಿಂತು ಮಾತನಾಡುತ್ತಿರುವುದರ ಹಿಂದೆ ಸಂಧ್ಯಾ ಕಾಲೇಜ್​ನ ಆಶೀರ್ವಾದವಿದೆ. ನಾನೂ ಸಹ ಇಲ್ಲಿಯೇ ಕಲಿತವನು. ಚೆಸ್​ ಕ್ರೀಡೆ ಬುದ್ಧಿಮತ್ತೆಯ ಆಟವಾಗಿದ್ದು ರಾಜ್ಯ-ರಾಷ್ಟ್ರಮಟ್ಟದಲ್ಲಿ ಸಾಧನೆ ಮಾಡಿ ಎಂದರು.

ಸಂಸ್ಥೆಯ ಗೌರವ ಕಾರ್ಯದರ್ಶಿ ಸಿಎ ಪ್ರಶಾಂತ್​ ಹೊಳ್ಳ, ಪೂರ್ಣಪ್ರಜ್ಞ ಕಾಲೇಜ್​ನ ಪ್ರಾಂಶುಪಾಲ ಪ್ರೊ.ರಾಮು ಎಲ್​., ಪೂರ್ಣಪ್ರಜ್ಞ ಪಿಯು ಕಾಲೇಜ್​ನ ಪ್ರಾಂಶುಪಾಲ ಸುರೇಶ್​ ತುಂಗ, ಕ್ರೀಡಾಕೂಟದ ಪರಿವೀಕ್ಷಕ ವಿವೇಕಾನಂದ ಕಾಲೇಜ್​ನ ದೈಹಿಕ ಶಿಕ್ಷಣ ನಿರ್ದೇಶಕ ರವಿಶಂಕರ್​, ಕಾಲೇಜ್​ನ ಐಕ್ಯೂಎಸಿ ಸಂಯೋಜಕ ರಾಘವೇಂದ್ರ ಎಲ್​., ಸಂಧ್ಯಾ ಕಾಲೇಜ್​ನ ದೈಹಿಕ ಶಿಕ್ಷಣ ನಿರ್ದೇಶಕ ಸೂರಜ್​ ಎಂ. ಉಪಸ್ಥಿತರಿದ್ದರು.

ವಿದ್ಯಾರ್ಥಿನಿಯರಾದ ಸಿಂಚನಾ, ನವ್ಯಾ ಹಾಗೂ ಪ್ರಾಂಜಲಿ ಪ್ರಾರ್ಥಿಸಿದರು. ವಾಣಿಜ್ಯಶಾಸ್ತ್ರ ವಿಭಾಗದ ಮುಖ್ಯಸ್ಥ ವಿನಾಯಕ್​ ಪೈ ಬಿ. ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಬಿಎ ಅಂತಿಮ ವಿದ್ಯಾರ್ಥಿ ದೇವರಾಜ್​ ಪುತ್ರನ್​ ಕಾರ್ಯಕ್ರಮ ನಿರೂಪಿಸಿದರು. ವಾಣಿಜ್ಯಶಾಸ್ತ್ರ ವಿಭಾಗದ ಪ್ರಾಧ್ಯಾಪಕ ಡಾ. ನಾಗರಾಜ್​ ವಂದಿಸಿದರು. 

"