ಉಡುಪಿ: ಹಿಂದಿನ ಮಕ್ಕಳು ಬೆಳೆದ ರೀತಿಗೂ, ಇಂದಿನ ಮಕ್ಕಳು ಬೆಳೆಯುತ್ತಿರುವ ರೀತಿಗೂ ಅಜಗಜಾಂತರವಿದೆ. ಇಂದಿನ ಬಹುತೇಕ ಮಕ್ಕಳಿಗೆ ಸಂಸ್ಕಾರದ ಅರಿವೂ ಇಲ್ಲ. ಬಾಲ್ಯದಲ್ಲಿಯೇ ಅವರಿಗೆ ಸಂಸ್ಕಾರ, ದುಡ್ಡಿನ ಮೌಲ್ಯ ತಿಳಿಸಿಕೊಡಬೇಕು. ಅಗತ್ಯ ಇದ್ದರೆ ಮಾತ್ರ ಅವರಿಗೆ ಮೊಬೈಲ್​ ಕೊಡಬೇಕು. ಪಾಲಕರೂ ಸಹ ಮಕ್ಕಳ ಜತೆ ಮಕ್ಕಳಂತೆಯೇ ಬೆರೆಯಬೇಕು ಎಂದು ಅಂತಾರಾಷ್ಟ್ರೀಯ ಮಯೂರ ವಿದ್ಯಾರತ್ನ ಪ್ರಶಸ್ತಿ ಪುರಸತ ಶಿಕ್ಷಕಿ ವಂದನಾ ರೈ ಕಾರ್ಕಳ ಸಲಹೆ ನೀಡಿದರು.

ಉಡುಪಿ ತಾಲೂಕಿನ ಪರ್ಕಳದ ಶ್ರೀ ವಿಘ್ನೇಶ್ವರ ಸಭಾಭವನದಲ್ಲಿ ಮಂಗಳ ಕಲಾ ಸಾಹಿತ್ಯ ವೇದಿಕೆ ಆಯೋಜಿಸಿದ್ದ 23ನೇ ವರ್ಷದ 'ಕಲಾ ಕೌಸ್ತುಭ' ಸಾಹಿತ್ಯ-ಸಾಂಸ್ಕೃತಿಕ ಹಬ್ಬ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಡಿಜಿಟಲ್​ ಕ್ರಿಯೇಟರ್​ ಮತ್ತು ಮಣಿಪಾಲ ಮಾಧವ ಕೃಪಾ ಶಾಲೆಯ ಶಿಕ್ಷಕಿ ಸಂಧ್ಯಾ ಕಾಮತ್​ ಮಾತನಾಡಿ, ಹೆಚ್ಚು ಅಂಕ ಗಳಿಸುವಂತೆ ಬಹುತೇಕ ಪಾಲಕರು ಒತ್ತಡ ಹಾಕುತ್ತಾರೆ. ಅದಕ್ಕಿಂತ ಮುಖ್ಯವಾಗಿ ಕೌಶಲ, ಬದುಕುವ ಕಲೆಯನ್ನು ಮಕ್ಕಳಿಗೆ ಕಲಿಸಬೇಕು. ಮನೆ, ಸಮಾಜದಲ್ಲಿ ಮಕ್ಕಳ ಪ್ರತಿಭೆಗೆ ನೀಡುವ ಪ್ರೋತ್ಸಾಹ ಶಾಲೆಯಲ್ಲಿ ಪ್ರತಿಫಲಿಸುತ್ತದೆ ಎಂದರು.

ಮಂಗಳೂರು ಆಕಾಶವಾಣಿಯ ನಿವೃತ್ತ ಸಹಾಯಕ ನಿರ್ದೇಶಕಿ ಡಾ. ಮಾಲತಿ ಆರ್​. ಭಟ್​, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ  ಸುಬ್ರಹ್ಮಣ್ಯ ಜಿ. ಭಟ್​ ಮಾತನಾಡಿದರು.

ಭಾಗವತ ಗಣೇಶ್​ ಆಚಾರ್ಯ ಬಿಲ್ಲಾಡಿ ಕಾರ್ಯಕ್ರಮ ಉದ್ಘಾಟಿಸಿದರು. ವೇದಿಕೆಯ ಸಂಚಾಲಕ ಮಂಜುನಾಥ್​ ಉಪಾಧ್ಯ ಪ್ರಾಸ್ತಾವಿಕವಾಗಿ ಮಾತನಾಡಿದರು. ವೇದಿಕೆಯ ಅಧ್ಯಕ್ಷ ನಟರಾಜ್​ ಪರ್ಕಳ ಸ್ವಾಗತಿಸಿದರು. ಅಶೋಕ್​ ಸಣ್ಣಕ್ಕಿ ಬೆಟ್ಟು ಕಾರ್ಯಕ್ರಮ ನಿರೂಪಿಸಿದರು. ಶ್ರೀನಿವಾಸ್​ ನಾಯಕ್​ ಚಕ್ರತಿರ್ಥ ವಂದಿಸಿದರು.