ಉಡುಪಿ: ಭಾರತೀಯ ರೆಡ್​ ಕ್ರಾಸ್​ ಸಂಸ್ಥೆಯ ಉಡುಪಿ ಜಿಲ್ಲಾ ಶಾಖೆಯ ಅಧ್ಯಕ್ಷರ ಶಾಸನಬದ್ಧ ಅಧಿಕಾರಾವಧಿ ಮುಗಿದಿದ್ದು, ವಾರ್ಷಿಕ ಮಹಾಸಭೆ (ಎಜಿಎಂ)ಯ ಚುನಾವಣೆ ನಡೆದು ಹೊಸ ಅಧ್ಯಕ್ಷರ ನೇಮಕ ಆಗುವವರೆಗೆ ಜಿಲ್ಲಾ ರೆಡ್​ ಕ್ರಾಸ್​ಗೆ ಆಡಳಿತಾಧಿಕಾರಿ ನೇಮಿಸಿ ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ. ಆದೇಶಿಸಿದ್ದಾರೆ.

ಸಂಸ್ಥೆಯ ಕಾರ್ಯ ಚಟುವಟಿಕೆ ಸುಗಮವಾಗಿ ನಡೆಯಬೇಕಿದ್ದರಿಂದ ಕುಂದಾಪುರ ಉಪವಿಭಾಗದ ಸಹಾಯಕ ಕಮಿಷನರ್​ ರಶ್ಮಿ ಎಸ್​.ಆರ್​. ಅವರನ್ನು ನೇಮಕಗೊಳಿಸಿ ಆ.18ರಂದು ಆದೇಶ ಹೊರಡಿಸಿದ್ದಾರೆ.

ಜಿಲ್ಲಾ ರೆಡ್​ಕ್ರಾಸ್​ನ ಪ್ರಸ್ತುತ ಅಧ್ಯಕ್ಷರು 2019 ಅ.5ರಿಂದ ಕಾರ್ಯನಿರ್ವಹಿಸುತ್ತಿದ್ದು, 2020ರ ನ.11ರಂದು ನಡೆದ ಸಭೆಯಲ್ಲಿ ಅವರ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡನೆಯಾಗಿದ್ದು, ಇನ್ನೋರ್ವ ಸದಸ್ಯರು ಜಿಲ್ಲಾಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡಿದ್ದರು. ಆದರೆ, ಪ್ರಸ್ತುತ ಅಧ್ಯಕ್ಷರು ಹೈಕೋರ್ಟ್​ಗೆ ರಿಟ್​ ಸಲ್ಲಿಸಿದ್ದು, ನ್ಯಾಯಾಲಯದ ಆದೇಶದಂತೆ ಮತ್ತೆ ಅಧ್ಯಕ್ಷರಾಗಿ ನಿಯೋಜಿತರಾಗಿದ್ದರು. ಅವರ ಅಧಿಕಾರಾವಧಿ 2022ರ ಅ.5ರಂದು ಮುಗಿದಿರುತ್ತದೆ. 

ಕಳೆದ ಮೇ 13ರಂದು ಸಂಸ್ಥೆಯ ಎಜಿಎಂ ನಡೆಸಲು ದಿನಾಂಕ ನಿಗದಿಪಡಿಸಿ ಎಲ್ಲ ಸದಸ್ಯರಿಗೆ ಪೋಸ್ಟ್​ ಮೂಲಕ ನೋಟಿಸ್ ರವಾನಿಸಲಾಗಿತ್ತು. ಆದರೆ, ನಾಲ್ವರು ಸದಸ್ಯರಿಗೆ ನೋಟಿಸ್​ ತಲುಪಿರಲಿಲ್ಲ. ಅವರು ಕಚೇರಿಗೆ ದೂರು ಸಲ್ಲಿಸಿದ್ದರಿಂದ ವಾರ್ಷಿಕ ಮಹಾಸಭೆ ನಡೆದಿರಲಿಲ್ಲ. ಬಹಳ ವರ್ಷದಿಂದ ಒಬ್ಬರೇ ಅಧ್ಯಕ್ಷರಾಗಿ ಮುಂದುವರಿದಿದ್ದರಿಂದ ಇನ್ನಿತರ ಸದಸ್ಯರ ಅಸಮಾಧಾನ ಹಾಗೂ ದೂರುಗಳು ಜಿಲ್ಲಾಧಿಕಾರಿಗೆ ಸಲ್ಲಿಕೆಯಾಗಿದ್ದವು. ಹೀಗಾಗಿ ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ. ಆಡಳಿತಾಧಿಕಾರಿ ನೇಮಿಸಿ ಆದೇಶಿಸಿದ್ದಾರೆ.