ಉಡುಪಿ: ಬ್ರಿಟಿಷರ ವಿರುದ್ಧ ಹೋರಾಡಿದ ಅನೇಕರನ್ನು ಗಲ್ಲಿಗೇರಿಸಿದ್ದಾರೆ. ಆದರೆ, ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣನನ್ನು ಗಲ್ಲಿಗೇರಿಸಿದ ಜಾಗ ದೈವಿಕ ಶಕ್ತಿ ಹೊಂದಿದೆ. ಆತ ವೀರ ಮರಣ ಹೊಂದಿದ ಶತಮಾನಗಳ ಬಳಿಕ ಆ.15ರಂದು ದೇಶ ಸ್ವತಂತ್ರವಾಯಿತು. ಈ ದಿನ ರಾಯಣ್ಣನ ಜನ್ಮದಿನ. ಜನವರಿ 26 ದೇಶದ ಗಣರಾಜ್ಯೋತ್ಸವ ಹಾಗೂ ಸಂವಿಧಾನ ಅಂಗೀಕಾರಗೊಂಡ ದಿನ. ಇದು ರಾಯಣ್ಣ ನಿಧನವಾದ ದಿನ. ಇದು ರಾಯಣ್ಣ ಅವರಲ್ಲಿದ್ದ ದೈವಿಕ ಶಕ್ತಿಯ ಪ್ರತೀಕವಾಗಿದೆ ಎಂದು ಮಾಜಿ ಸಚಿವ ಪ್ರಮೋದ್ ಮಧ್ವರಾಜ್ ತಿಳಿಸಿದರು.
ಉಡುಪಿಯ ಯಕ್ಷಗಾನ ಕಲಾರಂಗದ ಐವೈಸಿ ಸಭಾಭವನದಲ್ಲಿ ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಅಭಿಮಾನಿ ಬಳಗ ದಕ್ಷಿಣ ಕನ್ನಡ ಹಾಗೂ ಉಡುಪಿ ಜಿಲ್ಲೆ ವತಿಯಿಂದ ಭಾನುವಾರ (ಅ.12) ಸಂಜೆ ಆಯೋಜಿಸಿದ್ದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಖ್ಯಾತ ರಂಗಕರ್ಮಿ, ಸಂಘಟಕ ಉಡುಪಿಯ ರವಿರಾಜ ಎಚ್.ಪಿ. ಅವರಿಗೆ 'ಸಂಗೊಳ್ಳಿ ರಾಯಣ್ಣ' ಪ್ರಶಸ್ತಿ ವಿತರಿಸಿ ಮಾತನಾಡಿದರು.
ಪ್ರಾತ:ಸ್ಮರಣೀಯ ವ್ಯಕ್ತಿತ್ವ
ಕಾರ್ಯಕ್ರಮ ಉದ್ಘಾಟಿಸಿದ ಅಪರ ಜಿಲ್ಲಾಧಿಕಾರಿ ಅಬೀದ್ ಗದ್ಯಾಳ ಮಾತನಾಡಿ, ಜನರಲ್ಲಿ ಕವಿ ಹೃದಯವಿರಬೇಕು. ಪ್ರಾತ:ಸ್ಮರಣೀಯರಾದ ರಾಯಣ್ಣನ ಸ್ವಾಭಿಮಾನ, ಸ್ಫೂರ್ತಿ ಎಲ್ಲರಲ್ಲೂ ಇರಬೇಕು. ನಮ್ಮ ಮಕ್ಕಳಿಗೆ ಇಂತಹ ವೀರಪುರುಷರ ಯಶೋಗಾಥೆ ಹೇಳುವ ಮೂಲಕ ಸದಾ ಸನ್ಮಾರ್ಗದಲ್ಲಿ ಸಾಗುವ ಮನಸ್ಥಿತಿ ಮೂಡಿಸಬೇಕು ಎಂದರು.
ಸಾಹಿತಿ ಹಾಗೂ ಉರಗತಜ್ಞ ಗುರುರಾಜ ಸನಿಲ್ ಅಭಿನಂದನಾ ಮಾತುಗಳನ್ನಾಡಿದರು. ರಂಜಿನಿ ವಸಂತ್ ಪ್ರಶಸ್ತಿ ಪತ್ರ ವಾಚಿಸಿದರು.
ಸಂಘಟನೆಯ ಜಿಲ್ಲಾಧ್ಯಕ್ಷ ಸಿದ್ಧಬಸಯ್ಯಸ್ವಾಮಿ ಚಿಕ್ಕಮಠ ಅಧ್ಯಕ್ಷತೆ ವಹಿಸಿದ್ದರು. ಉಡುಪಿ ಗಾಂಧಿ ಆಸ್ಪತ್ರೆಯ ಸಂಸ್ಥಾಪಕ ಡಾ. ಹರಿಶ್ಚಂದ್ರ, ಡಾ. ಶಿವರಾಮ ಕಾರಂತ ಟ್ರಸ್ಟ್ನ ಅಧ್ಯಕ್ಷ ಡಾ. ಗಣನಾಥ ಶೆಟ್ಟಿ ಎಕ್ಕಾರು, ಸಂಸ್ಕೃತಿ ವಿಶ್ವ ಪ್ರತಿಷ್ಠಾನದ ಸ್ಥಾಪಕ ಯು.ವಿಶ್ವನಾಥ ಶೆಣೈ, ಜಿಲ್ಲಾ ಸಂಘಟನೆಯ ಕಾರ್ಯಾಧ್ಯಕ್ಷ ಕುಮಾರ ಪ್ರಸಾದ, ಉಪಾಧ್ಯಕ್ಷ ಲಕ್ಷ್ಮಣ ಕೋಲ್ಕಾರ ಉಪಸ್ಥಿತರಿದ್ದರು.
ರಂಜಿನಿ ವಸಂತ್ ಮತ್ತು ದೀಪಾ ಕರ್ಕಿ ನಾಡಗೀತೆ ಹಾಡಿದರು. ರಾಜೇಶ್ ಭಟ್ ಪಣಿಯಾಡಿ ಸ್ವಾಗತಿಸಿದರು. ಸಂಘಟನೆಯ ಗೌರವಾಧ್ಯಕ್ಷ ಜನಾರ್ದನ ಕೊಡವೂರು ಪ್ರಾಸ್ತಾವಿಕವಾಗಿ ಮಾತನಾಡಿ, ಉಡುಪಿಯಲ್ಲಿ ಯಾವುದಾದರೂ ವೃತ್ತಕ್ಕೆ ರಾಯಣ್ಣ ಹೆಸರಿಡಬೇಕು ಎಂದರು. ರಾಘವೇಂದ್ರ ಪ್ರಭು ಕರ್ವಾಲು ಕಾರ್ಯಕ್ರಮ ನಿರೂಪಿಸಿದರು. ಸತೀಶ ಕೊಡವೂರು ವಂದಿಸಿದರು.
ಸಭಾ ಕಾರ್ಯಕ್ರಮಕ್ಕೂ ಮೊದಲು ಪಿ. ಕಾಳಿಂಗ ರಾವ್ ಅವರ ಮೊಮ್ಮಗ, ಖ್ಯಾತ ಗಾಯಕ ರಾಜೇಶ ಶಾನಭಾಗ ಬಾರ್ಕೂರು ಅವರಿಂದ ಕನ್ನಡಮಯ ಹಾಡು, ಭಾವಗೀತೆಗಳನ್ನು ಒಳಗೊಂಡ ಸುಮಧುರ ಗಾಯನ ನಡೆಯಿತು.
ರಾಯಣ್ಣನ ಹೆಸರೇ ಒಂದು ಶಕ್ತಿ, ಸ್ವಾಭಿಮಾನ. ಈ ಶ್ರೇಷ್ಠ ಪ್ರಶಸ್ತಿಯನ್ನು ಹೃದಯದಲ್ಲಿಟ್ಟು ಕಾಪಾಡುತ್ತೇನೆ. ಇದು ಸಾಮಾಜಿಕ ಹೊಣೆಗಾರಿಕೆಯನ್ನು ಇನ್ನಷ್ಟು ಹೆಚ್ಚಿಸಿದೆ. ನನ್ನೆಲ್ಲ ಸಾಧನೆಗೆ ಸಹಕರಿಸಿದ ಎಲ್ಲರಿಗೂ ಈ ಕ್ಷಣ ಕೃತಜ್ಞತೆ ಸಲ್ಲಿಸುತ್ತೇನೆ.ರವಿರಾಜ ಎಚ್.ಪಿ. ಪ್ರಶಸ್ತಿ ಪುರಸ್ಕೃತ ರಂಗಕರ್ಮಿ.