ಇತಿಹಾಸ ಪುಟ ಸೇರಿದ ಕಮಿಲ ಶಾಲೆ

ಸುಳ್ಯ ತಾಲೂಕಿನಲ್ಲಿ ಅಧಿಕೃತವಾಗಿ ಏಳು ಶಾಲೆಗಳ ಬಾಗಿಲು ಮುಚ್ಚಿದ್ದು ಅದರಲ್ಲಿ ಗುತ್ತಿಗಾರು ಗ್ರಾಪಂ ವ್ಯಾಪ್ತಿಯ ಎರಡು ಶಾಲೆಗಳಿದ್ದವು. ಈಗ ಇದೇ ಗ್ರಾಮದ ಕಮಿಲ ಶಾಲೆಯೂ ಬಾಗಿಲು ಮುಚ್ಚಿದೆ. ಶೈಕ್ಷಣಿಕ ವರ್ಷ ಆರಂಭಗೊಂಡು 30 ದಿನಗಳ ಬಳಿಕ ವಿದ್ಯಾರ್ಥಿಗಳ ಕೊರತೆಯಿಂದಾಗಿ ಕಮಿಲ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆ ಬಂದ್ ಆಗಿದೆ.

1961ರಲ್ಲಿ ಆರಂಭವಾಗಿ ಆರು ದಶಕ ಗ್ರಾಮೀಣ ಭಾಗದ ಸಹಸ್ರಾರು ವಿದ್ಯಾರ್ಥಿಗಳ ಬಾಳಿಗೆ ಬೆಳಕಾಗಿದ್ದ ಕಮಿಲ ಶಾಲೆ ಇದೀಗ ಇತಿಹಾಸ ಪುಟ ಸೇರಿದೆ. ಶಾಲೆಗೆ 0.81 ಸೆಂಟ್ಸ್ ಸ್ವಂತ ಜಾಗವಿದೆ. ಶಾಲಾ ಕಟ್ಟಡ, ಉತ್ತಮ ವೇದಿಕೆ, ಶಾಲಾ ಮೈದಾನ, ಹತ್ತಿರದಲ್ಲೇ ಅಂಗನವಾಡಿಯೂ ಇದೆ. ಇಷ್ಟೆಲ್ಲ ಸೌಲಭ್ಯಗಳಿದ್ದರೂ ಶಾಲೆಗೆ ಮಕ್ಕಳ ಕೊರತೆಯಿದೆ. ಅಂಗನವಾಡಿಯಲ್ಲೂ ಹೆಚ್ಚು ಮಕ್ಕಳಿಲ್ಲ.

ಕಾಯಂ ಶಿಕ್ಷಕರಿಲ್ಲದೆ ದಿನಕ್ಕೊಬ್ಬರು ಶಿಕ್ಷಕರು ಪಾಠ ಮಾಡುತ್ತಿದ್ದರು. ದಿನಕ್ಕೊಬ್ಬರು ಪಾಠ ಮಾಡಿದರೆ ಮಕ್ಕಳ ಓದಿಗೆ ತೊಂದರೆಯಾಗುತ್ತದೆ ಎಂಬುದನ್ನು ತಿಳಿದ ಪಾಲಕರು ಮಕ್ಕಳನ್ನು ಈ ಶಾಲೆಗೆ ಕಳುಹಿಸಲು ನಿರುತ್ಸಾಹ ತೋರಿದ್ದಾರೆ. ಅತಿಥಿ ಶಿಕ್ಷಕರೊಬ್ಬರು ಒಂದು ದಿನ ಬಂದವರು ಮತ್ತೆ ಇಲ್ಲಿಗೆ ಬರಲೇ ಇಲ್ಲ. ಇದರಿಂದ ಬೇಸತ್ತ ಪಾಲಕರು ಇದ್ದ ಬೆರಳೆಣಿಯ ಮಕ್ಕಳನ್ನೂ ಬೇರೆ ಶಾಲೆಗೆ ಸೇರಿಸಿದ್ದರಿಂದ ಇಲ್ಲಿ ಮಕ್ಕಳೇ ಇಲ್ಲದೆ ಶಾಲೆ ಶಾಶ್ವತವಾಗಿ ಮುಚ್ಚಿದೆ. ಆರು ವರ್ಷಗಳಿಂದ ಇಲ್ಲಿಗೆ ಪೂರ್ಣಕಾಲಿಕ ಶಿಕ್ಷಕರನ್ನು ನೀಡದೆ ಬೇರೆ ಶಾಲೆ ಶಿಕ್ಷಕರನ್ನು ನಿಯೋಜಿಸಿ ಶಾಲೆ ನಡೆಸಲಾಗುತ್ತಿತ್ತು. ಹೀಗೆ ಶಿಕ್ಷಕರು ಇಲ್ಲದೇ ಮಕ್ಕಳೂ ಬಾರದೆ ವಿದ್ಯಾದೇಗುಲಕ್ಕೆ ಶಾಶ್ತತವಾಗಿ ಬೀಗ ಬಿದ್ದಿದೆ.