ಕಾಡೂರು ಸೀತಾರಾಮ ಶಾಸ್ತ್ರಿಗೆ 'ಸುಶಾಸನ' ಪುರಸ್ಕಾರ

ಉಡುಪಿ: ಶ್ರೀಕೃಷ್ಣ ಮಠದ ರಾಜಾಂಗಣದಲ್ಲಿ ಪರ್ಯಾಯ ಶೀರೂರು ಮಠದ ಆಶ್ರಯದಲ್ಲಿ "ಸುಶಾಸನ ಉಡುಪಿ' ಪ್ರಸ್ತುತ ಪಡಿಸುವ ಉಡುಪಿ ಸುಧಾಕರ್​ ಆಚಾರ್ಯ ಅವರ ಕಲಾರಾಧನೆಯ 36ನೇ ವರ್ಷದ 'ಸ್ವಾತಂತ್ರ್ಯೋತ್ಸವ ತಾಳಮದ್ದಳೆ'ಯ ಆಚರಣೆ ಆ.15ರಂದು ಮಧ್ಯಾಹ್ನ 1 ಗಂಟೆಗೆ ನಡೆಯಲಿದೆ. ಖ್ಯಾತ ಅರ್ಥಧಾರಿಗಳ ಉಪಸ್ಥಿತಿಯಲ್ಲಿ 'ಕೃಷ್ಣಾರ್ಪಣ' ತಾಳಮದ್ದಳೆ ನಡೆಯಲಿದೆ.

ಪುತ್ತೂರಿನ ಯಕ್ಷರಂಗ ಸಂಸ್ಥೆಯ ಹಾಗೂ ಪುತ್ತೂರು ನಗರ ಹವ್ಯಕ ಸಂಘಟನೆಯ ಅಧ್ಯಕ್ಷ, ತಾಳಮದ್ದಳೆ ಸಂಘಟಕ ಹಾಗೂ ಉದ್ಯಮಿಯಾದ ಕಾಡೂರು ಸೀತಾರಾಮ ಶಾಸ್ತ್ರಿ ಅವರಿಗೆ ಸುಶಾಸನ ಗೌರವ ಪುರಸ್ಕಾರವನ್ನು ಸಂಜೆ 6 ಗಂಟೆಗೆ ವೇದವರ್ಧನ ಶ್ರೀಗಳು ಪ್ರದಾನ ಮಾಡಲಿದ್ದಾರೆ.

ಸ್ವಾತಂತ್ರ್ಯೋತ್ಸವ ತಾಳಮದ್ದಳೆಯಲ್ಲಿ ದಾಖಲೆಯ ನಿರಂತರ 25 ವರ್ಷ ಭಾಗವತಿಕೆ ಮಾಡಿದ್ದ ದಿ. ದಿನೇಶ್​ ಅಮ್ಮಣ್ಣಾಯ ಅವರ ಸ್ಮರಣಾರ್ಥ ಸಂಜೆ 7ರಿಂದ ಮಧ್ಯರಾತ್ರಿ 1 ಗಂಟೆಯ ವರೆಗೆ 'ಸ್ಮೃತಿ' ಕಾರ್ಯಕ್ರಮ ಆಯೋಜಿಸಲಾಗಿದೆ.

ಅಮ್ಮಣ್ಣಾಯ ಹಿಟ್ಸ್​, ಎವರ್​ಗ್ರೀನ್​ ಪ್ರಸಂಗಗಳಾದ ಸತ್ಯಹರಿಶ್ಚಂದ್ರ, ಮಾನಿಷಾದ, ಅಕ್ಷಯಾಂಬರ ಪ್ರದರ್ಶನಗೊಳ್ಳಲಿದೆ. ಭಾಗವತಿಕೆಯಲ್ಲಿ ಪಟ್ಲ ಸತೀಶ್​ ಶೆಟ್ಟಿ, ರವಿಚಂದ್ರ ಕನ್ನಡಿಕಟ್ಟೆ, ಡಾ. ಪ್ರಖ್ಯಾತ್​ ಶೆಟ್ಟಿ, ಭರತರಾಜ್​ ಶೆಟ್ಟಿ ಸಿದ್ಧಕಟ್ಟೆ ಹಾಗೂ 44 ಶ್ರೇಷ್ಠ ಕಲಾವಿದರು ಪಾಲ್ಗೊಳ್ಳಲಿದ್ದಾರೆ ಎಂದು ಸಂಸ್ಥೆಯ ಪ್ರಕಟಣೆ ತಿಳಿಸಿದೆ.