ಉಡುಪಿ: ಇಂದಿನ ಯುವ ಸಮುದಾಯಕ್ಕೆ ನಿರೀಕ್ಷೆಯಂತೆ ಸರ್ಕಾರಿ ಉದ್ಯೋಗ ಕೊಡುವ ಸ್ಥಿಯಲ್ಲಿ ಸರ್ಕಾರಗಳಿಲ್ಲ. ಹೀಗಾಗಿ ಖಾಸಗಿ ಉದ್ಯಮಗಳೇ ಆಧಾರವಾಗಿದೆ. ಆ ನಿಟ್ಟಿನಲ್ಲಿ ವಿಕೆ ಫರ್ನಿಚರ್​ ಆ್ಯಂಡ್​ ಇಲೆಕ್ಟ್ರಾನಿಕ್ಸ್​ ಸಂಸ್ಥೆಯು ಯುವತಿಯರಿಗೆ ಆಸರೆಯಾಗಿದೆ. ಶ್ರಮ ಪಟ್ಟರೆ ಯಶಸ್ಸು ಖಂಡಿತ ಎನ್ನುವುದಕ್ಕೆ ವಿಕೆ ಸಂಸ್ಥೆಯ ಪ್ರವರ್ತಕ ವಿಠ್ಠಲ್​ ಕುಲಾಲ್​ ಅವರೇ ಪ್ರೇರಣೆ. 'ವಿಕೆ' ಅಂದರೆ ಗೆಲುವು-ಭವಿಷ್ಯ, ವಿಶ್ವಾಸಾರ್ಹ ಸಂಸ್ಥೆ ಎಂದು ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಅಭಿಪ್ರಾಯಪಟ್ಟರು.

ಉಡುಪಿ ಕುಂಜಿಬೆಟ್ಟು ಕಡಿಯಾಳಿಯಲ್ಲಿ ರಾಷ್ಟ್ರೀಯ ಹೆದ್ದಾರಿ ಪಕ್ಕದಲ್ಲಿಯೇ ನಿರ್ಮಾಣಗೊಂಡ ದಕ್ಷಿಣ ಕನ್ನಡದಲ್ಲಿ ಫರ್ನಿಚರ್​ ಮತ್ತು ಇಲೆಕ್ಟ್ರಾನಿಕ್ಸ್​ ಕ್ಷೇತ್ರದಲ್ಲಿ ಮನೆಮಾತಾಗಿರುವ 'ವಿಕೆ ಫರ್ನಿಚರ್​ ಆ್ಯಂಡ್​ ಇಲೆಕ್ಟ್ರಾನಿಕ್ಸ್​'ನ ನೂತನ ಹಾಗೂ ವಿಸ್ತೃತ 6ನೇ ಮಳಿಗೆಯನ್ನು ಶನಿವಾರ (ಜು.4) ಉದ್ಘಾಟಿಸಿ ಮಾತನಾಡಿದರು.

ಶ್ರಮಪಡುವವರಿಗೆ ದೇವರು ಹೆಚ್ಚಿನ ಶಕ್ತಿ ಕೊಡುತ್ತಾನೆ. ಉಡುಪಿಯ ಅಭಿವೃದ್ಧಿಗೆ ಹೊಸ ಸ್ಪರ್ಶ ನೀಡಲಿರುವ ವಿಕೆ ಫರ್ನಿಚರ್​ ಮಳಿಗೆ ಗ್ರಾಹಕರಿಗೆ ಉತ್ತಮ ಸೇವೆ ಒದಗಿಸುವ ಮೂಲಕ ರಾಜ್ಯ-ದೇಶ ಮಟ್ಟದಲ್ಲಿ ಖ್ಯಾತಿ ಗಳಿಸಲಿ. ಅವರ ಉದ್ಯಮ ಇನ್ನಷ್ಟು ಬೆಳೆಯುವಂತೆ ಉಡುಪಿ ಶ್ರೀಕೃಷ್ಣನ ಅನುಗ್ರಹ ಸದಾ ಇರಲಿ ಎಂದು ಹಾರೈಸಿದರು.

ಶಾಸಕ ಯಶಪಾಲ್​ ಸುವರ್ಣ ಮಾತನಾಡಿ, ಉಡುಪಿ-ಮಣಿಪಾಲ ಅವಳಿ ನಗರ ದೇಶದಲ್ಲೇ ಅತಿ ವೇಗವಾಗಿ ಬೆಳೆಯುತ್ತಿದೆ. ಅಗಲ ಕಿರಿದಾದ ರಸ್ತೆ ಹೊಂದಿದ್ದ ಉಡುಪಿ ನಗರದ ಚಹರೆ ದಿ. ಡಾ. ವಿ.ಎಸ್​. ಆಚಾರ್ಯರ ಅಭಿವೃದ್ಧಿಯ ಕನಸಿನ ಫಲವಾಗಿ ಬದಲಾಗಿದೆ. ಇಂತಹ ಉಡುಪಿಯಲ್ಲಿ ವಿಕೆ ಫರ್ನಿಚರ್​ ಆ್ಯಂಡ್​ ಇಲೆಕ್ಟ್ರಾನಿಕ್ಸ್​ ಮಳಿಗೆ ಆರಂಭಗೊಂಡಿದ್ದು ಗ್ರಾಹಕರಿಗೆ ಅನುಕೂಲ ಆಗಲಿದೆ. ಉಡುಪಿಯ ಮುಕುಟಕ್ಕೆ ವಿಕೆ ಸಂಸ್ಥೆಯೂ ಇದೀಗ ಮತ್ತೊಂದು ಗರಿಯಾಗಿ ಸೇರಿದೆ. ಉಡುಪಿಯ ಸಮಗ್ರ ಅಭಿವೃದ್ಧಿಗೆ ವಿಠ್ಠಲ್​ ಕುಲಾಲ್​ ಅವರ ತಂಡ ಕೈಜೋಡಿಸಲಿ ಎಂದು ಆಶಿಸಿದರು.

ಬಿಜೆಪಿ ದಕ್ಷಿಣ ಕನ್ನಡ ಜಿಲ್ಲಾಧ್ಯಕ್ಷ ಸತೀಶ್​ ಕುಂಪಲ ಮಾತನಾಡಿದರು. ಉಜ್ವಲ್​ ಡೆವಲಪರ್ಸ್​ ಸಂಸ್ಥೆಯ ಅಜಯ್​ ಪಿ.ಶೆಟ್ಟಿ, ಉದ್ಯಮಿ ಕೆ.ಎಂ. ಶೆಟ್ಟಿ, ಅಲೆಕ್ಸಿಸ್​ ಕ್ಯಾಸ್ಟಲಿನೋ, ವಿಕೆ ಸಂಸ್ಥೆಯ ಪ್ರವರ್ತಕರಾದ ವಿಠ್ಠಲ್​ ಕುಲಾಲ್​ ಹಾಗೂ ವಿನುತಾ ವಿಠ್ಠಲ್​ ಕುಲಾಲ್​, ಪುತ್ರರಾದ ಹಾರ್ದಿಕ್​ ವಿ.ಕೆ., ಮನಿಷ್ಕ್​ ವಿ.ಕೆ. ಉಪಸ್ಥಿತರಿದ್ದರು.

ಕಟ್ಟಡದ ಮಾಲೀಕ ಕಲ್ಯಾಣ್​ಸಿಂಗ್​ ಕೊಜರಂ ಅವರನ್ನು ಸನ್ಮಾನಿಸಲಾಯಿತು. ಚೇತನ್​ ಶೆಟ್ಟಿ ಕಾರ್ಯಕ್ರಮ ನಿರೂಪಿಸಿದರು.

"

ಅರಬ್ಬಿ ಸಮುದ್ರ, ಪಶ್ಚಿಮ ಘಟ್ಟದಿಂದಾಗಿ ಭೂಪ್ರದೇಶ ಕಡಿಮೆ ಇರುವ ಉಡುಪಿ ಜಿಲ್ಲೆಯಲ್ಲಿ ಕೈಗಾರಿಕೆಯ ವಿಸ್ತರಣೆ ಸುಲಭವಲ್ಲ. ಪ್ರವಾಸೋದ್ಯಮಕ್ಕೆ ಉಜ್ವಲ ಅವಕಾಶವಿದೆ. ಪರಿಸರ ಸ್ನೇಹಿ ಉದ್ಯೋಗ ಲಭಿಸುವಂತಾಗಲು ಐಟಿ ಪಾರ್ಕ್​ಗೆ ಅವಕಾಶ ನೀಡಬೇಕು. ಜಿಲ್ಲೆಯು ಆರೋಗ್ಯ, ಶೈಕ್ಷಣಿಕ ಹಾಗೂ ಬ್ಯಾಂಕಿಂಗ್​ ಕ್ಷೇತ್ರದಲ್ಲಿ ದೇಶಕ್ಕೆ ಮಾದರಿಯಾಗಿದೆ. ನಾವು ಉದ್ಯಮದಲ್ಲಿ ಗಳಿಸಿದ ಹಣಕ್ಕಿಂತ ಎಷ್ಟು ಮಂದಿಗೆ ಉದ್ಯೋಗ ಕೊಟ್ಟಿದ್ದೇವೆ ಎನ್ನುವುದು ಮುಖ್ಯ. ವಿಕೆ ಸಂಸ್ಥೆಯು ಅನೇಕರ ಜೀವನ ನಿರ್ವಹಣೆಗೆ ಆಸರೆಯಾಗಿದೆ.

— ಮನೋಹರ್​ ಶೆಟ್ಟಿ. ಸಾಯಿರಾಧಾ ಸಮೂಹ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ.