ಬಡವರಿಗೆ ಮಾಡಿದ ಸಹಾಯದಿಂದ ಸಂತಸ

ಉಡುಪಿ: ನನ್ನ ತಂದೆ ಕಡು ಬಡತನದಿಂದಾಗಿ ಮುಂಬಯಿಗೆ ಹೋಗಿ ಹೋಟೆಲ್​ ಆರಂಭಿಸಿ ಜೀವನ ನಡೆಸಿದ್ದರು. ಪರೋಪಕಾರಿಯಾಗಿದ್ದ ಅವರ ಸ್ಮರಣೆಯಲ್ಲಿ ಬಡವರಿಗೆ ಸಹಾಯ ಮಾಡಬೇಕೆಂದು ನಾನು ನನ್ನ ಮಡದಿ ಪ್ರೇಮಾ ಅಪೇಕ್ಷೆ ಪಟ್ಟಿದ್ದೆವು. ಬಡ ವಿದ್ಯಾರ್ಥಿಗಳಿಗೆ ವಿದ್ಯಾಪೋಷಕ್​ ಸಂಸ್ಥೆ ಮನೆ ಕಟ್ಟಿಸಿಕೊಡುವ ವಿಷಯ ರಘುರಾಮ್​ ಆಚಾರ್ಯರಿಂದ ತಿಳಿಯಿತು. ಕಾಲ ಕೂಡಿ ಬಂದು ಮನೆ ಸಜ್ಜಾಗಿದೆ. ಬಡವರಿಗೆ ಮಾಡಿದ ಸಹಾಯದಿಂದ ನಾವ ಸಂತಸಗೊಂಡಿದ್ದೇವೆ ಎಂದು ಪ್ರಾಯೋಜಕ ಮುಂಬಯಿಯ ಸುಂದರ್​ ರಾವ್​ ತಿಳಿಸಿದರು.

ಉಡುಪಿಯ ಯಕ್ಷಗಾನ ಕಲಾರಂಗದ ವಿದ್ಯಾಪೋಷಕ್​ನ ದ್ವಿತೀಯ ಪಿಯುಸಿ ವಿದ್ಯಾರ್ಥಿನಿ, ಮಂಜುನಾಥ್​ ಖಾರ್ವಿ ಮತ್ತು ಅನಿತಾ ದಂಪತಿ ಪುತ್ರಿ ಮನೀಷಾ ಖಾರ್ವಿ ಇವಳಿಗೆ ಗಂಗೊಳ್ಳಿಯಲ್ಲಿ ತನ್ನ ಮಾತಾ&ಪಿತೃರಾದ ಜಲಜಾಕ್ಷಿ ಮತ್ತು ರಾಘವೇಂದ್ರ ರಾವ್​ ಸ್ಮರಣೆಯಲ್ಲಿ ನಿರ್ಮಿಸಿದ 'ಶ್ರೀ ರಾಘವೇಂದ್ರ ನಿಲಯ' ಮನೆಯನ್ನು ಶುಕ್ರವಾರ (ಜೂ.12) ಉದ್ಘಾಟಿಸಿ ಮಾತನಾಡಿದರು.

ಕೊಲೆಕಾಡಿಯ ವೇದಮೂರ್ತಿ ವಾದಿರಾಜ ಉಪಾಧ್ಯಾಯ ಮಾತನಾಡಿ, ಯಕ್ಷಗಾನ ಕಲಾರಂಗ ಸಂಯೋಜಿಸುವ ಒಳ್ಳೆಯ ಆಟಗಳಲ್ಲಿ ಭಾಗವಹಿಸಿ ಆನಂದ ಅನುಭವಿಸಿದ್ದೆ. ಅವರ ಸಾಮಾಜಿಕ ಕಳಕಳಿಯ ಬಗ್ಗೆಯೂ ಕೇಳಿದ್ದೆ. ಇದೀಗ ಪ್ರತ್ಯಕ್ಷ ನೋಡುವ ಅವಕಾಶ ಒದಗಿತು. ಅವರ ಕಾರ್ಯ ಅನನ್ಯ ಎಂದರು.

ಪೇಜಾವರ ಮಠದ ದಿವಾನ ರಘುರಾಮ್​ ಆಚಾರ್ಯ ಮಾತನಾಡಿದರು. ಸುಶೀಲಾ ಮುಗೆರಾಯ, ಎಚ್​.ವಿ. ರಮಾದೇವಿ, ಗೀತಾ ಆರ್​. ಆಚಾರ್ಯ, ಗ್ರಾಪಂ ಅಧ್ಯಕ್ಷೆ ಜಯಂತಿ ಉಪಸ್ಥಿತರಿದ್ದರು.

ಸಂಸ್ಥೆಯ ಅಧ್ಯಕ್ಷ ಎಂ. ಗಂಗಾಧರ ರಾವ್​ ಸ್ವಾಗತಿಸಿದರು. ನಾರಾಯಣ ಎಂ. ಹೆಗಡೆ ವಂದಿಸಿದರು. ಕಾರ್ಯದರ್ಶಿ ಮುರಲಿ ಕಡೆಕಾರ್​ ಪ್ರಾಸ್ತಾವಿಕವಾಗಿ ಮಾತನಾಡಿ ಕಾರ್ಯಕ್ರಮ ನಿರೂಪಿಸಿದರು.

"

ವಿದ್ಯಾಪೋಷಕ್​ ಮೂಲಕ ಸಂಸ್ಥೆ ಮಾಡುತ್ತಿರುವ ಕಾರ್ಯ ಅಗಾಧವಾದುದು. ನಾನು ಆಡಳಿತ ಸಮಿತಿಯ ಸದಸ್ಯನಾಗಿರುವ ಕಾಲೇಜುಗಳಲ್ಲಿ ಕಲಿಯುತ್ತಿರುವ ವಿದ್ಯಾಪೋಷಕ್​ ವಿದ್ಯಾರ್ಥಿಗಳ ಕಾಲೇಜು ಶುಲ್ಕದಲ್ಲಿ ರಿಯಾಯಿತಿ ಮಾಡಿಸಲು ಪ್ರಯತ್ನಿಸುತ್ತೇನೆ.

— ಸೀತಾರಾಮ ನಕ್ಕತ್ತಾಯ. ಕುಂದಾಪುರದ ಓಂ ಟೈಲ್ಸ್​ನ ಮಾಲೀಕ.