ನೊಂದವರಿಗೆ ಸ್ಪಂದಿಸುವ ಯಕ್ಷಗಾನ ಕಲಾರಂಗ ಮಾದರಿ

ಉಡುಪಿ: ಯಕ್ಷಗಾನ ಕಲಾರಂಗವು ಸಮಾಜದಲ್ಲಿ ನೊಂದವರಿಗೆ ಸ್ಪಂದಿಸುವ ರೀತಿ ಎಲ್ಲ ಸಂಸ್ಥೆಗಳಿಗೂ ಮಾದರಿಯಾಗಿದೆ. ಅವರ ವಿದ್ಯಾಪೋಷಕ್​ನ ಫಲಾನುಭವಿಗಳ ಆಯ್ಕೆಯಾಗಿ ವಿದ್ಯಾರ್ಥಿಗಳ ಮನೆ ಭೇಟಿ ಮಾಡುವುದು ಅವರ ಆಯ್ಕೆ ಪ್ರಕ್ರಿಯೆಯ ಪಾರದರ್ಶಕತ್ವದ ಪ್ರತಿಕವಾಗಿದೆ. ಕತ್ತಲೆಯ ಹಾದಿಯಲ್ಲಿ ನಡೆಯಬಹುದು. ಆದರೆ, ಕನಸಿಲ್ಲದ ಹಾದಿಯಲ್ಲಿ ನಡೆಯಲಾಗದು ಎಂದು ಕೊಲ್ಲೂರು ಮೂಕಾಂಬಿಕಾ ದೇವಳದ ಮಾಜಿ ಧರ್ಮದರ್ಶಿ, ಉದ್ಯಮಿ ಹಾಗೂ ಶಿಕ್ಷಣ ಪ್ರೇಮಿ ಕೆರಾಡಿ ಚಂದ್ರಶೇಖರ್​ ಶೆಟ್ಟಿ ಅನಿಸಿಕೆ ವ್ಯಕ್ತಪಡಿಸಿದರು.

ಉಡುಪಿಯ ಯಕ್ಷಗಾನ ಕಲಾರಂಗ ವಿದ್ಯಾಪೋಷಕ್​ನ ದ್ವಿತೀಯ ಪಿಯುಸಿ ವಿದ್ಯಾರ್ಥಿನಿ, ಶ್ಯಾಮಲಾ ಮತ್ತು ಚಂದ್ರ ನಾಯ್ಕ್​ ಅವರ ಪುತ್ರಿ ಸಿಂಚನಾಳಿಗೆ ಕುಂದಾಪುರ ತಾಲೂಕಿನ ಕೆರಾಡಿಯಲ್ಲಿ ಉಡುಪಿಯ ಸಾಮಾಜಿಕ ಕಳಕಳಿಯ ಐವರು ಮಿತ್ರರ ಪ್ರಾಯೋಜಕತ್ವದಲ್ಲಿ ನಿರ್ಮಿಸಿಕೊಟ್ಟ ಹಾಗೂ ಯೋಜನೆಯ 95ನೇ ಮನೆ 'ಪಂಚಮ್​' ಉದ್ಘಾಟಿಸಿ ಮಾತನಾಡಿದರು.

ಮನೆಯ ಪ್ರಾಯೋಜಕತ್ವ ವಹಿಸಿದ್ದ ಎ.ಜಿ. ಅಸೋಸಿಯೇಟ್ಸ್​ನ ಆರ್ಕಿಟೆಕ್ಟ್​ ಯೋಗಿಶ್ಚಂದ್ರಧರ್​, ಇಂಜಿನಿಯರ್​ ಎಂ. ಗೋಪಾಲ್​ ಭಟ್​, ಸ್ಪ್ಯಾನ್​ ಅಸೋಸಿಯೇಟ್ಸ್​ನ ಇಂಜಿನಿಯರ್​ ಪಾಂಡುರಂಗ ಆಚಾರ್​, ಪದ್ಮಶ್ರೀ ಕನ್​ಸ್ಟ್ರಕ್ಷನ್ಸ್​ನ ಇಂಜಿನಿಯರ್​ ಹರಿಪ್ರಸಾದ್​ ಶೆಟ್ಟಿ ಮಾತನಾಡಿ, ಗ್ರಾಮೀಣ ಪ್ರದೇಶದ ಕನ್ನಡ ಮಾಧ್ಯಮದಲ್ಲಿ ಓದಿದ ವಿದ್ಯಾರ್ಥಿಗಳು ಕೀಳರಿಮೆಗೆ ಒಳಗಾಗಬಾರದು. ಸಾಧನೆಯ ಮೂಲಕ ಸಮಾಜದಲ್ಲಿ ಪ್ರತಿಷ್ಠೆಯ ಸ್ಥಾನ ಗಳಿಸಿದವರು ಅನೇಕರು ಇದ್ದಾರೆ. ವಿದ್ಯಾಪೋಷಕ್​ನಂತಹ ಸಂಸ್ಥೆ ಇರುವಾಗ ಅಳುಕಬೇಕಿಲ್ಲ. ಚೆನ್ನಾಗಿ ಓದಿ, ಮುಂದೆ ನೀನೂ ಸಹ ದಾನಿಯಾಗು ಎಂದು ಸಿಂಚನಾಳಿಗೆ ಕಿವಿಮಾತು ಹೇಳಿದರು.

ಸಂಸ್ಥೆಯ ಉಪಾಧ್ಯಕ್ಷ ವಿ.ಜಿ. ಶೆಟ್ಟಿ, ಹಿರಿಯ ಸದಸ್ಯರಾದ ಯು. ವಿಶ್ವನಾಥ್​ ಶೆಣೈ, ಇಂಜಿನಿಯರ್​ಗಳಾದ ವಿನಯಕುಮಾರ್​, ನಿರಂಜನ್​ ಹಾಗೂ ಮಲ್ಲಿಕಾ ಯೋಗೀಶ್​ಧರ್​, ಶ್ರೀಲಕ್ಷ್ಮೀ ಜಿ. ಭಟ್​, ಸುರೇಖಾ ಪಿ. ಆಚಾರ್ಯ, ಪದ್ಮಿನಿ ಹರಿಪ್ರಸಾದ್​ ಶೆಟ್ಟಿ, ಶಿಲ್ಪಾ ಶಶಿಧರ್​, ಗಿರೀಶ್​ ಚಂದ್ರಾಧರ್​, ದಿವ್ಯಾ ಗಿರೀಶ್​ಧರ್​, ರಕ್ಷಣ್​ ಆಚಾರ್ಯ ಉಪಸ್ಥಿತರಿದ್ದರು.

ಸಂಸ್ಥೆಯ ಅಧ್ಯಕ್ಷ ಎಂ.ಗಂಗಾಧರ ರಾವ್​ ಸ್ವಾಗತಿಸಿದರು. ನಾರಾಯಣ ಎಂ. ಹೆಗಡೆ ವಂದಿಸಿದರು. ಕಾರ್ಯದರ್ಶಿ ಮುರಳಿ ಕಡೆಕಾರ್​ ಪ್ರಾಸ್ತಾವಿಕವಾಗಿ ಮಾತನಾಡಿ ಕಾರ್ಯಕ್ರಮ ನಿರೂಪಿಸಿದರು.