ಉಡುಪಿ: ರಾಜ್ಯದಲ್ಲಿ ಎಸ್​ಸಿ&ಎಸ್​ಟಿ ಹಾಗೂ ಒಬಿಸಿ ಸಮುದಾಯಕ್ಕೆ ಸಾಮಾಜಿಕವಾಗಿ ಆಗುತ್ತಿರುವ ಅನ್ಯಾಯ ಮುಂದುವರಿದಿದೆ. ಇದನ್ನು ವಿರೋಧಿಸಿ 3 ತಿಂಗಳಿಂದ ರಾಜ್ಯವ್ಯಾಪಿ ಹೋರಾಟ, ಅಭಿಯಾನ ನಡೆದಿದೆ. ಈ ಸಮುದಾಯಗಳನ್ನು ಕೂಡಲೇ ಸಂವಿಧಾನದ 9ನೇ ಪರಿಚ್ಛೇದಕ್ಕೆ ಸೇರ್ಪಡೆ ಮಾಡಿ, ಶೇ.56 ಮೀಸಲಾತಿ ನೀಡಬೇಕು ಎಂದು ಕರ್ನಾಟಕ ರಾಜ್ಯ ವಾಲ್ಮೀಕಿ ಸಮಾಜ ಸಮಾನ ಮನಸ್ಕರ ವೇದಿಕೆಯ ಅಧ್ಯಕ್ಷ ಹಾಗೂ ಕೆಪಿಸಿಸಿ ಉಪಾಧ್ಯಕ್ಷ ವಿ.ಎಸ್​. ಉಗ್ರಪ್ಪ ಆಗ್ರಹಿಸಿದರು.

ಉಡುಪಿಯ ಪತ್ರಿಕಾ ಭವನದಲ್ಲಿ ಸೋಮವಾರ (ಜು.13) ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಈ ವಿಚಾರವಾಗಿ ಸಿಎಂ ಡಿ.ಕೆ. ಶಿವಕುಮಾರ್​ ಸರ್ವಪಕ್ಷಗಳ ನಿಯೋಗದೊಂದಿಗೆ ಪ್ರಧಾನಿ ಮೋದಿ ಅವರನ್ನು ತ್ವರಿತ  ಭೇಟಿಯಾಗಿ ಒತ್ತಡ ಹಾಕಬೇಕು. ಇಲ್ಲದಿದ್ದಲ್ಲಿ ಪ್ರಜಾತಂತ್ರ ವ್ಯವಸ್ಥೆಯಲ್ಲಿ ನಮ್ಮ ಹೋರಾಟ, ಪ್ರತಿಭಟನೆ ನಡೆಯಲಿದೆ ಎಂದು ಎಚ್ಚರಿಕೆ ನೀಡಿದರು.

ಸಂವಿಧಾನದ ಆರ್ಟಿಕಲ್​ 340, 341 ಹಾಗೂ 342ರ ಅಡಿಯಲ್ಲಿ ಕ್ರಮವಾಗಿ ಒಬಿಸಿ, ಎಸ್​ಸಿ ಹಾಗೂ ಎಸ್​ಟಿ ಸಮುದಾಯ ಎಂದು ಗುರುತಿಸಲಾಗಿದೆ, ಆದರೆ. ಪ್ರಧಾನಿ ಮೋದಿ ಅವರು 341 (ಎ) ಎಂಬ ಹೊಸ ಆರ್ಟಿಕಲ್​ ಜಾರಿಗೊಳಿಸಿ ಆರ್ಥಿಕವಾಗಿ ಹಿಂದುಳಿದವರು ಎಂದು ಗುರುತಿಸಿ ಬ್ರಾಹ್ಮಣರು ಸೇರಿದಂತೆ ಇನ್ನಿತರ ವಿವಿಧ ಸಮುದಾಯ ಸೇರ್ಪಡಿಸಿ ನೈಜ ಹಿಂದುಳಿದವರಿಗೆ ಅನ್ಯಾಯ ಮಾಡಿದ್ದಾರೆ.

2022ರಲ್ಲಿ ಬಸವರಾಜ ಬೊಮ್ಮಾಯಿ ಅವರು ಸಿಎಂ ಇದ್ದಾಗ ಹೈಕೋರ್ಟ್​ ಆದೇಶದಂತೆ ಜನಸಂಖ್ಯೆ ಆಧರಿಸಿ ಮೀಸಲಾತಿ ನೀಡುವ ಪ್ರಯತ್ನ ನಡೆದಿತ್ತು. ರಾಜ್ಯದಲ್ಲಿ ಅಂದು ಎಸ್​ಸಿ ಸಮುದಾಯಕ್ಕೆ ಶೇ.15ರಿಂದ 17ಕ್ಕೆ, ಎಸ್​ಟಿಗೆ ಶೇ.3ರಿಂದ ಶೇ.7ಕ್ಕೆ ಹಾಗೂ ಒಬಿಸಿಗೆ ಶೇ.32ರಿಂದ 42ಕ್ಕೆ ಮೀಸಲಾತಿ ಹೆಚ್ಚಿಸಿ ಅನುಮೋದನೆಗಾಗಿ ಮುಖ್ಯ ಕಾರ್ಯದರ್ಶಿಯವರು ಕೇಂದ್ರ ಸರ್ಕಾರಕ್ಕೆ ಕಳುಹಿಸಿದ್ದರು. ಆದರೆ, ಪ್ರಧಾನಿ ಮೋದಿ ಈ ವರೆಗೂ ಅನುಮೋದನೆ ತೋರದೆ ನಿರ್ಲಕ್ಷ್ಯ ಮಾಡಿದ್ದಾರೆ ಎಂದು ಆರೋಪಿಸಿದರು.

ತಮಿಳುನಾಡಿನಲ್ಲಿ ಶೇ.69 ಮೀಸಲಾತಿ ನೀಡಲಾಗಿದೆ. ಯಾರಾದರೂ ಶೌಚಾಲಯ ಇಲ್ಲವೆಂದು ಪತ್ರ ಬರೆದರೆ ಅದನ್ನು 'ಮನ್​ಕಿ ಬಾತ್​'ನಲ್ಲಿ ಮಾತನಾಡುವ ಪ್ರಧಾನಿ ಮೋದಿ, 4 ವರ್ಷ ಕಳೆದರೂ ಹಿಂದುಳಿದವರಿಗೆ ಮೀಸಲಾತಿ ಕೊಡದೆ ಅನ್ಯಾಯ ಮಾಡುತ್ತಿದ್ದಾರೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ರಾಜ್ಯ ವಾಲ್ಮೀಕಿ ಸಮಾಜ ಸಮಾನ ಮನಸ್ಕರ ವೇದಿಕೆಯ ಕಾರ್ಯಾಧ್ಯಕ್ಷ ಎನ್​. ನರಸಿಂಹಯ್ಯ, ಮಂಜುನಾಥ್​ ಮಡ್ಲೂರು, ಪ್ರಕಾಶ್​ ಎನ್​. ದೇಸಾಯಿ ಬೆಳಗಾವಿ, ನಿವೃತ್ತ ಇಂಜಿನಿಯರ್​ ಹನುಮಂತರಾಯಪ್ಪ ಇದ್ದರು.