ಬಪ್ಪನಾಡು ಜಾತ್ರೆ ಪ್ರಯುಕ್ತ ಮತ್ಸ್ಯ ಬೇಟೆ

ಜಾತ್ರೆಯ ಅಂಗವಾಗಿ ಚಿತ್ರಾಪು ಗ್ರಾಮದ ಮಕುರ್ಂಜ ಕಲ್ಸಂಕ ಸುಣ್ಣದ ಗೂಡು ಬಳಿ, ಶಾಂಭವಿ ಮತ್ತು ನಂದಿನಿ ನದಿಗಳು ಸಂಗಮಿಸುವ ತಂಕರನಾಗ ಕೊಳ ಮತ್ತು ಕೊಂಕಣ ತೋಡುಗಳಲ್ಲಿ ಮೀನು ಹಿಡಿಯುವ ಅಪೂರ್ವ ಸಂಪ್ರದಾಯ ಬುಧವಾರ ನಡೆಯಿತು. ಸಣ್ಣ ಮಕ್ಕಳಿಂದ ಹಿಡಿದು ಮಹಿಳೆಯರು ಹಾಗೂ ಗ್ರಾಮಸ್ಥರು ವಿವಿಧ ರೀತಿಯ ಬಲೆ ಬಳಸಿ ಮೀನು ಹಿಡಿಯುವುದರಲ್ಲಿ ಮಗ್ನರಾಗಿದ್ದರು. ಇಲ್ಲಿ ಹಿಡಿಯುವ ಮೀನನ್ನು ಕೇವಲ ಆಹಾರವೆಂದು ಪರಿಗಣಿಸದೆ, ‘ದೇವರ ಪ್ರಸಾದ’ವೆಂದೇ ಭಾವಿಸಲಾಗುತ್ತದೆ. ಈ ಕೊಳಗಳಲ್ಲಿ ವರ್ಷದ ಇತರ ದಿನಗಳಲ್ಲಿ ಮೀನು ಹಿಡಿಯುವುದನ್ನು ನಿಷೇಧಿಸಲಾಗಿದೆ. ಜಾತ್ರೆಯ ಸಂದರ್ಭದಲ್ಲಿ ಮಾತ್ರ ಗ್ರಾಮಸ್ಥರಿಗೆ ಮೀನು ಹಿಡಿಯಲು ಅವಕಾಶ ನೀಡಲಾಗುತ್ತದೆ.

ಬಪ್ಪನಾಡು ಜಾತ್ರೆಯ ಸಂದರ್ಭ ಅಗಲಿದ ಕುಟುಂಬದ ಹಿರಿಯರಿಗೆ ಮೀನಿನ ಪಲ್ಯ ಮತ್ತು ಕುಚ್ಚಲಕ್ಕಿ ಅನ್ನವನ್ನು ಬಡಿಸಿ ಪೂಜಿಸುವುದು ಇಲ್ಲಿನ ಪುರಾತನ ಪದ್ಧತಿ. ಆಲದುರ್ಗೇ ಎಂದೇ ಕರೆಯಲ್ಪಡುವ ಬಪ್ಪನಾಡು ದೇವಿಯ ಜಾತ್ರೆಗೆ ಮೀನಿನ ಅಡುಗೆ ಅತ್ಯಂತ ಪ್ರಮುಖವಾಗಿದೆ.