ನವ್ಯ ಕವನಗಳಲ್ಲಿದೆ ಜೀವನ ಸಾರ

ಉಡುಪಿ: ಚಿಕ್ಕ ಕವನಗಳಲ್ಲೂ ಅಪಾರ ಅರ್ಥವಿರುತ್ತದೆ. ಹನಿಗವನವಾದರೂ ಸಹ ಅದು ಜೀವನದ ಮೌಲ್ಯ ಸಾರುತ್ತದೆ. ಹೀಗಾಗಿ ನವ್ಯ ಕವನಗಳಲ್ಲೂ ಜೀವನ ಸಾರ ಅಡಗಿದೆ ಎಂದು ಹನಿ ಕವಿತೆಗಳ ರಾಜ ಖ್ಯಾತಿಯ ಕವಿ ಎಚ್​. ಡುಂಡಿರಾಜ್​ ಅಭಿಪ್ರಾಯಪಟ್ಟರು.

ಉಡುಪಿಯ ಬುಡ್ನಾರುನಲ್ಲಿರುವ ಅಂಶು ಮನೆಯಲ್ಲಿ ಕನ್ನಡ ಸಾಹಿತ್ಯ ಪರಿಷತ್​ ಉಡುಪಿ ತಾಲೂಕು ಘಟಕ ಹಾಗೂ ಸಂಸ್ಕೃತಿ ವಿಶ್ವ ಪ್ರತಿಷ್ಠಾನ (ರಿ.) ಉಡುಪಿ ಸಹಕಾರದಲ್ಲಿ ಆಯೋಜಿಸಿದ್ದ ಎಚ್​. ಡುಂಡಿರಾಜ್​ ಅವರ ಹೊಸ ಕವಿತೆಗಳು ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಒಂದು ಗಂಟೆಗೂ ಅಧಿಕ ಕಾಲ ಡುಂಡಿರಾಜ್​ ಅವರು ತಮ್ಮ ಹೊಸ ಹನಿಗವನ, ಹೈಕುಗಳ ಮೂಲಕ ಪ್ರೇಕ್ಷಕರ ಮನ ಮುದಗೊಳಿಸಿದರು.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಸು.ಜಿ. ಕುರ್ಯ, ಸ್ವರಚಿತ ಹನಿಗವನ ಹೇಳುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿದರು. ಸ್ಥಳೀಯ ನಗರಸಭಾ ನಿಕಟಪೂರ್ವ ಸದಸ್ಯ ಗಿರೀಶ್​ ಅಂಚನ್​ ಅವರನ್ನು ಸನ್ಮಾನಿಸಲಾಯಿತು.

ಸಂಸ್ಕೃತಿ ವಿಶ್ವ ಪ್ರತಿಷ್ಠಾನದ ಗೌರವಾಧ್ಯಕ್ಷ ಯು.ವಿಶ್ವನಾಥ್​ ಶೆಣೈ, ಅಧ್ಯಕ್ಷ ಪ್ರೊ. ಶಂಕರ್​, ಕಸಾಪ ಉಡುಪಿ ತಾಲೂಕು ಅಧ್ಯಕ್ಷ ರವಿರಾಜ್​ ಎಚ್.ಪಿ., ಗೌರವ ಕಾರ್ಯದರ್ಶಿಗಳಾದ ಜನಾರ್ದನ್​ ಕೊಡವೂರು, ರಂಜಿನಿ ವಸಂತ್​, ಕೋಶಾಧಿಕಾರಿ ರಾಜೇಶ್​ ಭಟ್​, ನಾರಾಯಣ ಮಡಿ, ಭುವನಪ್ರಸಾದ್​ ಹೆಗಡೆ ಇತರರಿದ್ದರು.

ಸಂಧ್ಯಾ ಶೆಣೈ ಕಾರ್ಯಕ್ರಮ ನಿರೂಪಿಸಿದರು. ಪೂರ್ಣಿಮಾ ಜನಾರ್ದನ್​ ವಂದಿಸಿದರು.