ಧರ್ಮ ಜಾಗೃತಿಗೆ ಪೂರಕ ಗಮಕ ವಾಚನ ಕಲೆ

ಉಡುಪಿ: ಗಮಕ ವಾಚನವು ಪುರಾತನ ಕಲೆ. ಇಂದಿನ ಪೀಳಿಗೆಯವರಿಗೆ ಇದರ ಅರಿವು ಇಲ್ಲ. ಪುರಾಣ ಕಥಾನಕಗಳನ್ನು ತಿಳಿದುಕೊಳ್ಳಲು ಯಕ್ಷಗಾನ, ತಾಳಮದ್ದಳೆಯಂತೆ ಇದೂ ಸಹ ಉತ್ತಮ ಮಾಧ್ಯಮವಾಗಿದೆ. ಜಿಲ್ಲಾ ಗಮಕ ಕಲಾ ಪರಿಷತ್​ ವತಿಯಿಂದ ಅಭಿಯಾನದ ಮೂಲಕ ಈ ಕಲೆಯನ್ನು ಉಳಿಸಿ, ಬೆಳೆಸಿ ಮುನ್ನಡೆಸುವ ಕಾರ್ಯ ಮಾಡಲಾಗುತ್ತಿದೆ. ಧರ್ಮ ಜಾಗೃತಿಗೆ ಅತ್ಯಂತ ಪೂರಕ ವಿಧಾನ ಇದಾಗಿದೆ ಎಂದು ಖ್ಯಾತ ಗಮಕ ವ್ಯಾಖ್ಯಾನಕಾರ ಡಾ.ರಾಘವೇಂದ್ರ ರಾವ್​ ಉಡುಪಿ ತಿಳಿಸಿದರು.

ಅರಿತೋಡು ಶ್ರೀ ಜನಾರ್ದನ ಸುಬ್ರಹ್ಮಣ್ಯ ದೇವಸ್ಥಾನದ ಸಭಾಭವನದಲ್ಲಿ ಶ್ರಾವಣ ಮಾಸದ ನಿಮಿತ್ತ ಕಲ್ಯಾಣಿ ಕಲಾಕೇಂದ್ರ (ರಿ.) ಸುಬ್ರಹ್ಮಣ್ಯನಗರದ ವತಿಯಿಂದ ಆಯೋಜಿಸಿದ್ದ 'ಗಮಕ ವಾಚನ ವ್ಯಾಖ್ಯಾನ' ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಉಪಾಧ್ಯಕ್ಷ ವೆಂಕಟಕೃಷ್ಣ ಭಟ್​, ಸಂಸ್ಥೆಯ ಪದಾಧಿಕಾರಿಗಳು ಹಾಗೂ ಸದಸ್ಯರು ಉಪಸ್ಥಿತರಿದ್ದರು. ಕಲಾಕೇಂದ್ರದ ಕೋಶಾಧಿಕಾರಿ ಆದ್ಯತಾ ಭಟ್​ ಪ್ರಾರ್ಥಿಸಿದರು. ಕಾರ್ಯದರ್ಶಿ ಸುಬ್ರಹ್ಮಣ್ಯ ಜೋಶಿ ಪರಿಚಯಿಸಿದರು. ಕೇಂದ್ರದ ಅಧ್ಯಕ್ಷ ನಿರಂಜನ್​ ಭಟ್​ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. 

ಸಭಾ ಕರ್ಯಕ್ರಮದ ಬಳಿಕ ಡಾ.ರಾಘವೇಂದ್ರ ರಾವ್​ ಹಾಗೂ ಗಮಕ ವಾಚಕಿ ಪಲ್ಲವಿ ಕೆದ್ಲಾಯ ಬ್ರಹ್ಮಾವರ ಅವರು ಚಕ್ರವರ್ತಿ ದಿಲೀಪ ರಾಜನ ಕಥೆಯನ್ನೊಳಗೊಂಡ 'ಸತ್ತ್ವ ಪರೀಕ್ಷೆ' ಎಂಬ ಕಥಾಭಾಗವನ್ನು ಭಾಮಿನಿ ಷಟ್ಪದಿಯಲ್ಲಿ ಪ್ರಸ್ತುತಪಡಿಸಿದರು. ದೇವಳದ ಅರ್ಚಕರಾದ ಗೋಪಾಲಕೃಷ್ಣ ಉಪಾಧ್ಯ, ಶ್ರೀಕಾಂತ ಉಪಾಧ್ಯ ಸಹಕರಿಸಿದರು.