ಉಡುಪಿ: ಮಾನವರೆಲ್ಲರೂ ಉತ್ತಮ ಬದುಕು ಕಟ್ಟಿಕೊಳ್ಳುವಂತಾಗಲು ಗೌತಮ ಬುದ್ಧನು ಅನೇಕ ಸಂದೇಶ ನೀಡಿದ್ದಾನೆ. ವಿಶ್ವಕ್ಕೇ ಶಾಂತಿ, ಸಮಾನತೆ, ಪ್ರೀತಿ ಮತ್ತು ಕರುಣೆಯ ಮಾರ್ಗ ಬೋಧಿಸಿದ್ದಾನೆ. ಜಗದಲ್ಲಿಂದು ಅನೇಕ ಅಹಿತಕರ ಘಟನೆ ಸಂಭವಿಸುತ್ತಿದೆ. ಹಿಂಸೆ, ಅಸಮಾನತೆ ಹಾಗೂ ಮೌಢ್ಯಗಳನ್ನು ದೂರಗೊಳಿಸುವಲ್ಲಿ ಬುದ್ಧನ ಅಹಿಂಸಾ ಹಾಗೂ ಸತ್ಯ ಪ್ರತಿಪಾದನೆಯ ತತ್ವಗಳು ಸಹಕಾರಿಯಾಗಿದೆ ಎಂದು ಕರಾವಳಿ ಅಭಿವೃದ್ಧಿ ಮಂಡಳಿಯ ಅಧ್ಯಕ್ಷ ಎಂ.ಎ. ಗಫೂರ್​ ಹೇಳಿದರು.

ಉಡುಪಿಯ ಸರ್ಕಾರಿ ಪ.ಪೂ. ಕಾಲೇಜ್​ನ ಜನತಾ ಸಭಾಭವನದಲ್ಲಿ ಜಿಲ್ಲಾಡಳಿತ, ಜಿಪಂ, ಜಿಲ್ಲಾ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಬುದ್ಧಿಸ್ಟ್​ ಸೊಸೈಟಿ ಆಫ್​ ಇಂಡಿಯಾ ಉಡುಪಿ ವತಿಯಿಂದ ಶುಕ್ರವಾರ (ಮೇ 1) ಆಯೋಜಿಸಿದ್ದ ಭಗವಾನ್​ ಗೌತಮ ಬುದ್ಧ ಜಯಂತಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಶ್ರೀ ನಾರಾಯಣ ಗುರು ಅಭಿವೃದ್ಧಿ ನಿಗಮ ಬೆಂಗಳೂರು ಅಧ್ಯಕ್ಷ ಮಂಜುನಾಥ್​ ಪೂಜಾರಿ ಮಾತನಾಡಿ, ಮಾನವೀಯ ಮೌಲ್ಯಗಳೆಲ್ಲ ನಶಿಸುತ್ತಿರುವ ಈ ಕಾಲಘಟ್ಟದಲ್ಲಿ ಮತ್ತೊಮ್ಮೆ ಮೌಲ್ಯಗಳನ್ನು ಬಿತ್ತರಿಸಲು ಬುದ್ಧನ ಸಂದೇಶಗಳು ಬೆಳಗಬೇಕಿದೆ. ಮನುಷ್ಯನ ಬದುಕು ಸತ್ಯದ ಹಾದಿಯಲ್ಲಿರಬೇಕು ಎಂದು ತಿಳಿಸಿಕೊಟ್ಟ ಬುದ್ಧನ ಸಂದೇಶವನ್ನು ಪಾಲಿಸುವಂತಾಗಬೇಕು ಎಂದರು.

ಭಗವಾನ್​ ಬುದ್ಧನ ಕುರಿತು ಬೌದ್ಧ ಚಿಂತಕ ರಮೇಶ್​ ರಘುರಾಂ ವಿಶೇಷ ಉಪನ್ಯಾಸ ನೀಡಿದರು. ಬುದ್ಧ ಪೂರ್ಣಿಮೆಯ ನಿಮಿತ್ತ ಆಯೋಜಿಸಿದ್ದ ವಿವಿಧ ಸ್ಪರ್ಧೆಯ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು.

ಅಪರ ಜಿಲ್ಲಾಧಿಕಾರಿ ಅಬೀದ್​ ಗದ್ಯಾಳ ಅಧ್ಯಕ್ಷತೆ ವಹಿಸಿದ್ದರು.