ಉಡುಪಿ: ಇಂದಿನ ಕೆಡಿಪಿ ಸಭೆಯಲ್ಲಿ ಲಾನುಭವಿಗಳಿಗೆ ಹಕ್ಕುಪತ್ರ ವಿತರಣೆ ಮಾಡುವ ವಿಚಾರ ನಮಗೆ ತಿಳಿದಿಲ್ಲ. ಕ್ಷೇತ್ರದ ತಹಸೀಲ್ದಾರರು ಮಾಹಿತಿಯನ್ನೂ ನೀಡಿಲ್ಲ. ನಮ್ಮ ಅನುಪಸ್ಥಿತಿಯಲ್ಲಿ ಹಕ್ಕುಪತ್ರ ವಿತರಣೆ ಮಾಡುವುದು ಶಿಷ್ಟಾಚಾರದ ಉಲ್ಲಂಘನೆಯಾಗಿದೆ. ಜಿಲ್ಲಾಧಿಕಾರಿಗೆ, ತಹಸೀಲ್ದಾರರಿಗೆ, ಉಸ್ತುವಾರಿ ಸಚಿವರಾದ ತಮಗೂ ಇದು ತಿಳಿದಿಲ್ಲವೇ ಎಂದು ಕಾರ್ಕಳ ಶಾಸಕ ವಿ.ಸುನೀಲಕುಮಾರ್​ ಆಕ್ರೋಶ ವ್ಯಕ್ತಪಡಿಸಿದರು. 

ಉಡುಪಿಯ ಜಿಪಂನ ಡಾ. ವಿ.ಎಸ್​. ಆಚಾರ್ಯ ಸಭಾಂಗಣದಲ್ಲಿ ಶನಿವಾರ (ಮೇ 16) ನಡೆದ ತ್ರೈಮಾಸಿಕ ಕೆಡಿಪಿ ಸಭೆಯಲ್ಲಿ ಜಿಲ್ಲೆಯ ಐವರು ಬಿಜೆಪಿ ಶಾಸಕರು ಜಿಲ್ಲಾಡಳಿತ ಹಾಗೂ ಉಸ್ತುವಾರಿ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್​ ಅವರನ್ನು ತರಾಟೆಗೆ ತೆಗೆದುಕೊಂಡರು.

ಸರ್ಕಾರದ ಸುತ್ತೋಲೆಯಲ್ಲೇ ಇರುವಂತೆ ಯಾವುದೇ ಕ್ಷೇತ್ರದ ಲಾನುಭವಿಗಳಿಗೆ ಸರ್ಕಾರಿ ಸೌಲಭ್ಯ ವಿತರಿಸುವಾಗ ಆ ಕ್ಷೇತ್ರದ ಶಾಸಕರೂ ಇರಬೇಕೆನ್ನುವುದು ಶಿಷ್ಟಾಚಾರವಾಗಿದೆ. ತಾವು ಸಚಿವರಾಗಿದ್ದರೂ ಸಹ ಶಾಸಕರೇ ಅಲ್ಲವೇ? ಕ್ಷೇತ್ರದ ಶಾಸಕರು ಬರುವ ಮೊದಲೇ ಹಕ್ಕುಪತ್ರ ವಿತರಿಸಿದ್ದೇಕೆ? ನಾವೇನು ಗೆಣಸು ಕೆರೆಯುತ್ತಿದ್ದೇವಾ? ತಹಸೀಲ್ದಾರರಿಗೆ ರೀತಿ-ನಿಯಮ ತಿಳಿದಿಲ್ಲವಾ? ನಮ್ಮ ಗಮನಕ್ಕೆ ತರದೆ ಹಕ್ಕುಪತ್ರ ನೀಡಿದ್ದು, ಅದನ್ನು ಕಾಂಗ್ರೆಸ್​ ಪಕ್ಷದ ಕಚೇರಿಯಲ್ಲಿ ವಿತರಿಸಿದ್ದಾರೆ. ಸಚಿವರಾಗಿ ತಾವು ಸಮರ್ಥನೆ ಮಾಡಬೇಡಿ. ಅಧಿಕಾರಿಗಳ ಇಂತಹ ಬೇಜವಾಬ್ದಾರಿ ನೋಡಿಕೊಂಡು ಶಾಸಕರು ಸುಮ್ಮನೆ ಇರಲಾಗದು. ಸಭೆ ಬಹಿಷ್ಕಾರ ಮಾಡಬೇಕಾಗುತ್ತದೆ ಎಂದು ಶಾಸಕ ಸುನೀಲಕುಮಾರ್​ ಎಚ್ಚರಿಕೆ ನೀಡಿದರು.

ಕುಂದಾಪುರ ಶಾಸಕ ಕಿರಣಕುಮಾರ್​ ಕೊಡ್ಗಿ ಮಾತನಾಡಿ, ನಮ್ಮ ಕ್ಷೇತ್ರದಲ್ಲೂ ಸಹ ತಹಸೀಲ್ದಾರರು ನಮ್ಮ ಗಮನಕ್ಕೆ ತರದೆ ಹಕ್ಕುಪತ್ರ ವಿತರಿಸಿದ್ದಾರೆ ಎಂದು ಆರೋಪಿಸಿದರು. ರಂಗಾಯಣ ಪುಸ್ತಕ ಮುದ್ರಣದಲ್ಲೂ ಶಿಷ್ಟಾಚಾರ ಪಾಲನೆ ಆಗಿಲ್ಲ. ಉಸ್ತುವಾರಿ ಸಚಿವರು ಹಾಗೂ ಶಾಸಕರ ಭಾವಚಿತ್ರವನ್ನೂ ಅಳವಡಿಸಿಲ್ಲ ಎಂದು ಸುನೀಲಕುಮಾರ್​ ಗಮನಕ್ಕೆ ತಂದರು. ಇದರಿಂದ ಆಕ್ರೋಶಗೊಂಡ ಸಚಿವೆ ಲಕ್ಷ್ಮೀ, ಕಾರ್ಕಳ ಹಾಗೂ ಕುಂದಾಪುರದ ತಹಸೀಲ್ದಾರರನ್ನು ತರಾಟೆಗೆ ತೆಗೆದುಕೊಂಡರು. ನೀವು ಮಾಡಿರುವ ತಪ್ಪಿನಿಂದ ಸಭೆಯಲ್ಲಿ ನಾವು ಹೇಳಿಸಿಕೊಳ್ಳುವಂತಾಯಿತು. ತಮಗೆ ಶಿಷ್ಟಾಚಾರದ ಪರಿಜ್ಞಾನ ಇಲ್ಲವೇ ಎಂದು ಕಿಡಿಕಾರಿದರು. ತಹಸೀಲ್ದಾರರಿಗೆ ಹಾಗೂ ಜಿಲ್ಲಾ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಅಧಿಕಾರಿಗೆ ನೋಟಿಸ್​ ನೀಡುವಂತೆ ಜಿಲ್ಲಾಧಿಕಾರಿ ಸ್ವರೂಪಾಗೆ ಆದೇಶಿಸಿದರು. ಮುಂದೆ ಈ ರೀತಿ ಪ್ರಮಾದ ಮರುಕಳಿಸಿದರೆ ಕ್ಷಣಾರ್ಧದಲ್ಲೇ ಸಸ್ಪೆಂಡ್​ ಮಾಡುತ್ತೇನೆ ಎಂದು ಎಚ್ಚರಿಕೆ ನೀಡಿದರು.

ಶಾಸಕರಾದ ಗುರ್ಮೆ ಸುರೇಶ್​ ಶೆಟ್ಟಿ, ಯಶ್​ಪಾಲ್​ ಸುವರ್ಣ, ಗುರುರಾಜ್​ ಗಂಟಿಹೊಳೆ, ವಿಪ ಸದಸ್ಯರಾದ ಎಸ್​.ಎಲ್​. ಭೋಜೇಗೌಡ, ಮಂಜುನಾಥ ಭಂಡಾರಿ, ಕಿಶೋರಕುಮಾರ್​ ಪುತ್ತೂರು, ಎಸ್ಪಿ ಹರಿರಾಂ ಶಂಕರ್​, ಜಿಪಂ ಸಿಇಒ ಪ್ರತೀಕ್​ ಬಾಯಲ್​, ಕರಾವಳಿ ಅಭಿವೃದ್ಧಿ ಮಂಡಳಿ ಅಧ್ಯಕ್ಷ ಎಂ.ಎ. ಗಫೂರ್​ ಇತರರಿದ್ದರು.