ಉಡುಪಿ: ಮರಣೋತ್ತರ ಪರೀಕ್ಷಾ ಕೇಂದ್ರ ಹಾಗೂ ವಿಧಿವಿಜ್ಞಾನ ಕೇಂದ್ರಗಳಲ್ಲಿ ಪರೀಕ್ಷೆಗೆ ಒಳಪಡಿಸಿ, ಸಹಜ ಸಾವು ಎಂದು ದೃಢಪಟ್ಟಿದ್ದ 35 ಅಪರಿಚಿತ ಮೃತದೇಹಗಳ ಅಂಗಾಂಗಗಳನ್ನು ಕಾನೂನು ಪ್ರಕ್ರಿಯೆಯಂತೆ ಮಂಗಳವಾರ (ಅ.6) ವಿಲೇವಾರಿ ಮಾಡಲಾಯಿತು.
ಎರಡು ವರ್ಷದಿಂದ ಮಲ್ಪೆ ಪೊಲೀಸ್ ಠಾಣಾ ವ್ಯಾಪ್ತಿಯ ವಿವಿಧ ಸಾರ್ವಜನಿಕ ಸ್ಥಳಗಳಲ್ಲಿ ಪತ್ತೆಯಾಗಿದ್ದ ಅಪರಿಚಿತ ಮೃತದೇಹಗಳ ಅಂಗಾಂಗಳನ್ನು ಮರಣೋತ್ತರ ಪರೀಕ್ಷೆಗಾಗಿ ಕಳುಹಿಸಲಾಗಿತ್ತು. ಬಳಿಕ ರಾಸಾಯನಿಕ ದ್ರಾವಣದಲ್ಲಿ ಅವುಗಳನ್ನು ಸುರಕ್ಷಿತವಾಗಿ ಹಲವು ಡಬ್ಬಿಗಳಲ್ಲಿ ಹಾಕಿ ಮಲ್ಪೆ ಪೊಲೀಸ್ ಠಾಣೆಯಲ್ಲಿ ಇಡಲಾಗಿತ್ತು.
ಸಂಬಂಧಪಟ್ಟ ಮೃತದೇಹಗಳನ್ನು ಈ ಹಿಂದೆಯೇ ಅಂತ್ಯಕ್ರಿಯೆ ಮಾಡಲಾಗಿದ್ದು, ಅಂಗಾಂಗಗಳನ್ನು ಬೀಡಿನಗುಡ್ಡೆಯ ರುದ್ರಭೂಮಿಯಲ್ಲಿ ಜೆಸಿಬಿ ಯಂತ್ರದ ನೆರವಿನಿಂದ ಅಂತ್ಯಕ್ರಿಯೆ ಮಾಡಲಾಯಿತು.
ಮಲ್ಪೆ ಪೊಲೀಸ್ ಠಾಣೆಯ ಎಸ್ಐ ಅನಿಲ್, ಎಎಸ್ಐ ಹರೀಶ್ ಹಾಗೂ ಮುಖ್ಯ ಆರಕ್ಷಕಿ ಸಿಂಚನಾ ಕಾನೂನು ಪ್ರಕ್ರಿಯೆ ನಡೆಸಿದರು. ಸಮಾಜಸೇವಕ ನಿತ್ಯಾನಂದ ಒಳಕಾಡು ಹಾಗೂ ಶಬ್ಬೀರ್ ಮುಸ್ತಾಕ್ ಸಹಕಾರ ನೀಡಿದರು.