ಉಡುಪಿ: ಅತ್ಯಂತ ಕ್ಲಿಷ್ಟಕರವಾದ ಶ್ವಾಸನಾಳದ (ಎದೆಯೊಳಗಿನ) ರೋಬೋಟಿಕ್​ ಕ್ಯಾನ್ಸರ್​ ಶಸ್ತ್ರಚಿಕಿತ್ಸೆಯನ್ನು ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯು ಯಶಸ್ವಿಯಾಗಿ ನಡೆಸಿದೆ. ಇದು ಕರ್ನಾಟಕ ರಾಜ್ಯದ ಸುಧಾರಿತ ರೋಬೋಟಿಕ್​ ಕ್ಯಾನ್ಸರ್​ ಶಸ್ತ್ರಚಿಕಿತ್ಸೆಯ ಕ್ಷೇತ್ರದಲ್ಲಿ ಮಹತ್ವದ ಮೈಲಿಗಲ್ಲಾಗಿದೆ ಎಂದು ಆಸ್ಪತ್ರೆ ಪ್ರಕಟಣೆಯಲ್ಲಿ ತಿಳಿಸಿದೆ.

ಉಸಿರಾಟದ ತೊಂದರೆಯಿಂದ ಬಳಲುತ್ತಿದ್ದ 36 ವರ್ಷದ ರೋಗಿ (ಪುರುಷ)ಗೆ ಈ ಸಂಕೀರ್ಣ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ. ಎಂಡೋಸ್ಕೋಪಿ ಮಾಡಿದಾಗ ಶ್ವಾಸನಾಳದ ಕೆಳಗಿನ ಭಾಗದಲ್ಲಿ ಗೆಡ್ಡೆ ಇರುವುದು ಪತ್ತೆಯಾಗಿತ್ತು. ಈ ಮೊದಲೇ ಬೇರೊಂದು ಆಸ್ಪತ್ರೆಯಲ್ಲಿ ಶಸ್ತ್ರಚಿಕಿತ್ಸೆ ಮೂಲಕ ಭಾಗಶ; ಗಡ್ಡೆ ತೆಗೆದುಹಾಕಲಾಗಿತ್ತು. ಆದರೆ, ಶ್ವಾಸನಾಳದ ಕೆಳಗಿನ ಭಾಗದಲ್ಲಿ ಗಡ್ಡೆ ಉಳಿದಿದ್ದು, ಅದನ್ನು ಸಂಪೂರ್ಣವಾಗಿ ತೆಗೆಯಲಾಗಿದೆ.

ಶ್ವಾಸಕೋಶದ ಆಮ್ಲಜನಕವನ್ನು ನಿರಂತರ ಕಾಯ್ದುಕೊಳ್ಳಲು ಆಪರೇಷನ್​ ಮುಗಿಯುವವರೆಗೂ ವೆಂಟಿಲೇಟರ್​ ಕೊಳವೆ ಬಳಸಿ ರೋಬೋಟಿಕ್​ ಶಸ್ತ್ರಚಿಕಿತ್ಸೆ ಮಾಡುವುದು ಸವಾಲಿನ ಕಾರ್ಯವಾಗಿತ್ತು. ಸಾಂಪ್ರದಾಯಿಕ ತೆರೆದ ಶಸ್ತ್ರಚಿಕಿತ್ಸೆ ವಿಧಾನದಲ್ಲಿ ರೋಗಿಗೆ ಎದೆಯ ಮೇಲೆ ದೊಡ್ಡ ರಂಧ್ರ ಮಾಡಬೇಕಿತ್ತು. ಅದರಿಂದಾಗಿ ಹೆಚ್ಚಿನ ನೋವು, ಚೇತರಿಕೆಗೆ ದೀರ್ಘ ಸಮಯ ಬೇಕಾಗುತ್ತಿತ್ತು. ಅಲ್ಲದೆ, ಎದೆಯಮೇಲೆ ಎದ್ದು ಕಾಣುವಂತೆ ಗಾಯದ ದೊಡ್ಡ ಗುರುತು ಇರುತ್ತಿತ್ತು. ಆದರೆ, ರೋಬೋಟಿಕ್​ ಶಸ್ತ್ರಚಿಕಿತ್ಸೆಯಿಂದಾಗಿ ರೋಗಿಯು ಬೇಗನೆ ಚೇತರಿಸಿಕೊಂಡಿದ್ದು, ಚಿಕಿತ್ಸೆಯಾದ ನಾಲ್ಕನೇ ದಿನದಲ್ಲಿ ಬಿಡುಗಡೆ ಮಾಡಲಾಗಿದೆ.