ಕೊಲ್ಲಿ ರಾಷ್ಟ್ರಗಳಲ್ಲಿ ನಡೆಯುತ್ತಿರುವ ಯುದ್ಧ ಸದ್ಯಕ್ಕೆ ಅಂತ್ಯ ಕಾಣುವ ಲಕ್ಷಣ ಇಲ್ಲದಾಗಿದ್ದು, ಇತ್ತ ವಾಣಿಜ್ಯ ಬಳಕೆಯ ಸಿಲಿಂಡರ್​ ಗ್ಯಾಸ್​ನ ಸಮಸ್ಯೆಯೂ ಅಂತ್ಯವಾಗುವ ಸಾಧ್ಯತೆ ಕಾಣುತ್ತಿಲ್ಲ. ಕಮರ್ಷಿಯಲ್​ ಗ್ಯಾಸ್​ನ ಪೂರೈಕೆ ಸಂಪೂರ್ಣ ಸ್ಥಗಿತಗೊಂಡಿದ್ದರಿಂದ ಉಡುಪಿ ಜಿಲ್ಲೆಯ ಪ್ರಮುಖ ಹೋಟೆಲ್​ಗಳಲ್ಲಿ ಕಟ್ಟಿಗೆ ಒಲೆಯ ಮೂಲಕ ಅಡುಗೆ ಕಾರ್ಯ ಮುಂದುವರಿದಿದೆ.

4-5 ದಿನದಿಂದ ಸಣ್ಣ ಹಾಗೂ ಮಧ್ಯಮ ಪ್ರಮಾಣದ ಹೋಟೆಲ್​ಗಳು ಗ್ಯಾಸ್​ ಅಲಭ್ಯತೆಯಿಂದ ತಮ್ಮ ಅಂಗಡಿಗಳನ್ನು ಮುಚ್ಚಿದ್ದಾರೆ. ಕಟ್ಟಿಗೆ ಒಲೆ ಬಳಸಿ ಅಡುಗೆ ಮಾಡಲು ಸ್ಥಳಾವಕಾಶ ಇಲ್ಲದ ಹೋಟೆಲ್​ನವರು ಶರ್ಟಸ್​ ಮುಚ್ಚಿದ್ದು, 'ಕಾರಣಾಂತರದಿಂದ ಒಂದು ವಾರ ಹೋಟೆಲ್​ ಬಂದ್​ ಇರಲಿದೆ' ಎಂಬ ನೋಟಿಸ್​ ಅಂಟಿಸಿದ್ದಾರೆ.

ಇಂದು-ನಾಳೆ ಕಮರ್ಷಿಯಲ್​ ಗ್ಯಾಸ್​ ಪೂರೈಕೆ ಆಗಬಹುದೆಂದು ಕಾದು ಕುಳಿತಿದ್ದ ಕೆಲ ಹೋಟೆಲ್​ನ ಮಾಲೀಕರಿಗೆ ನಿರಾಸೆಯಾಗಿದೆ. ವಿದ್ಯುತ್​ ಒಲೆಯ ಮೂಲಕ ಒಮ್ಮೆಲೆ 50 ಪ್ಲೇಟ್​ನಷ್ಟು ದೋಸೆ ಸಿದ್ಧಪಡಿಸಿ ಹಾಟ್​ ಬಾಕ್ಸ್​ನಲ್ಲಿ ಇಟ್ಟುಕೊಂಡಿದ್ದಾರೆ. ಇನ್ನೊಂದು ಬಗೆಯ ತಿಂಡಿಯಾಗಿ ಉಪ್ಪಿಟ್ಟು ಮಾತ್ರ ಬೆಳಗ್ಗೆ ಲಭಿಸುತ್ತಿದೆ. ಕೆಲ ಹೋಟೆಲ್​ನವರು ಕೇವಲ ಇಡ್ಲಿ&ಸಾಂಬಾರ್​ ಮಾತ್ರ ಸಿದ್ಧಪಡಿಸುತ್ತಿದ್ದಾರೆ. ಗ್ರಾಹಕರೂ ಸಹ ಬೇರೆ ಗತಿಯಿಲ್ಲದೆ ಹಸಿವು ನೀಗಿಸಿಕೊಳ್ಳಲು ಇದನ್ನೇ ನೆಚ್ಚಿಕೊಳ್ಳುವಂತಾಗಿದೆ. ಮಧ್ಯಾಹ್ನದ ಊಟಕ್ಕೆ ಅನ್ನ-ಸಾಂಬಾರ್​, ಕರ್ಡ್​ ರೈಸ್​ ಮಾತ್ರ ಲಭಿಸುತ್ತಿದೆ. ಕೆಲವು ಹೋಟೆಲ್​ಗಳಲ್ಲಿ ಊಟವೇ ಸ್ಥಗಿತವಾಗಿದೆ.

ವಾರದಿಂದ ವಾಣಿಜ್ಯ ಬಳಕೆಯ ಸಿಲಿಂಡರ್​ ಲಭಿಸದೆ ಹೋಟೆಲ್​ ಉದ್ಯಮ ತೀವ್ರ ನಷ್ಟ ಅನುಭಿಸುತ್ತಿದೆ. ಈ ವಿಷಯ ತಿಳಿದಿದ್ದರೂ ಯಾವುದೇ ಪಕ್ಷದ ರಾಜಕಾರಣಿಗಳು ಚಕಾರ ಎತ್ತುತ್ತಿಲ್ಲ. ಕೇಂದ್ರ ಸರ್ಕಾರ ವಾಣಿಜ್ಯ ಸಿಲಿಂಡರ್​ನ ಬೆಲೆ ಏರಿಕೆ ಮಾಡಿದೆ ಎಂದು ಆರೋಪಿಸಿ ಕಾಂಗ್ರೆಸ್​ನವರು ರಸ್ತೆಯಲ್ಲಿ ಚಹಾ ಮಾಡಿ ಪ್ರತಿಭಟಿಸುತ್ತಾರೆ. ರಾಜ್ಯ ಬಜೆಟ್​ನಲ್ಲಿ ಕಾಂಗ್ರೆಸ್​ ಸರ್ಕಾರ ಉಡುಪಿ ಜಿಲ್ಲೆಗೆ ಯಾವುದೇ ಯೋಜನೆ, ಅನುದಾನ ನೀಡಿಲ್ಲ ಎಂದು ಬಿಜೆಪಿಯವರು ಚೊಂಬು ಹಿಡಿದು ಪ್ರತಿಭಟಿಸುತ್ತಾರೆ. ಇದರಿಂದ ಜನರಿಗೇನು ಪ್ರಯೋಜನ? ಗ್ಯಾಸ್​ ಇಲ್ಲದೆ ಹೋಟೆಲ್​ ಉದ್ಯಮ ತತ್ತರಿಸುತ್ತಿದೆ. ಪ್ರಸ್ತುತ ಕಮರ್ಷಿಯಲ್​ ಗ್ಯಾಸ್​ನ ಸಮಸ್ಯೆ ನಿವಾರಿಸುವಲ್ಲಿ ಅವರ ಶ್ರಮವೇನಿದೆ ಎಂದು ಪ್ರಶ್ನಿಸುತ್ತಾರೆ ಹೋಟೆಲ್​ ಉದ್ಯಮಿಗಳು.    

"