ಉಡುಪಿ: ಹಸಿರಾಗಿದ್ದ ಕಾಡು ಕಾಂಕ್ರೀಟ್​ ನಾಡಾಗಿದ್ದು, ಮತ್ತೊಮ್ಮೆ ಹಸಿರು ಕಾಡಾಗಿ ಕಂಗೊಳಿಸದರೆ ಮಾತ್ರ ಎಲ್ಲರಿಗೂ ಉತ್ತಮ ಬದುಕು, ಮುಂದಿನ ಪೀಳಿಗೆಗೆ ಉಜ್ವಲ ಭವಿಷ್ಯ ಸಾಧ್ಯ. ಸಮುದಾಯದ ಸಹಭಾಗಿತ್ವದಲ್ಲಿ ಹಸಿರು ಪ್ರತಿಜ್ಞೆಯೊಂದಿಗೆ ಗಿಡ ನೆಡಬೇಕು. ತನ್ನಿಮಿತ್ತ ಕೆನರಾ ಬ್ಯಾಂಕ್​ ವತಿಯಿಂದ ಮಣಿಪಾಲದಲ್ಲಿ ನಡೆಯಲಿರುವ 'ಫ್ರೀಡಂ ರನ್​' ದೇಶಕ್ಕೆ ಮಾದರಿಯಾಗಲಿ ಎಂದು ಮಣಿಪಾಲ್​ ಇನ್​ಸ್ಟಿಟ್ಯೂಟ್​ ಆಫ್​ ಟೆಕ್ನಾಲಜಿ (ಎಂಐಟಿ)ಯ ಪ್ರಾಧ್ಯಾಪಕ ಹಾಗೂ ಪರಿಸರ ವಿಜ್ಞಾನಿ ಡಾ. ಬಾಲಕೃಷ್ಣ ಮದ್ದೋಡಿ ಆಶಯ ವ್ಯಕ್ತಪಡಿಸಿದರು.

ಮಣಿಪಾಲದಲ್ಲಿ ಕೆನರಾ ಬ್ಯಾಂಕ್​ ವೃತ್ತ ಕಚೇರಿಯ ಕಾನ್ಛರೆನ್ಸ್​ ಹಾಲ್​ನಲ್ಲಿ ಗುರುವಾರ (ಜು.9) ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಕೆನರಾ ಬ್ಯಾಂಕ್​ ವತಿಯಿಂದ ಆ.9ರಂದು ಹಮ್ಮಿಕೊಂಡಿರುವ 5ನೇ ಆವೃತ್ತಿಯ 'ಫ್ರೀಡಂ ರನ್​ (ದೇಶಭಕ್ತಿಯ ಸಂಭ್ರಮ)' ಮ್ಯಾರಥಾನ್​ ನಿಮಿತ್ತ ಕರಪತ್ರ, ಟೀ&ಶರ್ಟ್​, ವೆಬ್​ಸೈಟ್​ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಕೆನರಾ ಬ್ಯಾಂಕ್​ ಮಣಿಪಾಲ ವೃತ್ತ ಕಚೇರಿ ಮಹಾಪ್ರಬಂಧಕ ಎಚ್​.ಕೆ. ಗಂಗಾಧರ್​ ಮಾತನಾಡಿ, ಯುವಜನತೆಯಲ್ಲಿ ದೇಶಪ್ರೇಮ ಮೈಗೂಡಿಸಿಕೊಳ್ಳುವಂತೆ ಅರಿವು ಮೂಡಿಸುವುದೇ 'ಫ್ರೀಡಂ ರನ್​' ಮ್ಯಾರಥಾನ್​ನ ಉದ್ದೇಶ. ದೈಹಿಕ ಕ್ಷಮತೆ, ಆರೋಗ್ಯದ ಕುರಿತು ಅರಿವು ಮೂಡಿಸಲಾಗುವುದು. 'ಗೋ ಗ್ರೀನ್​' ಈ ವರ್ಷದ ಘೋಷಣೆಯಾಗಿದ್ದು, ಮಧ್ಯಪ್ರಾಚ್ಯದಲ್ಲಿ ಯುದ್ಧದ ದುಷ್ಪರಿಣಾಮ, ಎಲ್​ನಿನೋ ಎಚ್ಚರಿಕೆಯ ಹಿನ್ನೆಲೆಯಲ್ಲಿ ಪ್ರಕೃತಿ ರಕ್ಷಣೆಗಾಗಿ ಈ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದರು.

ಉದ್ಯಮಿ ಪುರುಷೋತ್ತಮ ಶೆಟ್ಟಿ ಕಾರ್ಯಕ್ರಮ ಉದ್ಘಾಟಿಸಿ ಶುಭ ಹಾರೈಸಿದರು. ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ಸಹಾಯಕ ನಿರ್ದೇಶಕ ಡಾ. ರೋಶನ್​ ಶೆಟ್ಟಿ ಮಾತನಾಡಿದರು. ಮೇಜರ್​ ರಾಧಾಕೃಷ್ಣ ಕಾರ್ಯಕ್ರಮ ನಿರೂಪಿಸಿದರು. ಸಚಿನ್​ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು.