ಉಡುಪಿ: ಆಸ್ತಿ ವಿವಾದಕ್ಕೆ ಸಂಬಂಧಿಸಿ ತನ್ನ ಚಿಕ್ಕಮ್ಮಳನ್ನೇ ಉಸಿರುಗಟ್ಟಿಸಿ ಕೊಲೆ ಮಾಡಲು ಪ್ರಯತ್ನಿಸಿದ್ದ ಪ್ರಕರಣಕ್ಕೆ ಸಂಬಂಧಿಸಿ, ಆರೋಪ ಸಾಬೀತಾಗಿದ್ದರಿಂದ ಉಡುಪಿ ಜಿಲ್ಲಾ ನ್ಯಾಯಾಲಯವು ಇಬ್ಬರು ಅಪರಾಧಿಗಳಿಗೆ ಜೀವಾವಧಿ ಶಿಕ್ಷೆ ಪ್ರಕಟಿಸಿದೆ.

ಬೆಳ್ತಂಗಡಿಯ ನಿವಾಸಿಯಾದ ಮಿಥುನ್​ ಹಾಗೂ ಆತನ ಸ್ನೇಹಿತ ನಾಗೇಶ್​ ಶಿಕ್ಷೆಗೆ ಗುರಿಯಾದವರು.

ಉಡುಪಿಯ ಮಂಚಿ ಕುಮೇರಿ ನಿವಾಸ ರಮಾನಾಥ ರೈ ಎಂಬವರು ಮಣಿಪಾಲದ ಟೈಗರ್​ ಸರ್ಕಲ್​ ಬಳಿ ನಂದಿನಿ ಮಿಲ್ಕ್​ ಪಾರ್ಲರ್​ ನಡೆಸುತ್ತಿದ್ದು ಎಂದಿನಂತೆ (2022ರ ಫೆ.18 ರಂದು) ಅಂಗಡಿಗೆ ತೆರಳಿದ್ದರು. ಮನೆಯಲ್ಲಿ ಅವರ ಪತ್ನಿ ಸುಮತಿ ಒಬ್ಬರೇ ಇದ್ದರು. ಸಂಜೆ ಸುಮಾರು 7:15ರ ವೇಳೆಯಲ್ಲಿ ಅವರ ಅಕ್ಕನ ಮಗನಾದ ಬೆಳ್ತಂಗಡಿಯ ಮಿಥುನ್​ ಹಾಗೂ ಆತನ ಸ್ನೇಹಿತ ನಾಗೇಶ್​ ಮನೆಗೆ ಬಂದು ಬಾಗಿಲಿನ ಬೆಲ್​ ಮಾಡಿದರು. ಸುಮತಿಯವರು ಕಿಟಿಕಿಯಲ್ಲಿ ನೋಡಿದ್ದು, ಮಿಥುನ್​ ತನ್ನ ಸಂಬಂಧಿಯಾಗಿದ್ದರಿಂದ ಬಾಗಿಲು ತೆರೆದರು. 

ಮಿಥುನ್​ ಮತ್ತು ನಾಗೇಶ್​ ಇಬ್ಬರೂ ಮನೆಯೊಳಗೆ ಬಂದು ಸುಮತಿ ಅವರನ್ನು ಕೊಲೆ ಮಾಡುವ ಉದ್ದೇಶದಿಂದ ಅವರನ್ನು ಗಟ್ಟಿಯಾಗಿ ಹಿಡಿದುಕೊಂಡು ಕುತ್ತಿಗೆ ಹಿಸುಕಿದರು. ಉಸಿರಾಟದ ತೊಂದರೆಯಿಂದಾಗಿ ಪ್ರಜ್ಞೆ ತಪ್ಪಿ ಬಿದ್ದ ಅವರನ್ನು ಒಂದು ಚೀಲದಲ್ಲಿ ಹಾಕಿ ಬಳಿಕ ಸೂಟ್​ಕೇಸ್​ನ ಒಳಗೆ ತುಂಬಿ ಸ್ಥಳದಿಂದ ಸಾಗಾಟ ಮಾಡಲು ಯತ್ನಿಸುತ್ತಿದ್ದರು. ಈ ವೇಳೆಯಲ್ಲಿ ಪತಿ ರಮಾನಾಥ ರೈ ಹಾಗೂ ಅಕ್ಕಪಕ್ಕದ ಮನೆಯವರು ಸೇರಿ ಹೊರಗಿನಿಂದ ಬಾಗಿಲು ಬಡಿದಾಗ, ಆರೋಪಿಗಳಿಬ್ಬರೂ ಒಳಗಿನಿಂದ ಚಿಲಕ ತೆಗೆದು ಜನರನ್ನು ದೂಡಿ ಓಡಿ ಹೋಗುತ್ತಿದ್ದರು. ಅಲ್ಲಿ ಸೇರಿದ್ದ ಸಾರ್ವಜನಿಕರು ಸಹ ಓಡಿ ಅವರಿಬ್ಬರನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸಿದರು. 

ಈ ವೇಳೆ ಮನೆಯೊಳಗೆ ಬಂದ ರೈ ಅವರು ಪತ್ನಿಯನ್ನು ಹುಡಕತೊಡಗಿದರು. ಎಲ್ಲಿಯೂ ಕಾಣದಿದ್ದಾಗ ನೆಲದಲ್ಲಿ ಬಿದ್ದಿದ್ದ ಸೂಟ್​ಕೇಸ್​ ತೆರೆದು ನೋಡಿದಾಗ ಒಳಗಡೆ ಚೀಲದಲ್ಲಿ ಸುಮತಿ ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದರು. ಕೂಡಲೇ ಅವರನ್ನು ಆಸ್ಪತ್ರೆಗೆ ಕೊಂಡೊಯ್ದು ಚಿಕಿತ್ಸೆಗಾಗಿ ದಾಖಲಿಸಿದರು. ವಾರಗಳ ಕಾಲ ಚಿಕಿತ್ಸೆಯ ಬಳಿಕ ಮಹಿಳೆ ಚೇತರಿಸಿಕೊಂಡಿದ್ದರು. ಘಟನೆಯ ಕುರಿತು ರಮಾನಾಥ ರೈ ಹಾಗೂ ಸ್ಥಳೀಯರಾದ ಸುದರ್ಶನ್​ ಎಂಬದರು ಮಣಿಪಾಲ ಠಾಣೆಗೆ ದೂರು ನೀಡಿದ್ದು, ಪ್ರಕರಣ ದಾಖಲಾಗಿತ್ತು. ಅಂದಿನ ಪೊಲೀಸ್​ ಉಪನಿರೀಕ್ಷಕ ರಾಜಶೇಖರ್​ ವಂದಲಿ ಅವರು ಆರೋಪಿತರ ವಿರುದ್ಧ ನ್ಯಾಯಾಲಯಕ್ಕೆ ಆರೋಪ ಪಟ್ಟಿ ಸಲ್ಲಿಸಿದ್ದರು.

ಪ್ರಕರಣದ ವಿಚಾರಣೆ ನಡೆಸಿದ್ದ ಉಡುಪಿಯ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಕಿರಣ್​ ಎಸ್​. ಗಂಗಣ್ಣವರ್​, ಆರೋಪಿತರು ತಪ್ಪಿತಸ್ಥರು ಎಂದು ತೀಮಾರ್ನಿಸಿ ಮಿಥುನ್​ ಹಾಗೂ ನಾಗೇಶ್​ ಅವರಿಗೆ ಜೀವಾವಧಿ ಶಿಕ್ಷೆ ಪ್ರಕಟಿಸಿದರು. ಅಲ್ಲದೆ, ತಲಾ 20 ಸಾವಿರ ರೂ. ದಂಡ, ಅಪರಾಧಕ್ಕಾಗಿ 5 ವರ್ಷ ಕಠಿಣ ಸಜೆ ಮತ್ತು ತಲಾ 5 ಸಾವಿರ ರೂ. ದಂಡ ವಿಧಿಸಿ ತೀರ್ಪು ನೀಡಿದ್ದಾರೆ. ಅಪರಾಧಿಗಳಿಂದ ವಸೂಲಾದ ದಂಡದ ಹಣದ ಪೈಕಿ 45 ಸಾವಿರ ರೂ.ವನ್ನು ಗಾಯಾಳು ಸುಮತಿ ಅವರಿಗೆ ಪರಿಹಾರವಾಗಿ ನೀಡಲು ತೀರ್ಪಿನಲ್ಲಿ ಆದೇಶಿಸಲಾಗಿದೆ ಎಂದು ಸರ್ಕಾರಿ ಅಭಿಯೋಜಕ ಜಯರಾಂ ಶೆಟ್ಟಿ ತಿಳಿಸಿದ್ದಾರೆ.