ಉಡುಪಿ: ಉಡುಪಿ ಜಿಲ್ಲಾ ನ್ಯಾಯಾಲಯವನ್ನು ಸ್ಪೋಟಿಸುವುದಾಗಿ ಮತ್ತೆ ಇ-ಮೇಲ್​ ಮೂಲಕ ಬಾಂಬ್​ ಬೆದರಿಕೆ ಕರೆ ಬಂದಿದ್ದು, ಜಿಲ್ಲಾ ಪೊಲೀಸ್, ಶ್ವಾನದಳ ಹಾಗೂ ಬಾಂಬ್​ ನಿಷ್ಕ್ರಿಯ ದಳದ ಸಿಬ್ಬಂದಿ ಕೋರ್ಟ್​ ಸಂಕೀರ್ಣದಲ್ಲಿ ಶನಿವಾರ (ಜೂ.27) ತಪಾಸಣೆ ನಡೆಸಿದರು. 

ಗಂಟೆಗಳ ಕಾಲ ಪರಿಶೀಲನೆ ನಡೆಸಿದ ಬಳಿಕ ಇದೊಂದು ಹುಸಿ ಬಾಂಬ್​ ಬೆದರಿಕೆಯ ಕರೆ ಎಂದು ತಿಳಿದುಬಂತು.

ಉಡುಪಿ ಕೋರ್ಟ್​ನ ಇ-ಮೇಲ್​ ಐಡಿಗೆ ಜೂ.26ರ ರಾತ್ರಿ 8:53ಕ್ಕೆ ಬಾಂಬ್​ ಬೆದರಿಕೆಯ ಸಂದೇಶ ಬಂದಿದ್ದು, ಶನಿವಾರ (ಜೂ.27) ಮಧ್ಯಾಹ್ನ 12 ಗಂಟೆಗೆ ಇ&ಮೇಲ್​ ಗಮನಿಸಲಾಗಿದೆ. ತಕ್ಷಣ ಪೊಲೀಸ್​ ಇಲಾಖೆಗೆ ಮಾಹಿತಿ ನೀಡಿದ್ದು, ಸ್ಥಳಕ್ಕೆ ಉಡುಪಿ ನಗರಠಾಣಾ ಪಿಎಸ್​ಐಗಳಾದ ಭರತೇಶ್​, ಈರಣ್ಣ, ಸಿಬ್ಬಂದಿ ಬಶೀರ್​ ಸೇರಿದಂತೆ ಇನ್ನಿತರ ಮಹಿಳಾ ಸಿಬ್ಬಂದಿ ಕೋರ್ಟ್​ಗೆ ಬಂದೋಬಸ್ತ್​ ಮಾಡಿದರು.

ಕೋರ್ಟ್​ ಹಾಲ್​ನಲ್ಲಿ ಪೊಲೀಸರು, ಶ್ವಾನದಳ ತಪಾಸಣೆ ಆರಂಭಿಸಿದರೂ ನ್ಯಾಯಾಧೀಶರು ಪೀಠದಲ್ಲೇ ಕುಳಿತು, ಪರಿಶೀಲನೆಗೆ ಅನುವು ಮಾಡಿಕೊಟ್ಟರು. ವಕೀಲರು ಹಾಗೂ ಕಕ್ಷಿದಾರರನ್ನು ತಪಾಸಣೆಯ ವೇಳೆ ಕಲಾಪದ ಹಾಲ್​ನಿಂದ ಹೊರಗೆ ಕಳುಹಿಸಲಾಗಿತ್ತು. ಹುಸಿ ಬಾಂಬ್​ ಬೆದರಿಕೆ ಎಂದು ಸ್ಪಷ್ಟವಾದ ಬಳಿಕ ಕಲಾಪ ಮುಂದುವರಿಯಿತು.