ಬಾಂಜಾರು ಕಾಲನಿಗೆ ಸೌಲಭ್ಯ ಮರೀಚಿಕೆ

ದ.ಕ. ಜಿಲ್ಲೆಯ ಹೆಬ್ಬಾಗಿಲು ಎಂದೇ ಕರೆಯುವ ಬಾಂಜಾರು ಮಲೆಕುಡಿಯ ಕಾಲೋನಿಗೆ ಅಭಿವೃದ್ಧಿ ಎಂಬುದು ದಶಕಗಳಿಂದಲೂ ಮರೀಚಿಕೆಯಾಗಿದ್ದು, ಚುನಾವಣೆ ಸಂದರ್ಭ ಮತಯಾಚನೆಗಷ್ಟೇ ಈ ಪ್ರದೇಶ ಸೀಮಿತವಾಗಿದೆ.

ಬೆಳ್ತಂಗಡಿ ತಾಲೂಕು ಕೇಂದ್ರದಿಂದ 45 ಕಿ.ಮೀ. ದೂರದಲ್ಲಿ ದ.ಕ ಮತ್ತು ಚಿಕ್ಕಮಗಳೂರು ಜಿಲ್ಲೆಯ ಗಡಿಭಾಗದ ದಟ್ಟ ಅರಣ್ಯದ ನಡುವೆ ಬಾಂಜಾರು ಮಲೆಕುಡಿಯ ಕಾಲನಿ ಇದೆ. ಈ ಊರಿನಲ್ಲಿ ಜಿಲ್ಲಾಧಿಕಾರಿಗಳ ಗೌರವಾರ್ಥ 1982ರಲ್ಲಿಕ ಡಿಸಿ ಕಟ್ಟೆ ನಿರ್ಮಿಸಿದ್ದು, 2016ರಲ್ಲಿ ಜಿಲ್ಲಾಧಿಕಾರಿಯಾಗಿದ್ದ ಎ.ಬಿ.ಇಬ್ರಾಹಿಂ ಅದನ್ನು ಉದ್ಘಾಟಿಸಿದ್ದರು. ಬಳಿಕ 4.50 ಕೋಟಿ ರೂ. ವೆಚ್ಚದಲ್ಲಿ ಅಭಿವೃದ್ಧಿಗಳಾದವು. ಜತೆಗೆ ಚುನಾವಣೆ ಬೂತ್ ಸ್ಥಾಪನೆಗೊಂಡಿತು. ಸಸಿಕಾಂತ್ ಸೆಂಥಿಲ್ ಜಿಲ್ಲಾಧಿಕಾರಿಯಾಗಿದ್ದಾಗ 48 ಮಲೆಕುಡಿಯ ಕುಟುಂಬಗಳಿಗೆ ವಿದ್ಯುತ್ ಸಂಪರ್ಕ ದೊರೆಯುವುದರ ಜತೆಗೆ ರಸ್ತೆ ನಿರ್ವಾಣಕ್ಕೆ ಕಂದಾಯ, ಅರಣ್ಯ ಇಲಾಖೆಯಿಂದ ಜಂಟಿ ಸರ್ವೆ ನಡೆಯಿತು. ಆದರೆ ನಂತರ ಅಭಿವೃದ್ಧಿ ಕಾರ್ಯಗಳು ನನೆಗುದಿಗೆ ಬಿದ್ದಿವೆ.

ಬಾಂಜಾರು ಮಲೆಕುಡಿಯ ಕಾಲನಿಗೆ ಚಾರ್ವಾಡಿ ಘಾಟಿಯ ಒಂಬತ್ತು ತಿರುವುನಿಂದ 9 ಕಿ.ಮೀ. ದೂರ ಅರಣ್ಯ ಮತ್ತು ಖಾಸಗಿ ಜಮೀನಿನ ಮೂಲಕ ತೆರಳಬೇಕು. ಈ ರಸ್ತೆ ಅಭಿವೃದ್ಧಿಪಡಿಸಲು ಅರಣ್ಯ ಇಲಾಖೆ ಹಾಗೂ ಖಾಸಗಿ ಜಾಗದ ಮಾಲೀಕರ ವಿರೋಧವಿದೆ. ಇದಕ್ಕೆ ಪರ್ಯಾಯವಾಗಿ ಆಗಿನ ಜಿಲ್ಲಾಧಿಕಾರಿಯಾಗಿದ್ದ ಸಸಿಕಾಂತ್ ಸೆಂಥಿಲ್ ಅವರು ನೆರಿಯ ಗ್ರಾಮದ ಅಣಿಯೂರು- ಕಾಟಾಜೆ- ಪರ್ಪಲ ಮೂಲಕ ಬಾಂಜಾರು ಮಲೆಕುಡಿಯ ಕಾಲನಿ ರಸ್ತೆ ಸಂಪರ್ಕಕ್ಕೆ ಸರ್ವೆ ಕಾರ್ಯ ನಡೆಸಿದ್ದರು. ಬಳಿಕ ಅಭಿವೃದ್ಧಿ ಕಾಮಗಾರಿ ಅಲ್ಲಿಗೇ ಸ್ಥಗಿತಗೊಂಡಿದೆ.

ಬಾಂಜಾರು ಪ್ರದೇಶದಲ್ಲಿ 200ಕ್ಕೂ ಅಧಿಕ ಕುಟುಂಬಗಳು ವಾಸಿಸುತ್ತಿದ್ದು, 30ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಬಾಂಜಾರು ಪ್ರದೇಶವೊಂದರಲ್ಲೇ ಇದ್ದಾರೆ. ನೆಟ್‌ವರ್ಕ್ ಸಮಸ್ಯೆಯಿಂದ ಆನ್‌ಲೈನ್ ತರಗತಿಗಳಿಗಾಗಿ ವಿದ್ಯಾರ್ಥಿಗಳು 18 ಕಿ.ಮೀ. ದೂರದ ಚಾರ್ಮಾಡಿಗೆ ಬರಬೇಕಿದೆ. ಜತೆಗೆ ಪಡಿತರ ಪಡೆಯಲು ನೆಟ್‌ವರ್ಕ್ ಅವಶ್ಯಕತೆಯಿದ್ದು, ಈ ಕಾರಣದಿಂದ ಗ್ರಾಮಸ್ಥರು ಮೊಬೈಲ್ ಹಿಡಿದುಕೊಂಡು ಮರ ಅಥವ ಬಂಡೆಕಲ್ಲು ಏರುವ ಅನಿವಾರ್ಯತೆ ಇದೆ.