ಉಡುಪಿ: ಶಿಕ್ಷಣದ ಜತೆಗೆ ಸಮಗ್ರ ಅಭಿವೃದ್ಧಿ ಉತ್ತೇಜಿಸುವುದು ಮಾಹೆಯ ದೃಷ್ಟಿಕೋನವಾಗಿದ್ದು, ಸಹಸ್ರ ಸಂಖ್ಯೆಯಲ್ಲಿ ಓಟಗಾರರು ಪಾಲ್ಗೊಂಡಿರುವ ಈ ಮಣಿಪಾಲ್​ ಮ್ಯಾರಥಾನ್​ ಕ್ಕೆ ಸಾಕ್ಷಿಯಾಗಿದೆ. ನಾವು ಕೇವಲ ದೈಹಿಕ ದೃಢತೆ ಮತ್ತು ಆರೋಗ್ಯವನ್ನಷ್ಟೇ ಉತ್ತೇಜಿಸುತ್ತಿಲ್ಲ. ಸುಸ್ಥಿರ&ಹಸಿರು ಭವಿಷ್ಯಕ್ಕಾಗಿ ಬದ್ಧತೆಯ ಹೆಜ್ಜೆ-ಓಟ ಇದಾಗಿದೆ. ಪರಿಸರ ಸಂರಕ್ಷಣೆ ಮತ್ತು ಸಮುದಾಯದ ಒಳಿತಿಗಾಗಿ ನಮ್ಮ ಬದ್ಧತೆಯನ್ನು ಪಾಲಿಸುತ್ತಿದ್ದೇವೆ ಎಂದು ಮಾಹೆಯ ಸಹಕುಲಾಧಿಪತಿ ಡಾ. ಎಚ್​.ಎಸ್​. ಬಲ್ಲಾಳ್​ ತಿಳಿಸಿದರು. 

ಮಣಿಪಾಲ ಅಕಾಡೆಮಿ ಆಫ್​ ಹೈಯರ್​ ಎಜುಕೇಷನ್​ (ಮಾಹೆ) ವತಿಯಿಂದ ಮಣಿಪಾಲದ ಕೆಎಂಸಿ ಗ್ರೀನ್ಸ್​ನಲ್ಲಿ ಭಾನುವಾರ (ಫೆ.8) ಬೆಳಗ್ಗೆ ಆಯೋಜಿಸಿದ್ದ 8ನೇ ಆವೃತ್ತಿಯ "ಮಣಿಪಾಲ ಮ್ಯಾರಥಾನ್​'ಗೆ ಚಾಲನೆ ನೀಡಿ ಮಾತನಾಡಿದರು.

ಭಾರತದಲ್ಲಿಯೇ ವಿದ್ಯಾರ್ಥಿ ಆಯೋಜಿತ ಅತಿದೊಡ್ಡ ಕಾರ್ಯಕ್ರಮವಾಗಿ ಗುರುತಿಸಿಕೊಂಡ ಮಣಿಪಾಲ್​ ಮ್ಯಾರಥಾನ್​ನಲ್ಲಿ 20 ಸಾವಿರಕ್ಕೂ ಅಧಿಕ ಕ್ರೀಡಾಪಟುಗಳು ಭಾಗವಹಿಸಿದ್ದರು. ವಿವಿಧ ವಿಭಾಗಗಳಲ್ಲಿ ನಡೆದ ಸ್ಪರ್ಧೆಯಲ್ಲಿ ಒಟ್ಟು 25 ಲಕ್ಷ ರೂಪಾಯಿಗೂ ಅಧಿಕ ಮೊತ್ತದ ನಗದು ಬಹುಮಾನ ನೀಡಲಾಯಿತು. ದುಬೈ, ಇಂಗ್ಲಂಡ್​, ಇಥಿಯೋಪಿಯ, ಜರ್ಮನಿ, ಕೀನ್ಯಾ, ಜಪಾನ್​, ಮಲೇಷಿಯಾ, ನೇಪಾಳ, ಶ್ರೀಲಂಕಾ ಮತ್ತು ಅಮೆರಿಕ ಸೇರಿದಂತೆ 10ಕ್ಕೂ ಹೆಚ್ಚು ದೇಶಗಳ 100ಕ್ಕೂ ಅಧಿಕ ಅಂತಾರಾಷ್ಟ್ರೀಯ ಕ್ರೀಡಾಪಟುಗಳು ಪಾಲ್ಗೊಂಡಿದ್ದರು.

ಈ ಬಾರಿ 42 ಕಿಮೀ ಪೂರ್ಣ ಮ್ಯಾರಥಾನ್​ ನಿಮಿತ್ತ ಕಡಲತೀರದಲ್ಲಿ ಓಡಲು ಅವಕಾಶ ಕಲ್ಪಿಸಲಾಗಿತ್ತು. ಓಟದ ಬಳಿಕ ಸಂಭ್ರಮದ ಕಾರ್ನಿವಲ್​ ಆಚರಿಸಲಾಯಿತು. ಸಂಗೀತ, ಸಾಂಸತಿಕ ಪ್ರದರ್ಶನ ಹಾಗೂ ಸಂವಾದಾತ್ಮಕ ಫಿಟ್​ನೆಸ್​ ಮತ್ತು ಜುಂಬಾ ಸೆಷನ್​ಗಳು ಮ್ಯಾರಥಾನ್​ನ ಸಡಗರ ಹೆಚ್ಚಿಸಿದವು.

ಮಾಹೆಯ ಕುಲಪತಿ ಡಾ. ಎಂ.ಡಿ. ವೆಂಕಟೇಶ್​, ಆರೋಗ್ಯ ವಿಜ್ಞಾನ ವಿಭಾಗದ ಸಹ ಕುಲಪತಿ ಡಾ. ಶರತ್​ ರಾವ್​, ಮಂಗಳೂರು ಕ್ಯಾಂಪಸ್​ನ ಸಹ ಕುಲಪತಿ ಡಾ. ದಿಲೀಪ್​ ನಾಯ್ಕ್​, ಸಿಇಒ ಡಾ. ಆನಂದ್​ ವೇಣುಗೋಪಾಲ್​, ಸಿಕ್ಕಿಂ ಮಣಿಪಾಲ್​ ವಿವಿ ಕುಲಪತಿ ಡಾ. ಗೋಪಾಲಕೃಷ್ಣ ಪ್ರಭು, ಮಾಹೆಯ ಇತರ ಹಿರಿಯ ಅಧಿಕಾರಿಗಳು, ಶಾಸಕರಾದ ಯಶ್​ಪಾಲ್​ ಸುವರ್ಣ, ಗುರುರಾಜ ಗಂಟಿಹೊಳೆ ಹಾಗೂ ಜನಪ್ರತಿನಿಧಿಗಳು ಉಪಸ್ಥಿತರಿದ್ದರು.