ನಾನೇನು ಮಂತ್ರಿಯಲ್ಲವೇ? ಇದೆಲ್ಲಾ ಸರಿಯಲ್ಲ...

ಕಂದಾಯ ಇಲಾಖೆಯಿಂದ ಜಿಲ್ಲಾಧಿಕಾರಿ ಶುಭಕಲ್ಯಾಣ್​ ಕೆಲಹೊತ್ತು ಮಾತ್ರ ಇದ್ದು ನಂತರ ಜಿಲ್ಲಾ ಉಸ್ತುವಾರಿ ಸಚಿವರ ಸಭೆಯ ನೆಪ ಹೇಳಿಕೊಂಡು ಎದ್ದು ಹೋದರು. ಸಭೆಯಲ್ಲಿ ಯಾವ ತಾಲೂಕಿನ ತಹಸೀಲ್ದಾರ್​ಗಳು ಕೂಡ ಭಾಗವಹಿಸಿರಲಿಲ್ಲ. ಬಿಸಿಎಂ ಇಲಾಖೆ ಅಧಿಕಾರಿ ಎದ್ದು ಹೊರಹೋದವರು ಒಳಗೆ ಬರಲೇ ಇಲ್ಲ... ಹೀಗೆ ಬಹುತೇಕ ಇಲಾಖೆಗಳು ಅಧಿಕಾರಿಗಳು ಕೇಂದ್ರ ಸಚಿವರ ಸಭೆಯನ್ನು ಉದಾಸೀನ ಮಾಡಿದ್ದು ಅಚ್ಚರಿ ಮೂಡಿಸಿತು.

ಅಧಿಕಾರಿಗಳು ಇಲ್ಲದಿರುವ ಬಗ್ಗೆ ಪ್ರಶ್ನಿಸದರೆ ಸಚಿವರ ಸಭೆಗೆ ಹೋಗಿದ್ದಾರೆ ಸರ್​ ಎಂದು ಸಭೆಗೆ ಕಡತಗಳೊಂದಿಗೆ ಹಾಜರಾಗಿದ್ದ ಆಯಾ ಇಲಾಖೆ ಸಿಬ್ಬಂದಿ ಉತ್ತರಕ್ಕೆ ಗರಂ ಆದ ವಿ.ಸೋಮಣ್ಣ, ಏಕೆ ನಾನು ಮಂತ್ರಿಯಲ್ಲವೇ? ಅಧಿಕಾರಿಗಳೇ ದಿಶಾ ಸಭೆಗೆ ತಪ್ಪಿಸಿಕೊಳ್ಳುವುದು ಮೂರ್ಖತನದ ಪರಮಾವಧಿಯಷ್ಟೇ, ಯಾವ ಇಲಾಖೆ ಅಧಿಕಾರಿಗಳು ಗೈರಾಗಿದ್ದಾರೆ ನನಗೆ ಪಟ್ಟಿಕೊಡಿ, ಸಭೆಗೆ ಗೈರಾಗಿರುವ ಮಧುಗಿರಿ ಹಾಗೂ ತುಮಕೂರು ತಾಪಂ ಇಒಗಳಿಗೆ ನೋಟಿಸ್​ ನೀಡಲು ಎಂದು ಜಿಪಂ ಸಿಇಒ ಬಿ.ವಿ.ಅಶ್ವಿಜಾಗೆ ಸೂಚಿಸಿದರು.

ನಾನೂ ಅಧಿಕಾರಕ್ಕೆ ಬಂದು 49ವರ್ಷ ಪೂರೈಸಿದ್ದೇನೆ ನನಗೂ ಅನುಭವವಿದೆ, ಅಧಿಕಾರಿಗಳು ಅಸಹಕಾರ ತೋರಿಸಿದರೆ ಏನು ಮಾಡಬೇಕು ಎಂಬುದು ಅರಿವಿದೆ ಎಂದು ಖಡಕ್​ ಎಚ್ಚರಿಕೆ ಕೂಡ ನೀಡಿದರು. ಬಹುತೇಕ ಇಲಾಖೆ ಅಧಿಕಾರಿಗಳು ಭಾಗವಹಿಸದ ಕಾರಣದಿಂದ ಮೇ.29ರಂದು ಆಯ್ದ ಇಲಾಖೆಗಳ ಸಭೆಯನ್ನು ನಡೆಸಲು ತಿರ್ಮಾನಿಸಿದರು.

ಕುಡಿಯುವ ನೀರಿಗೆ ಕೇವಲ 5ಕೋಟಿ ರೂ: ಜಿಲ್ಲೆಯಲ್ಲಿ ಕುಡಿಯುವ ನೀರಿಗೆ ತೀವ್ರ ಅಭಾವ ಸೃಷ್ಠಿಯಾಗಿದ್ದು ತುರ್ತು ನಿರ್ವಹಣೆಗೆ ರಾಜ್ಯ ಸರ್ಕಾರದಿಂದ ಕೇವಲ 5ಕೊಟಿ ರೂ. ಮಾತ್ರ ನೀಡಲಾಗಿದೆ ಎಂದು ಶಾಸಕ ಬಿ.ಸುರೇಶ್​ಗೌಡ ಆತಂಕ ವ್ಯಕ್ತಪಡಿಸಿದರು. ಜಿಲ್ಲೆಯಲ್ಲಿ 11 ವಿಧಾನಸಭಾ ಕ್ಷೇತ್ರಗಳಿದ್ದು ತಲಾ 40 ಲಕ್ಷ ರೂ. ಮಾತ್ರ ಹಂಚಿಕೆಯಾಗಲಿದೆ ಎಂದರು.

ಸರ್ಕಾರ ನೀಡಿರುವ 40 ಲಕ್ಷ ರೂ. ಅನುದಾನದಲ್ಲಿ ಎಷ್ಟು ಕೊಳವೆಬಾವಿ ಕೊರೆಸಲು ಸಾಧ್ಯ ಎಂದು ಸುರೇಶ್​ಗೌಡ ಪ್ರಶ್ನಿಸಿದರು, ಜಿಲ್ಲಾಧಿಕಾರಿ ಶುಭಕಲ್ಯಾಣ್​ ಉತ್ತರಿಸಿ, ಟಾಸ್ಕ್​ಪೋರ್ಸ್​ ಮೀಟಿಂಗ್​ನಲ್ಲಿ ತಕ್ಷಣಕ್ಕೆ ಕೊಳವೆಬಾವಿ ಕೊರೆಸುವುದು ಹಾಗೂ ವಿದ್ಯುದಿಕರಣಕ್ಕೆ ಹಣ ಬಳಸಿಕೊಳ್ಳಲಾಗುವುದು ಹಾಗೂ ಅಗತ್ಯಬಿದ್ದರೆ ಮತ್ತಷ್ಟು ಅನುದಾನ ಸರ್ಕಾರ ಒದಗಿಸಲಿದೆ ಎಂದರು.

ಜಿಲ್ಲೆಯಲ್ಲಿ 34 ಬಹುಗ್ರಾಮ ಕುಡಿಯುವ ನೀರಿನ ಯೋಜನೆಗಳಿದ್ದು 14 ಮಾತ್ರ ಕಾರ್ಯನಿರ್ವಹಿಸುತ್ತಿವೆ, 20 ಯೋಜನೆಗಳು ನೆನಗುದಿಗೆ ಬಿದ್ದಿವೆ. ಅಧಿಕಾರಿಗಳ ಇಚ್ಛಾಶಕ್ತಿಯ ಕೊರತೆಯಿಂದ ಸರ್ಕಾರದ ಮಹತ್ವಾಕಾಂ ಯೋಜನೆ ಪೋಲಾಗಿದೆ ಎಂದು ಸುರೇಶ್​ಗೌಡ ದೂರಿದರು. ನಮ್ಮ ತಾಲೂಕಿನ ಎಲ್ಲಾ ಕೆರೆಗಳಲ್ಲಿ ನೀಡಿದೆ ಆದರೆ ಎಂವಿಎಸ್​ ಕೆಲಸ ಮಾಡುತ್ತಿಲ್ಲ ಎಂದು ಶಾಸಕ ಎಂ.ಟಿ.ಕೃಷ್ಣಪ್ಪ ದೂರಿದರು.

ಕುಡಿಯುವ ನೀರಿನ ಎಲ್ಲಾ ಯೋಜನೆಗಳ ಅನುಷ್ಠಾನ ಸಂಬಂಧಿಸಿದಂತೆ ಸಮಗ್ರ ವರದಿ ತಯಾರಿಸಿ ಮೇ.29ರಂದು ಸಭೆಯಲ್ಲಿ ನೀಡಬೇಕು, ಕುಡಿಯುವ ನೀರಿನ ಸಮಸ್ಯೆಯನ್ನು ಆದ್ಯತೆ ಮೇಲೆ ಬಗೆಹರಿಸಬೇಕು, ಕೇಂದ್ರದಿಂದ ಅನುದಾನದ ಅಗತ್ಯವಿದ್ದರೆ ನಾನು ತರುತ್ತೇನೆ ಎಂದು ಸೋಮಣ್ಣ ಭರವಸೆ ನೀಡಿದರು.

ಮನರೇಗಾ ಯೋಜನೆಗೆ ಪರ್ಯಾಯವಾಗಿ ಜಾರಿಗೆ ತಂದಿರುವ ವಿಬಿ ರಾಮ್​ ಜಿ ಯೋಜನೆ ಜುಲೈ 1ರಿಂದ ಅಧಿಕೃತವಾಗಿ ಆರಂಭವಾಗಲಿದ್ದು, ಈ ಯೋಜನೆ ವ್ಯಾಪ್ತಿಗೆ ಗ್ರಾಮೀಣ ಪ್ರದೇಶದ ಜನರಿಗೆ ಉತ್ತಮ ಉದ್ಯೋಗಾವಕಾಶಗಳು ಸಿಗಲಿವೆ. ಅಲ್ಲದೆ, ಹಲವಾರು ಅಭಿವೃದ್ಧಿ ಕಾರ್ಯಗಳನ್ನು ಈ ಯೋಜನೆ ವ್ಯಾಪ್ತಿಯಲ್ಲಿ ಅನುಷ್ಠಾನಗೊಳಿಸಲು ಅವಕಾಶವಿದೆ ಎಂದರು.

ಕೇಂದ್ರ ಪುರಸ್ಕತ ಯೋಜನೆಗಳಾದ ರಾಷ್ಟ್ರೀಯ ಹೆದ್ದಾರಿ, ರೈಲ್ವೆ ಕಾಮಗಾರಿಗಳು, ಕೃಷಿ ವಿಮಾ ಯೋಜನೆಗಳು, ತೋಟಗಾರಿಕೆ ಯೋಜನೆಗಳು ಸೇರಿದಂತೆ ಎಲ್ಲಾ ಯೋಜನೆಗಳನ್ನು ಸಮರ್ಪಕವಾಗಿ ಅನುಷ್ಠಾನಗೊಳಿಸುವಂತೆ ವಿ.ಸೋಮಣ್ಣ ಸೂಚಿಸಿದರು.

ಸಭೆಯಲ್ಲಿ ನವದೆಹಲಿಯ ವಿಶೇಷ ಪ್ರತಿನಿಧಿ ಟಿ.ಬಿ.ಜಯಚಂದ್ರ, ಜಿಲ್ಲಾಧಿಕಾರಿ ಶುಭಕಲ್ಯಾಣ್​, ಜಿಪಂ ಸಿಇಒ ಬಿ.ವಿ.ಅಶ್ವಿಜಾ, ಜಿಲ್ಲಾ ಪೊಲೀಸ್​ ಅಧೀಕ್ಷಕ ಕೆ.ವಿ.ಅಶೋಕ್​ ಮತ್ತಿತರರು ಇದ್ದರು.