ತುಮಕೂರು ವಿವಿ "ಕಲ್ಪ ಸಿರಿ'ಗೆ ಉದ್ಘಾಟನಾ ಭಾಗ್ಯ

ತಿಪಟೂರು ರಂಗಾಪುರ ಹೊಸಹಳ್ಳಿಯಲ್ಲಿ ಸರ್ಕಾರ ನೀಡಿರುವ 16.20ಎಕರೆ ಕ್ಯಾಂಪಸ್​ನಲ್ಲಿ 7.70ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಿರುವ "ಕಲ್ಪಸಿರಿ' ಕ್ಯಾಂಪಸ್​ಗೆ ಡಿಸಿಎಂ ಡಾ.ಜಿ.ಪರಮೇಶ್ವರ ಜು.8ರಂದು ಮಧ್ಯಾಹ್ನ 3ಕ್ಕೆ ಚಾಲನೆ ನೀಡಬೇಕಿತ್ತು ಆದರೆ, ನಿಗದಿಯಾಗಿದ್ದ ಸಮಯ ಕೊನೆಯ ಕ್ಷಣದಲ್ಲಿ ಬದಲಾವಣೆಯಾಗಿದ್ದು ಕೇಂದ್ರ ಸಚಿವ ವಿ.ಸೋಮಣ್ಣ ಸಲಹೆಯಂತೆ ಜು.13ಕ್ಕೆ ಮುಂದೂಡಿಕೆಯಾಗಿದೆ.

2022ರಲ್ಲಿ ಅಂದಿನ ಕುಲಪತಿ ಪ್ರೊ.ವೈ.ಎಸ್​.ಸಿದ್ದೇಗೌಡ ಹಾಗೂ ಸಿಂಡಿಕೇಟ್​ ಸದಸ್ಯ ದೂರದೃಷ್ಠಿಯ ಲವಾಗಿ ರಂಗಾಪುರ ಗ್ರಾಪಂ ವ್ಯಾಪ್ತಿಯಲ್ಲಿದ್ದ ಸರ್ಕಾರಿ ಭೂಮಿಯನ್ನು ವಿವಿಗೆ ಪಡೆದು ಸ್ನಾತಕೋತ್ತರ ಕೇಂದ್ರ ಆರಂಭಿಸಲು ವಿವಿ ಆಂತರಿಕ ನಿಧಿಯಿಂದಲೇ ಆರಂಭದಲ್ಲಿ ಬರೋಬ್ಬರಿ 3ಕೋಟಿ ರೂ. ಅಂದಾಜು ವೆಚ್ಚದಲ್ಲಿ ಶೈಕ್ಷಣಿಕ ಭವನ ನಿರ್ಮಾಣಕ್ಕೆ ಚಾಲನೆ ನೀಡಲಾಗಿತ್ತು.

2025ರ ಡಿಸೆಂಬರ್​ವರೆಗೂ ಸಾಗಿದ ವಿವಿಧ ಕಾಮಗಾರಿಗೆ ಈವರೆಗೂ 7.70ಕೋಟಿ ರೂ. ವೆಚ್ಚವಾಗಿದ್ದು ಕಟ್ಟಡ ನಿರ್ಮಾಣವಾಗಿ ಬರೋಬ್ಬರಿ ಆರು ತಿಂಗಳ ನಂತರ ಉದ್ಘಾಟನೆಯಾಗುತ್ತಿದೆ. ಪ್ರಸ್ತುತ ತಿಪಟೂರು ಸ್ನಾತಕೋತ್ತರ ಕೇಂದ್ರ ಸರ್ಕಾರಿ ಪದವಿ ಕಾಲೇಜಿನಲ್ಲಿ ನಡೆಯುತ್ತಿದ್ದು 220 ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ.

ತುಮಕೂರು ವಿವಿ ತಿಪಟೂರು ಸ್ನಾತಕೋತ್ತರ ಕೇಂದ್ರದ ಬಗ್ಗೆ ಆರಂಭದಿಂದಲೂ ಮಲತಾಯಿ ಧೋರಣೆ ಹೊಂದಿದೆ ಎಂಬ ಆರೋಪವಿದ್ದು

ಕೇಂದ್ರ ಆರಂಭವಾಗಿ ದಶಕವಾದರೂ ಎಂ.ಕಾಂ ಹಾಗು ಎಂಸಿಎ ಕೋರ್ಸ್​ಗಳಿಗೆ ಮಾತ್ರ ಅವಕಾಶ ನೀಡಿದೆ. ಎರಡೂ ವಿಭಾಗದಲ್ಲಿ 220 ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದು ಒಬ್ಬರು ನಿರ್ದೇಶಕ, 9 ಬೋಧಕ ಹಾಗೂ ಮೂವರು ಬೋಧಕೇರತ ಸಿಬ್ಬಂದಿ ಮೂಲಸೌಕರ್ಯವಿಲ್ಲದೆ ಕಾರ್ಯನಿರ್ವಹಿಸುತ್ತಿದ್ದಾರೆ.

ವಿವಿಯಲ್ಲಿ ಇರುವ ಎಲ್ಲಾ ಕೋರ್ಸ್​ಗಳನ್ನು ತಿಪಟೂರು ಸ್ನಾತಕೋತ್ತರ ಕೇಂದ್ರದಲ್ಲಿಯೂ ಆರಂಭಿಸಬೇಕು, ತೆಂಗಿನ ಸೀಮೆಯ ಗ್ರಾಮೀಣ ಮಕ್ಕಳಿಗೆ ಉನ್ನತ ಶಿಕ್ಷಣ ಲಭಿಸುವಂತಾಗಲು ವಿವಿಯಲ್ಲಿರುವ ಖಾಯಂ ಪ್ರಾಧ್ಯಾಪಕರು, ಸಿಬ್ಬಂದಿಯನ್ನು ತಿಪಟೂರು ಕೇಂದ್ರಕ್ಕೂ ವರ್ಗಾವಣೆ ಮಾಡಬೇಕು ಎಂದು ಆಗ್ರಹವಿದೆ.

ರಂಗಾಪುರಕ್ಕೆ ತೆರಳುವ ಮಾರ್ಗದಲ್ಲಿ ತಿಪಟೂರು ನಗರದಿಂದ 5ಕಿಮೀ ದೂರದಲ್ಲಿ ನಿರ್ಮಾಣವಾಗಿರುವ "ಕಲ್ಪಸಿರಿ' ಕ್ಯಾಂಪಸ್​ಗೆ ತೆರಳಲು ವಿದ್ಯಾರ್ಥಿಗಳಿಗೆ ಸೂಕ್ತವಾದ ಸಾರಿಗೆ ಸೌಲಭ್ಯವಿಲ್ಲ ಎಂಬುದು ಚಿಂತಿಗೀಡು ಮಾಡಿದೆ. ರಂಗಾಪುರ ಮಾರ್ಗವಾಗಿ ಧಸರೀಟ್ಟಕ್ಕೆ ತೆರಳುವ ಬೆರಳೆಣಿಕೆ ಬಸ್​ಗಳನ್ನು ನಂಬಿ ವಿದ್ಯಾರ್ಥಿಗಳು ಕ್ಯಾಂಪಸ್​ಗೆ ತೆರಳುವುದು ಕಷ್ಟಸಾಧ್ಯ ಎನ್ನಿಸಿದೆ.

ವಿದ್ಯಾರ್ಥಿನಿಯರ ಸಂಖ್ಯೆಯೇ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಅವರ ಸುರಕ್ಷತೆಗೂ ಆದ್ಯತೆ ನೀಡಬೇಕಿದ್ದು ಕಲ್ಪಸಿರಿ ಕ್ಯಾಂಪಸ್​ನಲ್ಲಿಯೇ ಹಾಸ್ಟೆಲ್​ ವ್ಯವಸ್ಥೆ ಮಾಡಿಕೊಡಬೇಕು ಎಂಬ ಕೂಗು ಆರಂಭದಲ್ಲಿಯೇ ಎದ್ದಿದೆ. ಪಿಜಿ ಕ್ಯಾಂಪಸ್​ನಲ್ಲಿ ಓದುವ ವಿದ್ಯಾರ್ಥಿಗಳಿಗೆ ತಾತ್ಕಾಲಿಕವಾಗಿ ಹಾಸ್ಟೆಲ್​ ಸೌಲಭ್ಯ ನೀಡಲು ರಂಗಾಪುರದ ಮಠ ಮುಂದೆ ಬಂದಿದೆ, ವಿವಿಧ ಸಂ, ಸಂಸ್ಥೆಗಳ ಸಹಕಾರದಲ್ಲಿ ಮಹಿಳಾ ಪದವಿ ಕಾಲೇಜು ಹಾಸ್ಟೆಲ್​ ಕಟ್ಟಡದಲ್ಲಿಯೇ ವಿದ್ಯಾರ್ಥಿನಿಯರಿಗೆ ಹಾಸ್ಟೆಲ್​ ಸೌಲಭ್ಯ ಕಲ್ಪಿಸುವ ಕಾರ್ಯ ಪ್ರಗತಿಯಲ್ಲಿದೆ ಆದರೆ, ತುಮಕೂರು ಕೇಂದ್ರಿತವಾಗಿರುವ ವಿವಿ ವತಿಯಿಂದಲೇ ವಿದ್ಯಾರ್ಥಿ ಹಾಗೂ ವಿದ್ಯಾರ್ಥಿನಿಯರಿಗೆ ಶಾಶ್ವತ ಹಾಸ್ಟೆಲ್​ ಸೌಲಭ್ಯ ಕಲ್ಪಿಸುವ ಹೊಣೆಗಾರಿಕೆಯಿದೆ.