ರೈಲ್ವೆ, ಹೆದ್ದಾರಿ ಯೋಜನೆಗಳಿಗೆ ಮಣ್ಣಿನ ಬರ

ಆದರೆ, ಕೇಂದ್ರ ಸರ್ಕಾರ 2022ರಲ್ಲಿ ಜಾರಿಗೊಳಿಸಿರುವ ಅಮೃತ್​ ಸರೋವರ್​ ಯೋಜನೆಯಲ್ಲಿ ಜಿಲ್ಲೆಯ 78 ಕರೆಗಳ

ಪುನಶ್ಚೇತನಕ್ಕೆ ಗಣಿ ಮತ್ತು ಭೂವಿಜ್ಞಾನ ಕಾಯ್ದೆ ಕಾಯ್ದೆಯಲ್ಲಿ ಮಾಡಿರುವ ಸಡಿಲಿಕೆಯನ್ನು ಜಿಲ್ಲೆಯಲ್ಲಿ ಅನುಷ್ಟಾನಮಾಡಿಕೊಳ್ಳದೆ ಇಲಾಖೆ ಅಧಿಕಾರಿಗಳು ಕಾಮಗಾರಿಗೆ ಅಡ್ಡಿಪಡಿಸುತ್ತಿದ್ದಾರೆ ಎಂದು ಶಿರಾ ಶಾಸಕ ಟಿ.ಬಿ.ಜಯಚಂದ್ರ ತಕರಾರು ಎತ್ತಿದ್ದಾರೆ.

ಶಿರಾ ತಾಲೂಕು ವ್ಯಾಪ್ತಿಯ ಎಲ್ಲಾ ಕೆರೆಗಳನ್ನು ಅಮೃತ್​ ಸರೋವರ್​ ಯೋಜನೆಯಡಿ ರಾಜಧನ ವಿನಾಯಿತಿಯೊಂದಿಗೆ ಸೇರ್ಪಡೆಗೊಳಿಸಿ, ರೈಲ್ವೆ ಹಾಗೂ ಹೆದ್ದಾರಿ ಕಾಮಗಾರಿಗಳು ಸುಲಲಿತವಾಗಿ ಜರುಗಲು ಅನುಕೂಲ ಮಾಡಿಕೊಡಬೇಕು ಎಂದು ಸರ್ಕಾರಕ್ಕೂ ಮನವಿ ಸಲ್ಲಿಸಿರುವುದು ಚರ್ಚೆಗೆ ಕಾರಣವಾಗಿದೆ.

ರೈತರು ಜಮೀನುಗಳಿಗೆ ಮಣ್ಣು ಬಳಸಿಕೊಳ್ಳಲು ಕೆರೆಗಳ ಹೂಳೆತ್ತುವ ಕಾರ್ಯಕ್ಕೆ ಯಾವುದೇ ಅಭ್ಯಂತರವಿಲ್ಲ, ಆದರೆ, ಕೆರೆಯಲ್ಲಿ ಮದರ್​ ಸಾಯಿಲ್​ ತೆಗೆಯಲು ಅವಕಾಶ ಇಲ್ಲ ಎಂದು ಗಣಿ ಮತ್ತು ಭೂವಿಜ್ಞಾನ ಇಲಾಖೆ ಕಾನೂನು ಮುಂದಿಡುತ್ತಿರುವ ಶಾಸಕರು ಹಾಗೂ ಜಿಲ್ಲಾಡಳಿತದ ನಡುವೆ ಜಟಾಪಟಿಗೆ ಕಾರಣವಾಗಿದೆ.

ತುಮಕೂರು ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಈ ಬಗ್ಗೆ ಸೋಮವಾರ ಮಹತ್ವದ ಸಭೆ ಕೂಡ ನಡೆಸಲಾಗಿದ್ದು ಶಾಸಕ ಟಿ.ಬಿ.ಜಯಚಂದ್ರ, ಜಿಲ್ಲಾಧಿಕಾರಿ ಶುಭಕಲ್ಯಾಣ್​, ಜಿಪಂ ಸಿಇಒ ಬಿ.ವಿ.ಅಶ್ವಿಜಾ ಸೇರಿದಂತೆ ವಿವಿಧ ಇಲಾಖೆಗಳ ಜಿಲ್ಲಾ ಮಟ್ಟದ ಅಧಿಕಾರಿಗಳು ಭಾಗವಹಿಸಿ ಚರ್ಚಿಸಿದ್ದಾರೆ. ಆಯಾ ಗ್ರಾಪಂಗಳಿಂದ ಮನವಿಯನ್ನು ಜಿಪಂಗೆ ಸಲ್ಲಿಸಿ, ಜಿಲ್ಲಾಧಿಕಾರಿ ಮೂಲಕ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲು ನಿರ್ಧರಿಸಲಾಗಿದೆ.

ಕೇಂದ್ರ ಸರ್ಕಾರ ಜಾರಿಗೊಳಿಸಿರುವ ಅಮೃತ್​ ಸರೋವರ್​ ಯೋಜನೆಯಲ್ಲಿ ಆಯ್ಕೆಯಾದ ಕೆರೆ ಪುನಶ್ಚೇತನಗೊಳಿಸಲು ಅವಕಾಶವಿದ್ದು ಅಧಿಸೂಚನೆ ಮಾಡುವ ಅಧಿಕಾರ ಕೆರೆಯ ಉಸ್ತುವಾರಿ ಹೊಂದಿರುವ ಇಲಾಖೆ ವ್ಯಾಪ್ತಿಯಲ್ಲಿದೆ. ಈ ಯೋಜನೆಯಲ್ಲಿ ಕೆರೆಗಳ ಮಣ್ಣನ್ನು ತೆಗೆಯಲು ಆಯಾ ಇಲಾಖೆ ಅಥವಾ ಪ್ರಾಧಿಕಾರ ಅಧಿಸೂಚಿಸಿ, ದೊರೆಯುವ ಮಣ್ಣನ್ನು ರೈಲ್ವೆ ಕಾಮಗಾರಿಗಳಿಗೆ ಬಳಸಿಕೊಳ್ಳಲು ಗಣಿ ಮತ್ತು ಭೂವಿಜ್ಞಾನ ಇಲಾಖೆಗೆ ಅರ್ಜಿ ಸಲ್ಲಿಸಿದಲ್ಲಿ, ಕರ್ನಾಟಕ ಉಪಖನಿಜ ರಿಯಾಯಿತಿ ನಿಯಮಗಳು-1994ರ ನಿಯಮ-ದಂತೆ ರೈಲ್ವೆ ಕಾಮಗಾರಿಗಳಿಗೆ ಬಳಸಿಕೊಳ್ಳುವ ಮಣ್ಣಿನ ಪ್ರಮಾಣಕ್ಕೆ ಖನಿಜ ರವಾನೆ ಪರವಾನಗಿ ಪಡೆಯಲು ಹಾಗೂ ರಾಜಧನ, ಹೆಚ್ಚುವರಿ ಪಾವತಿ ಮತ್ತು ಜಿಲ್ಲಾ ಖನಿಜ ಪ್ರತಿಷ್ಠಾನ ನಿಧಿ ವಂತಿಕೆ ಪಾವತಿಗೆ ವಿನಾಯಿತಿ ನೀಡಲು ಅವಕಾಶವಿದೆ.

ಅಲ್ಲದೆ, ರೈಲ್ವೆ ಮತ್ತು ರಾಷ್ಟ್ರೀಯ ಹೆದ್ದಾರಿ ಸಚಿವಾಲಯ ರಾಜಧನ ಪಾವತಿ, ಹೆಚ್ಚುವರಿ ಪಾವತಿ ಮತ್ತು ಜಿಲ್ಲಾ ಖನಿಜ ಪ್ರತಿಷ್ಠಾನ ಟ್ರಸ್ಟ್​ ನಿಧಿಯಿಂದ ಮತ್ತು ಅಮೃತ ಸರೋವರ ಯೋಜನೆಯಡಿಯಲ್ಲಿ ಅಧಿಕೃತವಾಗಿ ಹೂಳು ತೆಗೆಯಲಾದ ಕೆರೆಗಳು, ಸರೋವರಗಳು ಮತ್ತು ಕೊಳಗಳಿಂದ ಮಣ್ಣು ಅಥವಾ ಹೂಳು ರವಾನೆ ಪರವಾನಗಿ ಪಡೆಯುವುದರಿಂದ ವಿನಾಯಿತಿ ಪಡೆಯಲು ಅವಕಾಶ ಪಡೆದಿದೆ. ಹಾಗಾಗಿ, ಶಿರಾ ತಾಲೂಕು ಕೆರೆಗಳ ಮಣ್ಣು ಪಡೆಯಲು ಜಿದ್ದಾಜಿದ್ದಿ ಆರಂಭವಾಗಿದೆ.